Ads by Google Ads by Google

FESILIGIA TAOTASI SAUNOAGA LOLO PO O AI FA’ATATAU I AI

O le saunoaga a le ali’i kovana e faatatau i tusi paketi lapopo’a ia sa masani ona tuuina atu e le malo i le Fono i tausaga tupe ua mavae atu, lea sa tele tupe a le malo e alu i le lolomiina ae avatu e le faaaogaina e faipule ae na o le togi solo, na tula’i ai le afioga i le ali’i faipule ia Taotasi Archie Soliai ma fesiligia ia saunoaga po o ai o lo o fa’atatau i ai.

 

O lea mataupu na fesiligia e Taotasi ina ua tula’i e talosagaina ripoti o tupe mai le malo mo le paketi, i le taimi o folafolaga a le maota o sui ananafi.

 

Saunoa Taotasi e faapea, e tatau i le fono ona malamalama i le tulaga o lo o i ai tupe maua a le malo i kuata ua mavae atu, ina ia taunuu mai le paketi mo le Tausaga Tupe fou ae ua malamalama faipule i le tulaga o le tamaoaiga o le malo.

 

“O lea fo’i ua i ai saunoaga a le alii kovana e faatatau i tusi paketi o lo o auina mai i le fono, lea e taatia’i solo e faipule ae le iloa po o ai faipule o lo o faatatau i ai ana saunoaga,” o le saunoaga lea a Taotasi.

 

Na taua e le kovana sili ia Lolo Matalasi Moliga i luma o Fa’atonusili i le vaiaso na te’a nei e fa’apea, ua i ai ni isi o suiga ua fuafua le malo e fai i le tusi paketi lea o le a tuuina atu i le fono, ina ia mautinoa ai e laititi le tupe a le malo e alu i le totogiina o lea tusi.

 

“E i le va o le $37,000 i le $40,000 le tupe a le malo na alu i le lolomiina o le tusi paketi mafiafia lea sa ave i le fono ae avatu tauai solo e faipule latou te le fa’aaogaina,” o le saunoaga lea a Lolo na tali e ai ni isi o sui o le kapeneta.

 

O tusi paketi sa masani ona tuuina atu e nofoaiga ua mavae atu i le Fono, o le tusi muamau e matua mafiafia lava, o lo o auiliili ai vaega taitasi o paketi a matagaluega eseese a le malo, ae o le isi tusi paketi e le mafiafia tele, o lo o faamanino ai tulaga o tupe o lo o ao mai e le malo atoa ai ma tupe mai isi vaega tumaoti.

 

Mo le tusi paketi lea o le a tuuina atu i le fono i ni nai vaiaso e le o toe mamao e pei ona saunoa Lolo, e manifinifi, e na o le aofai lava o le paketi a matagaluega ma ofisa o le a tusia ai, ae o isi uma faamaumauga i le atoaga o le paketi o le a tuuina i totonu o se ‘disc’, ina ia mafai ai ona faaitiitia tupe a le malo e alu i le lolomiina o lana tusi paketi.