I le o o mai pea lava i le taimi nei o lo o fa’aauau pea ona tu le va’alele o le Segaula e le o mafai lava ona fealua’i i Manu’a, e ui o lea ua tuana’i le taimi na folafola e le pule o le kamupani va’alele a le Inter Island Airways ia Barney Sene, i se iloiloga sa faia i luma o le maota o sui e tatau ona lele ai le va’alele, na fesili ai loa le afioga i le ali’i faipule mai Manu’a ia Fetui Fetu Jr i le iloiloga na toe faia ananafi e uiga i le mataupu lenei, po o ai lea ua ia pepeloina le maota o sui ma le Itumalo o Manu’a, po o le susuga a Barney po o le Fa’atonusili o Pulega o Uafu ma Taulaga, lea fo’i sa i ai i le ulua’i iloiloga sa faia i le tausaga ua mavae.

“O ai la lea ua pepelo i le mataupu lenei, o le susuga a Barney po o lau afioga i le Fa’atonu?”, o le fesili lea a Fetu sa fai ia Aleki Sene Jr ma le tamaitai fa’atonusili ia Tamalelagi Dr. Claire Tuia Poumele, lea na fesiligia i le taeao ananafi i se tulaga ua i ai femalagaaiga i le ea mo Manu’a, aemaise ai o se tulaga ua i ai le va’alele o le Segaula.

Na taua e Aleki Sene Jr lea na fai ma sui o lona uso o Barney o lo o pulea le kamupani va’alele, o lo o malaga fo’i i fafo, o le aso 17 Novema 2014 lea ua fa’amoemoe e taunu’u mai ai sui o le vaega a le feterale e pulea malae va’alele (FAA) mo le faia o le latou suesuega fa’ai’u fa’asaga i le Segaula, ona iloa tonu ai loa lea iina le taimi ma le aso e amata ai ona toe tautua le va’a mo le Itumalo.

“O folafolaga lava fo’i nei na fai mai i le ulua’i iloiloga o lenei mataupu, fai mai pau le vaega o lo o totoe o le o mai o sui o le FAA e siaki le va’a ma sauni loa e lele, o lea ua tuana’i le taimi o le asiasiga muamua a le FAA, ao lea lava e le o lele le va’a, lea fo’i ua toe fa’ailoa mai le isi asiasiga, o le fesili la ua tula’i mai, e taunu’u ai ona lele le va’a pe a uma le asiasiga i le masina fou”, o le saunoaga lea a Fetui ma lona si’ufofoga ua si’isi’i i luga.

“Lagona le alofa i le Itumalo, talu mai le iloiloga sa faia i le 2013 seia o o mai i le taimi nei, o lea lava e leaga le va’alele, ma ua tele masina o pagatia le itumalo”, o le isi lea saunoaga a Fetui na lagolago atu i ai isi faipule mai Manu’a, le afioga a Talia Fa’afetai I’aulualo ma le afioga Toeaina Faufano Autele.

Saunoa Talia e fa’apea, e le gata e manaomia e tagata matutua ua mama’i i totonu o Manu’a se va’alele mo manaoga fa’anatinati, ae faapena fo’i i se isi lava manaoga e tula’i fa’afuase’i ai e aofia ai ma le aumaia o tino maliu i falema’i i Tutuila nei.

Na tutu fa’atasi faipule o le Itumalo o Manu’a e talosaga ia Aleki ma Talalelagi, ina ia alofagia tulaga o femalagaaiga mo Manu’a.

O le po anapo na malaga atu ai le MV Sili mo Manu’a mo lana malaga o le Lotu a Tamaiti.