FUAFUA MALO SE PILI TUPE FESOASOANI AI AUFILI TAMAITI AOGA

Ua fa’amaonia e le ali’i kovana, le sauni o le malo, e tu’uina atu sana talosaga i le Fono Faitulafono, mo se vaega tupe e mafai ona totogia ai pasese a fanau aoga ma faiaoga, o le ‘au ‘football’, lea ua fuafua e malaga atu i Ausetalia i le masina fou.

E le’i fa’ama’oti mai e le afioga Togiola Tulafono, le aofa’iga o le tupe, ma le auala o le a fa’atupe ai lenei pili.

O lea mataupu na saunoa i ai Togiola ina ua fa’aalia le fa’asea o se tina, i le leai o se fesoasoani a le malo o lo o tuuina atu i sailiga tupe a le fanau ma matua o lo o faia i le taimi nei.

Saunoa se sui o matua e fa’apea, e televave tele le tulioso atu o le malo ma le atunu’u e lagolago sailiga tupe a le Manu Samoa, ae o lea e tigaina fanau aoga ma matua e fa’alala i sailiga  tupe o lo o faia, peitai e le o i ai lava se fesoasoani a le malo.

“Ou te le tau faaleaga i le Manu Samoa ma nai uso mai Samoa, ae o le faafitauli o loo tulai mai, e le o i ai se fesoasoani a le malo o tuuina mai i le faamoemoe e nai fanau, ae o le au a tamaiti aoga, o le au fili a aoga maualuluga i le atunuu,” o le fa’asea lea a le to’oto’o.

Na fautuaina e le alii kovana le to’oto’o ina ia aua le taumafai e tu’u fa’atasi moli ma apu i lana saunoaga, leaga e ese lava tulaga o sailiga tupe a le Manu Samoa ma le faitalia o tagata lautele e foai ai tupe mo le au a Samoa, ese taumafaiga a le malo e fesoasoani i atinae o ta’aloga i le atunuu.

O le taua o le lagolago a le malo i le tau atina’eina o le au fili lenei a le atunuu, o le a maua ai le avanoa e tuuina atu ai se fesoasoani i le faalauteleina o le tomai ma le agavaa o fanau aoga i le taaloga football, ma mafai ai ona oo atu i le isi laasaga e pei o avanoa sikolasipi mo aoga i fafo.

E le o se taimi lenei ua lagaina ai e nisi o mataupu tulaga i sailiga tupe mo lenei faamoemoe, atoa ai ma le talosagaina lea o se fesoasoani tau tupe a le malo.

Na fa’apupula e le alii kovana, o le fesoasoani tau tupe lea ua talosagaina mi le Fono, e faapitoa lava mo fanau aoga ma faiaoga o le a malaga i le au.

FAAFITAULI TULAI MAI PASI AOGA

Na avea le matuia o se tulaga na vaaia e se tasi o tama e uiga i si ona atali’i i le taimi na alu ai i totonu o le pasi a’oga ma itu na tutulu ai lenei tama i luga o le polokalama a le alii kovana, a’o ia fa’aleo ona lagona o’otia ma le alofa, ma ia talosagaina ai Togiola ina ia silasila totoa i lenei mataupu.

O lea mata’upu na aofia i luga o mataupu o le polokalama a le alii kovana ina ua fa’aleo e se tasi o tina lona fa’asea i le leai o se tagata ua tofia na te ta’ita’ia le Vaega o Pasi Aoga a le Matagaluega o Aoga, talu ona maliu le sa fa’auluulu i ai lea vaega.

Saunoa lea tina, ua tulaga lelei uma vaega eseese o le matagaluega o aoga, sei vagana ai lava le vaega o Pasi Aoga, ma o se manatu na lagolagoina e se tama mai le afio’aga o Fagatogo lea foi sa maua lona avanoa e talanoa atu ai i le alii kovana.

Na taua e le tama lea le momomo o lona loto ina ua ia vaaia se tasi o taeao ina ua sau le pasi aoga e piki ai tamaiti aoga, na alu atu lava si ona atalii ua saofai i le sitepu o le pasi ona o le tumu tele o le pasi aoga.

Na maligi loimata o le tama ao ia faamatala i le kovana ona lagona alofa ma le momomo o lona loto ina ua ia vaaia lea tulaga  isi ona atalii, ma oso a’e ai se lagona faapea ia te ia, afai ae tupu se faalavelave pe lavea le pasi aoga, o lona atalii lava e muamua oti aua o lea o loo nofo i le sitepu o le pasi.

Na fa’amalulu le alii kovana i tootoo na momoliina atu lea mataupu pe afai ua faaletonu se tautua a le matagaluega a le malo, ae i lona talitonuga, afai o loo maitauina e matua tulaga nei i pasi aoga, e tatau ona logo le ofisa o leoleo ina ia faasala le ave pasi o le pasi aoga, leaga e faasa i le tulafono ona tu se tamaititi i totonu o se pasi a’o alu le pasi aoga, pe nofo foi i le sitepu.

“Ou te talosaga atu i matua ina ia valaau mai i lo’u ofisa ina ia mafai ai ona tatou galulue faatasi i le foiaina o lea faafitauli, ina ia taofia ai le toe tulai mai i le lumanai,” o le saunoaga  lea a le alii kovana.