O le Aso To’ona’i na te’a nei na toai taunu’u mai ai i le teritori, le ali’i pule o le kamupani o le Dong Wong...

lea o lo o pulea le Star Kist Samoa, ae o le vaiaso nei e taunu’u mai ai isi sui o le Komiti Fa’afoe e aofia ai ma le pule o le Star Kist mo le fa’ataunu’uina o sa latou fonotaga, ma o se avanoa lelei lea o le a feiloa’i ai fo’i ta’ita’i o lenei kamupani ma le afioga i le ali’i  kovana, le afioga i le matua ia Togiola Tulafono.

Sa saunoa Togiola, o se ulua’i kamupani tele lenei ua fa’atuina i Amerika Samoa ua faia sa latou fonotaga faapenei i le teritori, ma o se itu fo’i ua atagia mai ai le amanaia e le  Dong Wong o le tautua a le StarKist Samoa.

“Sa ou fa’ailoa i le fonotaga a le kapeneta i le aso ananafi (aso Faraile na te’a nei) o a uma mea e mafai ona faia e le malo e lagolago ai fuafuagaa le kamupani i’a o lo’o i ai ma lona atina’e, ia taumafai le malo e faia ia tulaga uma ina ia mafai ai ona fa’atumauina le auaunaga a lea kamupani i le atunu’u,” o le saunoaga lea a le ali’i kovana.

TA’IFAU LAFOA’I SOLO I NOFOAGA FAITELE

O le fa’afitauli i le lafoa’i e nisi o le atunu’u o a latou ta’ifau i vaega eseese o le atunu’u, o se tasi lea o mataupu na fa’atula’i mai i luga o le polokalama a le ali’i kovana i le fa’aiuga o le vaiaso na te’a nei, ina ua fa’aalia se fa’asea a se tasi o to’oto’o, i le maitauina pea o le fa’atupulaia o ta’ifau e lafoa’i e tagata i nofoaga e pei o le Paka Liona i Tafuna.

Na fautuaina e le ali’i kovana i latou o lo o faia lenei amio, afai ua le toe manana’o i a latou ta’ifau, ona fa’afeso’ota’i lea o le Ofisa o le malo lea  o lo o gafa ma le taulimaina o mataupu fa’apenei, latou te faia le fa’aiuga ina ia taofia ai le soona lafoa’i o ta’ifau nei i nofoaga eseese i totonu o le atunu’u.

Fai mai Togiola, o lo’o faia pea lava siaki masani a le malo i le mata’ituina o i latou o lo’o faia lenei amio valea, ae foliga mai e popoto foi tagata ma fa’atalitali se’i fo’i ese leoleo mai nofoaga nei, ona fa’atoa tatala lea o a latou ta’ifau ma fa’asosola i fafo mai a latou ta’avale.

FA’AAOGA SIAKI KOLISI E TOTOGI AI PILI A LE ASPA

O le totogiina e se tama’ita’i aoga mai le Kolisi Tu’ufa’atasi o lana pili ASPA, i lana siaki o  ‘financial aids’, o se tasi lea o mataupu na fesiligia ai e se to’oto’o le ali’i kovana i le fa’aiuga o le vaiaso na te’a nei, pe o se tulaga talafeagai le soona fa’aaoga o tupe nei i isi manaoga e ese mai i meaaoga a le tama ma le teine aoga.

Na taua e le to’oto’o lea, na faateia o ia ina ua alu atu e totogi lana pili uila i le vaiaso i le isi aso, ae ona vaaia ai fo’i se teineititi aoga i le kolisi o ia fa’aaoga lana siaki e totogi ai le latou pili o le ASPA.

I le saunoaga a le ali’i kovana e tau fa’amanino ai lenei mataupu na ia taua ai, e leai ni tapui e taofia ai le tama ma le teine aoga mai lo latou fa’aaogaina o siaki nei i so’o se manaoga latou te mana’omia, i le mae’a ai lea ona tipi ese o vaega tupe o lo’o mana’omia e le kolisi, i lalo o ta’iala o lo’o tu’uina mai e le polokalame o lo’o auala mai ai vaega tupe nei.

O le isi mataupu na taua ai le Kolisi Tu’ufa’atasi, o si’itaga o a latou totogi lea ua faalauiloa mai le si’i atu i le $100 mo tamaiti Amerika Samoa ma sitiseni Amerika, ae $105 mo tamaiti mai fafo.

Na taua e le tootoo na lagaina lenei mataupu, e le o se tulaga talafeagai lea ituaiga fa’aiuga ua faia e le kolisi,  aua e atagia mai ai le laititi o le eseesega o le a totogi e tamaiti aoga nei i le $5.

Saunoa le ali’i kovana, o le vaiaso na te’a nei sa fa’amoemoe e feiloa’i ai ma le pulega o le Kolisi Tu’ufa’atasi, ae talu ai o gasegase o le tino sa a’afia ai o ia mo le lua aso, ua toe tolopo ai loa lenei feiloaiga i se taimi o le vaiaso nei.

Na taua e le ali’i kovana lona lagolagoina o le finagalo na tu’uina atu e le tootoo lea, i le le tatau lea ona toe silasila toto’a le pulega a le kolisi i totogi o aoga a le fanau ua latou fa’atulagaina, aua afai e finagalo e fa’aleleia tulaga o tupe maua,e tatau ona matua fai gaioiga e maua mai ai tupe e fesoasoani ai i le kolisi, aua o nisi taimi e fa’aletonu ai tupe maua a le malo ma fa’afitauli ai tupe fesoasoani mo le kolisi.