Na fautuaina e le peresetene o le Senate ia Gaoteote Palaie Tofau le sui peresetene o le maota ia Tulifua Tini Lam Yuen, ina ia avatu na o mataupu e taua ma aoga mo le fono ma le atunuu, ae le o mataupu e faatatau i nisi o sui tauva e pei o Lolo, Faoa ma Afoa.

O le finagalo a Gaoteote, o sana tali i se saunoaga a Tulifua e fa’apea, na palota e le maota maualuga le komiti suesue ina ia faatino galuega lelei mo le maota, faatasi ai ma le fiafia o le maota e lagolago le komiti, ae foliga mai ua aveesea lea fiafia, ona ua pei o se komiti faapaia mata le komiti lenei i le maota.

Na taua e Tulifua e faapea, e i ai fono faalilolilo a le komiti suesue o lo o faia i tua, ma o lo o liki uma atu mataupu o nei fono faalilolilo i tagata ma le atunuu, aemaise ai kemupeni (campaign), ae le tatau ona tupu ia ituaiga mea faapea.

“Ou te talitonu, sei vagana ua faia a outou fonotaga i totonu o le maota lenei, ona faatoa faaaliali lea i le atunuu, e le taua i le maota po o a tou mataupu e talanoaina, ae o le a foi le faasologa o a outou m ataupu, o la’u fautuaga, e le taua le faailoa i le nusipepa, ae o le faalilolilo o a outou fonotaga ua mafua ai ona popo’e se taofi,” o le saunoaga lea a Tulifua.

“Tusa lava poo fea vaega tou te i ai, po o Lolo, Faoa po o Afoa foi, o le agaga taua, ia fai a outou galuega ma le faamalosi, ma ia fai se ai mo le maota,” o le saunoaga faaiu lea a Tulifua.

Ae i le talifuaitau a Gaoteote, sa ia taua ai e fa’apea, e le tatau ona faaleoina ituaiga mataupu ia i luma o le maota, ona e leai ni mataupu faapea a le maota.

“Pau mataupu a le maota o loo i ai e aofia ai le ASPA, Falema’i, loan e $20 miliona, ma isi mataupu e uiga i tupe ma le atina’e o le atunuu, ae leai ni mataupu a le maota e igoa o Lolo, Faoa ma Afoa,” o le saunoaga lea a Gaoteote.

Na faamanino e le taitai o le Komiti Suesue a le Senate ia Lualemaga Faoa e faapea, na mafua ona faatuatuai galuega a le komiti i le taimi o le malologa, ona sa faigata ona maua sui o le komiti, ma talo ni a latou fonotaga i taimi pe a tauaofia le fono faitulafono, ina nei faalavelave i taimi o iloiloga a komiti a le maota.

Na teena e Lualemaga le manatu o lo o faia fono faalilolilo a le komiti, ae o lana molimau, o lo o lelei galuega a le komiti, ua leva foi ona fia galulue le komiti mo le faatinoina o ana tiute e pei ona tofia i ai e le maota.

O le taeao ananafi na amata malolo ai le fono mo le lua vaiaso,

Saunoa Gaoteote, ua maea ona tuuina atu e le maota maualuga lana faatuatuaga i le komiti suesue, mo le faatinoina o ana galuega aua se manuia o le atunuu.  Sa ia lagolagoina le finagalo o Lualemaga i le mafuaaga ua faatuatuai ai galuega a le komiti suesue.

Saunoa Lualemaga, ua sauni le komiti mo le tuuina atu o tusi valaau ia i latou o lo o manaomia le oo atu e molimau i ana iloiloga o le a toe faaauau.

E lei faataunuuina le iloiloga sa fuafua mo le polokalama o le 1602 lea o lo o faatautaia e le Faletupe o Atina’e, ina ua valaau i le vaiaso na te’a nei, ina ua le atoa sui o le komiti e faatino ai ana galuega.

Saunoa Lualemaga, o le a toe faaauau le iloiloga lea i se taimi o lenei mataupu. O molimau sa valaauina e aofia ai le tofa Lolo Moliga le peresetene o le Faletupe, ma le susuga Pat Galeai lea o loo pulea le Ofisa e pulea tupe fesoasoani mai le feterale mo Amerika Samoa