Fesoasoani Tupe ACE Industries mo le Cancer Coalition

Mai ia Novema 25 e o’o ia Tesema 24, 2013 na amata aoina ai e le ACE American Industries i Malaeimi meaalofa foa’i fua mai i a latou tagata fa’atau i le vaitau fiafia o le tausaga, ina ia avea ma fa’avae o le latou sailiga tupe latou te fa’aluaina mo le American Samoa Cancer Coalition (ASCCC).

 

O le aso ananafi na fa’atino ai lea foa’i, ina ua mae’a fa’atulaga lona aotelega o le meaalofa tupe tu’ufa’atasi e le ACE Industries ma pa’aga o tagata fa’atau i lo latou faleoloa na foa’i, e $10,040.78.

 

O le $5,040.78 na aoina mai tagata fa’atau i lea faleoloa tele ma le agalelei, ae $5,000 na fa’aatoa ai e le ACE Industries le latou meaalofa ma maua ai le aofaiga o le foai atoa.

 

O sui o le ACE sa latou taua’aoina aloa’ia lenei tinoitupe i le ASCCC, e aofia ai le tama’ita’i o Nadine Taufa’asau ma Teniseli Ma’ae o sui fo’i o le Pulega; i le tama’ita’i CEO/Peresetene o Ngarie Ho Ching, ma le aufaigaluega mo lea fa’amoemoe ia fa’ataunu’uina ma le manuia.

 

“O lenei foa’i e taua tele, fa’afetai i le mamalu na faia fa’atauga ma sa foa’i ai mo le fa’amoemoe lenei, e le mailoa i latou e fa’ao’o i ai lenei foa’i, ae o se galuega lelei ua outou faia, ma ua fa’amanuiaina ai lenei Sosaiete a le Kanesa i le amataga o lenei tausaga fou. O se amataga fou fo’i ma le fa’afiafia loto, aua o lo’o taoto le 10+ o i latou ua mae’a fa’ao’o atu talosaga mo le fesaosoani, ae o lo’o taumafai e saili seleni e fa’atino ai le auaunaga mo i latou.”  O se saunoaga lea a Rochelle Tuitele Reid i le taeao ananafi i le taimi o le foa’i taua. O ia fo’i lea o le ta’ita’i fono lea a le American Samoa Community Cancer Coalition.

 

Ua iloga mai, o lenei galuega lelei, ua lima ai lenei o tausaga o fa’atautaia pea lava, ae o le naunauta’iga o i latou, ia ausia lava le $10,000 o le foa’i e taua’aoina. O le aotelega o nei foa’i uma, e afua mai le 2009- $2,091; 2010 - $6,756;  2011- $2,682; 2012 - $7,115 ma ua o’o mai ai i le 2013 - ua ausia le matati’a sa fa’amoemoe i ai i tausaga ta’itasi.

 

Ua fa’ailoa mai, o tinoitupe e mafai ona taua’aoina mo sui uma e talosaga ma ua fa’amaonia fo’i o lo ua mae’a maua ma taumafai togafitiga i le Kanesa, e ta’i $500.

 

E tusa ai ma le fa’amatalaga a le susuga le foma’i Tofaeono Dr. Victor Williams, “E matua mo’omia lava lenei fesoasoani tupe e i latou uma ua maua i le Kanesa, e tele mea e ao ina tapena, e fa’aaoga e i latou i le falema’i, atoa ai ma nisi tapenaga mo latou aiga, ae maise o nisi o pasese e malaga ese atu ai mo togafitiga. O le to’atele ua le mafai ona faia togafitiga, ona e vaivai le tamaoaiga, ae o nei foa’i ua mafai ai ona tula’i ma alu e saili togafitiga aoga mo i latou.”

 

O lo ua fa’ailoa mai e talia lava so’o se talosaga, e auiliilia fo’i e le Komiti Fa’afoe talosaga uma e o’o atu, ma e ala lava ona fa’atuai se fesoasoani, ona e le o i ai se vaega tupe i lea taimi mo le fa’amoemoe. O le tala mai fo’i, e pau lea o le sailiga alofa, o lo’o mafai ona taua’aoina ai nei fesoasoani i e mama’i kanesa e talosaga.

Comment Here