Ina ua mae’a le tautua sa fa’atautaia e le American Samoa Coalition Against Domestic & Sexual Violence, ua toe taumafai mai le latou Ofisa ina ia toe fa’apupula i nai tina ma tama’ita’i sa fa’asauaina i totonu o latou aiga, nisi ala e soso’o atu ai le fesoasoani mo i latou ina ia fa’aauau le taumafaiga ia toe maua le saogalemu o i latou i o latou lotoifale.

O lea taumafaiga sa latou toe vala’aulia ai tautua eseese a le Malo ma isi fa’alapotopotoga tumaoti, ina ia toe tima’ia lea vasega e 12 tina, ua mae’a i ai le latou fesoasoani ae o le a toe fuata’ia se isi olaga fou mo i latou.

Na soso’o lea ma le avanoa o le DHSS Sandra Fruean -Hererra, lea sa ia fa’ailoa mai le aofa’iga o tina o lo’o ua tausia i totonu o le Nofoaga o Sulufa’iga i le taimi nei, ona o sauaga i totonu o aiga, po’o sauaga fa’aleituaiga e a’afia ai latou soifua talavou, ua i ai nei i le 16.

O se faitau ua tele na’ua, ae ua tatau fo’i ona soloa’i mai i nisi nofoaga, ae fa’avanoa le nofoaga a lea matagaluega ma le isi vasega o tina ma tama’ita’i o lo’o ua mae’a faia iai fa’ai’uga a le fa’amasinoga e tatau ona tausia lelei i lenei nofoaga e tatalia ai ni avanoa e latou te gafatia ai ona fa’agasolo le latou soifuaga ma le saogalemu.

E lua nofoaga fa’apitoa ua saunia e le Matagaluega, e tasi mo tina, ae o le isi mo le fanauiti ua mautinoa ua sauaina fa’atasi ma tina i totonu o latou aiga. O le umi e mafai ona alaala ai latou i nei nofoaga uma e lua, o le 3 vaiaso i le tasi le masina, ona tatau lea ona toe fo’i i aiga, po’o nisi nofoaga ua mautinoa e saogalemu ai.

“E mafai ona maua fautuaga aoga mo oe, e mafai fo’i ona fa’ailoa atu avanoa ua mafuli le matagaluega e fa’atino mo outou e saili ai se isi agava’a ae a ni galuega e mafai ona e faia, e saili ai le tamaoaiga mo le fatuaiga tausi. E tatau ona e tu i luga, ma e sau e fa’afesili mo se fesoasoani i le Matagaluega o Tina ma Fanau Talavou a le tatou Malo.”

“Ua i ai a’oga su’isu’i, ua mae’a faia fo’i galuega fa’afalelalaga mo tina e gafatia ona faia galuega alofilima fa’asamoa e fa’atau atu, ma e matua tele le sosia o le tomai o i latou ua a’otauina tina i le tatou Ofisa nei.”

“Ua mae’a faia a’oga Kuka eseese e mafai ona e nofo ma gaosia ai mea taumafa e fa’atau atu mo se sailiga o le seleni e tausia ai aiga, a le o lena, alu i maila atoa, fa’atula’ia ai sau pisinisi! O lena itu fo’i ua sapaia e le Faletupe o Atina’e sau nogatupe la’ititi e fa’atu ai lau pisinisi.”

Na i ai se avanoa o le tama’ita’i o Moana Purcell mai le DHR - WIA e talanoa ai ma fa’ailoa mai le tele o avanoa o lo’o maua i le taimi nei mo tina ma tama’ita’i talavou ina ia “sailia e i latou ni avanoa faigaluega, pe tuai, ae maua lava!”