Fesiligia Toeaina mafua’aga ua saili ai i Samoa ni faiaoga

Ua fesiligia e le afioga i le alii faipule mai le itumalo o Manu’a #2 le mafuaaga ua ala ai ona saili i Samoa ni faiaoga e galulue i le matagaluega o Aoga a le malo o Amerika Samoa, ae ua le saili i Amerika o lo o tele ai faiaoga lelei ma naunau e fia o mai i Samoa.

 

O lea mataupu na laga e le afioga i le alii faipule ia Toeaina Faufano Autele, o se tasi o tamali’i ua tele tausaga o lona soifua o galue o se faiaoga mo le malo o Amerika Samoa, i le taimi o folafolaga a le maota o sui i le taeao ananafi.

 

Na faavae le finagalo o le alii faipule ia Toeaina i se ripoti na lomia i le Samoa News i le aso ananafi, lea sa taua ai le faasea o le Minisita o le Matagaluega o Aoga a le malo o Samoa, e pei ona ia faaalia i luma o le Palemene, ona o se taumafaiga a le matagaluega o Aoga a le malo o Amerika Samoa e saili mai i Samoa ni faiaoga e galulue i totonu o le teritori i ni totogi lelei.

 

“Sa saili mai fo’i iinei e le malo o Samoa ni faiaoga e galulue i totonu o le latou malo i tausaga ua mavae, ae sa tatou faasea fo’i, aisea la ua tatou manatu ai e uia lea tulaga ae o lea e taatia mai Amerika o lo o to’atele faiaoga lelei o lo o i ai, o lo o naunau fo’i e fia malaga mai i Amerika Samoa e galulue ai ma a’oa’o le gagana Samoa,” o le saunoaga lea a Toeaina.

 

Saunoa atili Toeaina e faapea, e leai se mafuaaga o le a tau saili mai ai fua i Samoa ni faiaoga e galulue i le teritori, a’o lea e lelei ma maopoopo le fesootaiga i le va o Amerika Samoa ma le malo tele o Amerika.

 

“Ou te lagona o lo o to’atele faiaoga loto alolofa ma lelei tulaga i aoaoga o lo o i ai i Amerika i le taimi nei, o lo o naunau fo’i i latou e malaga mai i le teritori e galulue ai, e sili ai la ona tatou saili i Amerika e sili atu ona faigofie mo Amerika Samoa,” o le isi lea fautuaga a le alii faipule.

 

Ae i se ripoti na lomia e le Samoa Observer mai Samoa i le vaiaso nei, na faamatala ai e le minisita o aoga a le malo o Samoa ia Magele Mauliua Magele le gaioiga ua faia e le matagaluega o Aoga a le malo o Amerika Samoa, o se gaioiga ua latou taumafai ai e gaoi mai faiaoga mai Samoa ina ia galulue i le teritori.

 

Na taua i lea ripoti e faapea, na taua e le alii minisita i luma o le fono a le Palemene a Samoa e faapea, ua faia e sui o le matagaluega o aoga a le teritori lenei auala ‘le fa’aaloalo, o le o atu ma taumafai e gaoi,’ mai faiaoga mai Samoa e galulue i le teritori.

 

Na taua e le Minisita i lana folasaga i luma o le Palemene a Samoa, e le o ita i le gaioiga a le matagaluega o Aoga a le malo o Amerika Samoa ua faia, ae tatau fo’i ona silafia e le Palemene, o se lu’itau tele lea mo le matagaluega atoa o aoga a Samoa.

 

O se tasi o itu na taua e le minisita i lana saunoaga e pei ona taua i lea ripoti, e le o malamalama lelei lona sui ma le matagaluega, po o a penefiti ma faamanuiaga sa ofoina atu e sui o le ofisa o aoga a Amerika Samoa sa malaga atu, i faiaoga sa latou fesiligia ma faatalatalanoa.

 

I le isi itu e pei ona saunoa le minisita, afai ua toatele naua faiaoga i totonu o Samoa, atonu o se tasi lea o maketi lelei e mafai ona saili galuega i ai tagata Samoa, ae tatau ona faia i auala lelei ma aloaia.

 

E talitonu le Samoa News, o sui e toatolu o le ofisa o aoga a le malo o Amerika Samoa sa malaga i Samoa mo lea faamoemoe, e aofia ai le susuga ia Asaeli Samasoni, Fiaui Vaitautolu ma le faatonusili o aoga ia Vaitinasa Dr. Salu Hunkin Finau.

 

E tusa ai ma se ripoti sa tuuina mai i le Samoa News, o sui o le ofisa o aoga sa malaga i Samoa mo lenei faamoemoe, e tusa ma le vaiaso atoa sa aumau ai i latou i se fale talimalo, ma o iina sa faatautaia ai la latou faatalatalanoaga mo faiaoga e naunau i lenei avanoa, ae sa mafuli lava i faiaoga e aoaoina mataupu o le Saienisi ma le Numera.

 

E silia ma le to’a 20 faiaoga sa mafai ona aga’i ane i lea faatalatalanoaga, ma maua ai le avanoa lelei e fetufaa’i ai ma sui o le matagaluega o aoga, ma faamamafa i ai le naunautaiga mo ni faiaoga e mafai ona latou faaaoga le gagana Samoa ma le Faaperetania e aoao ai fanau aoga.

 

Na taua e le Fofoga Fetalai o le Maota o Sui ia Savali Talavou Ale i le alii faipule ia Toeaina e faapea, o le iloiloga a le komiti o aoga a le maota ma le tamaitai faatonusili i le aso Gafua o le vaiaso fou, o se avanoa lelei lea o le a fesiligia ai o ia e faatatau i le mataupu lenei, atoa ai ma isi mataupu o lo o fia malamalama i ai le toatele o faipule.

 

O le itula e 8:30 i le taeao o le aso Gafua o le vaiaso fou lea ua faamoemoe e faia ai le iloiloga a le komiti o Aoga a le maota o sui ma le tamaitai faatonusili ia Vaitinasa, mo le talanoaina o le tele o mataupu e faatatau i le ofisa o aoga.

 

O ni isi o mataupu ua sauni ni isi o faipule e fesiligia ai le tamaitai faatonusili, o le fuafuaga ina ia tasi le aso e faia ai faauuga mo fanau aoga i aoga maualuluga i Tutuila nei, lea e pei ona ia faalauiloa i le vaiaso nei.

 

Na taua e ni isi o faipule e faapea, o lea fuafuaga e foliga mai e le talafeagai ma finagalo o le toatele o matua, ma ua toatele foi sui o matua ua faaalia lo latou le lagolagoina o lea fuafuaga.

 

E ui i le toatele o le atunuu o lo o fesiligia lenei faaiuga, peitai e le i tuuina mai lava se finagalo o le kovana sili ia Lolo Matalasi Moliga e faatatau i lenei fuafuaga a le faatonusili o aoga.

Comment Here