Ads by Google Ads by Google

FETU’U E LE FAIFEAU LANA AULOTU

Na avea le le fiafia o le alii faifeau a se tasi o aulotu, i le leai o se faaiuga a le nuu na faia i le fanau a le ulugalii na fufusu ma lana fanau teine ma itu na faapa ai loa lona le fiafia i lana aulotu ina ua lauga i le aso Sa, ma faai’u ai lana gasugasu i lona fetu’uina lea o le aulotu.

 

Na ata le molimau na faamatala i le Samoa News e faapea, o se taimi muamua lea ua lauga faapea ai le latou faifeau.

 

“Ou ke le iloa pe sa i ai lava se mea makuia ga ala ai ona igaigå le alii faifeau ma i’u ai i loga feku’uiga o le auloku, pau le mea ou ke popole ai, iga ge’i koe u i ai vae o lana feku’u ia ke ia oga mala pagå lea o le mea,” o le tala lea a le molimau na soisoi.

 

O le fetu’u ua taoto i luga o le aulotu na afua mai i se feeseeseaiga na tulai mai i le va o alo o le Faafeagaiga ma le fanau a le isi ulugalii o le nuu.

 

Fai mai le molimau, o le maliu sa faia i totonu o le afioaga, ae faalogoina ai le pisapisao o tamaiti o le aiga o lo o tuai ma le fale sa faia ai le maliu, ma avea ai ma itu na faalavelave ai i sauniga sa faia.

 

“Ou ke iloa o iiga na mafua mai ai le vevesi, ma faai’u ai loa iga fufusu keige o le aiga lea ma alo kama’ika’i o le Faafeagaiga ma kula’i mai ai loa se faagau le malie o le alii Faifeau,” o le isi lea faamatalaga a le molimau.

 

“Ae ga akili oga sa’i le figagalo o le Faifeau iga ua leai se faaiuga a le gu’u e faia i le aiga na vevesi ma laga fagau.”

 

Fai mai le molimau, e le o pogisa le nuu i mataupu faapenei pe a tutupu mai i totonu o le lotoifale, pau le galuega a le nuu e fai, o le sailiili malie poo ai na mafua ai, ae le faapea e faasa ona tutupu ni mea faapea i le soifuaga o lo o tatou ola ai.

 

“Kakou ke iloa uma lava o le Faifeau ma loga aiga i soo se afioaga e ave i ai mea silisili ma le faamuamua a le guu ma le auloku, aua o le Feagaiga lea a le guu ma le Alii, ae le faapea a kukupu gi faalekogu e aafia ai gisi o loga aiga oga faasa lea oga pa’i se isi i ai.”

 

Ina ua fesiligia le molimau po o faapei i mai le aulotu talu ona sasa’a atu i ai e le alii faifeau lana fetu’u i ni nai vaiaso ua mavae atu, na tali le molimau, “e i ai lava kagaka o le auloku ua amaka oga ola fefefe i le feku’u, oga o le lakou kalikoguga e le sala upu mai agamua i mea faapegei, ae o lo o i ai lava fo’i isi  e le o ago i ai, oga e kalikogu i lakou, e le faapea o le feku’u lava ma le malaia, e le faavastivasti fo’i le Alii o le lagi lea o lo o kakou ke kapua’i i ai.”

 

Fai mai le molimau, e tasi lava le mafuaaga na ala ai ona tofia Faifeau, o le faaola o le agaga ae le o le fetu’u o le agaga.