O le fa’atupulaia ai o amioga le tau pulea a nisi o fanau aoga o le atunuu, na fautuaina ai e se tasi o tama le alii kovana i luga o lana polokalama...

pe i ai se auala e mafai ai ona tatala le tulafono lea e fa’asa ai ona sasa fanau, ina ia mafai ai ona toe fa’atonutonu e matua ma faiaoga olaga o fanau ua maitauina le faaletonu i le taimi nei.

Na taua e le tootoo lea i luga o le polokalame a le alii kovana, e foliga mai ua mafua ona faatupulaia amioga a fanau aoga i le taimi e pei o le faamisa, tauai pasi ma isi lava amioga le tau pulea, ona ua i ai le tulafono e taofiofi ai le soona sasaina o fanau.

Fai mai le tootoo, sa leai lava ni mea faapea na tutupu mai i aso ua tuanai ao avea o ia lana augatupulaga ma tamaititi aoga, ona sa sasa e faiaoga ma matua i latou.

Saunoa Togiola Tulafono, e ui ua i ai le tulafono e taofiofia ai le sauaina o fanau, peitai o loo i ai lava le avanoa e mafai ai ona faatonu e faiaoga ma matua fanau. Na faapupula e Togiola le eseese o le sasa ona o le alofa, ma le sasa ona ua ita pe sauaina foi, aua o le ituaiga sasa lena o loo mafua ai ona tutupu faalavelave ma mafua ai ona tofu atu i le tulafono matua poo i latou o loo faatonutonuina fanau.

Ona o lea mataupu, na toe momoli mai ai e le alii kovana se fautuaga i matua, taitai o ekalesia ma mafutaga autalavou, ina ia toe silasila totoa i tupulaga talavou ma faamalosia i latou i aoaoga e mafai ai ona taofia le tosina atu o latou mafaufau i isi gaioiga e pei o le faamisa ma le faatupu vevesi i totonu o aiga, nuu ma ekalesia.

Saunoa Togiola, e tatau i matua ona toe apoapo mai a latou fanau, talatalanoa i ai i taimi o lotu afiafi ma fesilisili poo a latou mea sa fai i le aoga, pe sa tauai pasi aoga pe sa faalogo lelei i le faiaoga, afai sa tauai pasi, o iina tonu lava e toe fautuaina ai e le matua lana tama ina ia tuu le tauai pasi ae toaga i le aoga, aua e i ai lona talitonuga o totonu lava o le aiga e afua mai ai suiga lelei i le tama ma le teine aoga.

TOTOGI MAUALALO

O le masina fou lea ua faamaonia mai e le komiti o le Enetia a le Senate i le Konekeresi, o le a faataunuuina ai la latou iloiloga lea e talanoaina ai ma le mataupu e uiga i totogi amata i Amerika Samoa, e pei ona faamaonia mai e le alii kovana.

Saunoa Togiola Tulafono, i se tusitusiga na ia tauaaoina i le vaiaso na tea nei, ua atagia mai ai le taliaina lea e le komiti o se talosaga ma fautuaga sa tuuina atu e le malo ma le atunuu i le mataupu e uiga i totogi amata i Amerika Samoa, e pei ona i ai le fautuaga i le tofia lea o se Komisi latou te iloiloina siitaga i totonu o le teritori, lea e tai lua tausaga ma fai ia iloiloga ina ia fuafua ai, pe ua talafeagai le faia o nisi siitaga i totogi amata.

E ui o le mataupu i totogi amata, o se tasi lea o mataupu o loo pagatia ai le atunuu i le taimi nei, peitai na saunoa Togiola, e le o mafai lava ona faagalo mai e nisi o afioga i Senatoa o le konekeresi le talosaga a Amerika Samoa sa tuuina atu i ai, ma o loo latou galulue faatasi foi ma le alii faipule ia Faleomavega Eni, ina ia mautinoa e maua se fesoasoani mo le atunuu.

TOE FO’I SUI O LE KAMUPANI PULEA STARKIST

O le aso lea ua faamoemoe e toe fo’i atu ai le alii pule o le kamupani o le Dong Wong ma nisi o totino o lana komiti faafoe, lea e aofia ai ma le alii pule o le kamupani i’a o le StarKist, i le maea ai lea o se latou fonotaga sa usuia mai i le teritori i le vaiaso na tea nei, atoa ai ma ni feiloaiga sa faia ma le malo, i le talanoaina lea o auala e faaleleia atili ai le tautua a le kamupani o le StarKist Samoa i le atunuu.

Na taua e le alii kovana i luga o lana polokalame le faafiafiaina o le alii pule o le kamupani ma lana komiti faafoe, i le tulaga manuia o loo i ai tapenaga a le kamupani i’a i totonu o le atunuu i le taimi nei.

I se aotelega o fonotaga sa faia i le va o le kovana ma le pulega a le kamupani, na taua e Togiola le fiafia o le alii pule o le kamupani o le Dong Wong ia Jae-chul Kim ma faaalia ai lona naunau ina ia faalauteleina pea le tautua a le StarKist i Amerika Samoa.

Saunoa Togiola, ua maea foi ona faailoa e le malo i le alii o Kim ma lana taupulega, o le a galulue soosoo tauau pea le malo ma le pulega o le StarKist ina ia sailia auala uma e mafai ona fesoasoani atu ai le malo, ina ia faatumau pea le tautua a le kamupani i’a i le atunuu.

O se tasi o itu o loo maitauina ai le agai pea i luma o le tautua a le kamupani, o le tulaga lea i le faaopoopoina pea lea o tagata faigaluega ma galuega o loo manaomia.