Ads by Google Ads by Google

Fete’ena’i tulafono COLA ma le pili sii ai saofaga tagata litaea

Na faamanino e le Loia a le Ofisa o le Litaea a le malo i luma o le maota o sui, o le tulafono lea ua taoto i luma o le maota o sui e si’i ai i le ta’i $100 siaki mo tagata litaea uma e le o atoa le ta’i $100 o a latou siaki ta’i masina i le taimi nei, e i ai lona feteenaiga ma le tulafono tuai o lo o i ai nei, po o le ”COLA”, lea e tatau ai ona ta’i lua tausaga ma ave le fautuaga a le Ofisa o le Litaea i le kovana mo se siitaga i saofagata a tagata litaea uma, fuafua i le tau ua i ai le soifuaga i le atunu’u.

 

O le tulafono e sii ai i le tai $100 siaki a tagata litaea, atoa ai ma le sili o le tupe fesoasoani mo le tagata litaea pe a maliu i le $3,000 mai le $1,500 o lo o i ai nei, sa fa’aulufaleina lea e le afioga i le ali’i faipule ia Puletuimalo D. Koko.

 

I le mae’a ai o le folasaga manino a le afioga i le Loia a le Litaea ia Faoa A. Sunia, na fesiligia ai loa e le afioga i le tama’ita’i faipule ia Vui Florence Saulo sui o le Litaea a le malo, pe i ai se fete’enaiga o le pili a le maota o sui ma le tulafono o le “COLA” o lo o i ai, ae na fa’amanino e Faoa, e i ai le fete’enaiga.

 

“O le isi fete’enaiga i le tulafono lea ua i luma o le maota o sui ma le tulafono o lo o i ai a le litaea, po o le “COLA”, o le tulafono lea ua manatu i ai faipule, e fa’apitoa lava mo na o tagata litaea o lo o i lalo o le ta’i $100 a latou siaki o lo o maua i le masina, ina ia si’i uma i luga i le ta’i $100, ae o le tulafono o le “COLA” o lo o i ai, e sii ai siaki a tagata litaea uma lava i totonu o Amerika Samoa”, o le saunoaga lea a Faoa.

 

Na taua e ni isi o faipule e aofia ai Vui, Larry Sanitoa, Vesi Talalelei Fautanu Jr ma Atalina Asifoa e fa’apea, e talitonu i latou so o se taumafaiga lava e siitia siaki a tagata litaea, o taumafaiga lelei uma lava, peita’i, e tatau fo’i ona silasila toto’a i ni a’afiaga e ono tula’i mai i le teugatupe.

 

“Ou te manatu e taua lo tatou naunau e fa’atino mea lelei mo le atunu’u, ae ao fo’i ona tatou vaavaai toto’a i le isi itu ina ne’i afaina ai le teugatupe o le litaea”, o le saunoaga lea a Vui na lagolagoina e Asifoa.

 

Saunoa Asifoa e fa’apea, na te lagolagoina le tatau lea ona fa’aopoopo siitaga mo tagata litaea, ae afai e le gafatia e le teugatupe o lo o i ai, e tatau la ona toe iloilo le tulafono fou lea ua taoto i luma o le maota o sui.

 

Saunoa Faoa e fa’apea, na te lagolagoina le tulafono e pei ona fa’aulu i luma o le maota, pau lona popolega, ina ne’i avea ma itu e fa’asea ai isi fo’i tagata litaea e le o aofia ai i le siitaga lea, ma manatu ai i latou ua fa’apito le tulafono mo le vaega e maualalo siaki litaea.

 

Ina ua fesiligia e le komiti o le litaea a le maota o sui faamaumauga a le Ofisa o Litaea i le aofa’i o tagata e agava’a i le tulafono fou lea, na saunoa ai Faoa e fa’apea, e na o le to’a 23 tagata litaea o lo o i lalo o le ta’i $100 a latou siaki o lo o maua i le masina, o lea aofaiga o lo o aofia ai i latou e to’a 17 ua malolo litaea ma’i, ma le to’a 6 sa litaea sa’o lava i latou.

 

Ae mo i latou o lo o i lalo o le ta’i $200 le aofa’i o le siaki e aua i le masina, e to’a 96 le aofa’i o i latou o lo o i ai, e to’a 51 le vaega sa litaea ma’i ae to’a 45 i latou sa litaea sa’o lava.

 

O le mae’a ai o le iloiloga al e maota, na manatu ai loa le komiti e toe taoto le tulafono sei toe iloilo lelei i se isi taimi o i luma.