Ads by Google Ads by Google

FESILIGIA SSIC MAFUAAGA O FAAFITAULI TAU TUPE A LE LBJ

Na mamafa fesili a sui o le Komiti Suesue a le Senate, le SSIC i la latou iloiloga ma sui o le LBJ, i le mafuaaga ua ala ai ona feagai le falemai ma fa’afitauli tau tupe e pei ona maitauina i le taimi nei.

O le taeao ananafi na nofoia ai le komiti o le SSIC mo le amataina o ana suesuega, talu ona pasia e le Senate le iugafono e faatulai ai le latou komiti suesue.

O le afioga i le taitaifono o le komiti ia Lualemana Faoa na taitaia le iloiloga, faatasi ai ma isi sui o le komiti e aofia ai le afioga i le Senatoa ia Velega Savali Jr o sui taitai komiti, Fuata Dr. I’atala, Mauga Tasi Asuega, Fuamatu J.V Fuamatu ma le alii loia fautua a le Fono ia Henry Kapel.

O le pulesili o le LBJ ia Michael Genstenberger ma le taitaifono o le komiti faafoe ia Moananu Va na molimau i le taeao ananafi. E lei faatasi atu le Teutupe a le LBJ ia Viola Baddock ona o loo gasegase.

O Senatoa Velega na uluai fesiligia molimau ina ua uma ona faatautoina i laua. O nisi o fesili na fesiligia ai e Velega ia molimau e aofia ai le mafuaaga o le faafitauli tau tupe lea o loo feagai ma le falemai, auala o loo maua mai ai alagatupe e totogi ai aitalafu, faapea ai ma ni fuafuaga mo le lumanai ina ia foia ai faafitauli nei.

Na taua e Gerstenberger i le komiti e faapea, ina ua avea o ia ma pulesili o le falemai ia Me 2010, sa ia iloa faafitauli ma faaletonu tau tupe o loo feagai ma le falema’i i Fagaalu, ma o le tele lava o taimi ina ua ia nofoia le nofo, e faia ai lava fonotaga a le pulega i masina taitasi i le tau sailiina lea o ni auala e foia ai faafitauli nei.

I le paketi a le falemai mo le tausaga tupe e 2011, o loo atagia mai ai tagata faigaluega e toa 665, peitai i le 2012 ua faaitiitia i le 634 ae ua faaopoopo le tupe e alu i totogi o tagata faigaluega i le $2.6 miliona.

Sa fesiligia e Velega le mafuaaga ua maualuga ai le tupe ua alu i totogi o tagata, lea na taua ai e Genstenberger e faapea, sa manaomia le faaopoopo o totogi ma nisi fomai ma i latou e galulue i le fale talavai, ina ia mautinoa e tulaga lelei le tautua a le falema’i e tuuina atu i le atunuu.

O se tasi o mataupu na fesiligia e Velega, o le $10 miliona lea o loo toe totogi atu e le LBJ i le medicaid, atoa ai ma le isi tupe lea o loo toe totogi atu i le Ofisa o Tagata Faigaluega a le malo tele.

E ui e lei galue Gerstenberger i le falema’i i le taimi na tulai mai ai faafitauli nei, peitai sa ia taua e faapea, o le $10 miliona lea o loo toe totogi atu i le medicaid, na mafua mai ina ua ova le tupe sa faaaoga i le polokalame mai le tupe sa fuafuaina, ma mafua ai loa ona toe talosaga mai le medicaid a le malo tele e toe totogi atu le tupe lea.

Ae na saunoa Moananu e faapea, o le faaaliga a le malo tele, afai e le toe totogiina atu le tupe lea, o le a taofia loa tupe mo Amerika Samoa i lalo o le polokalame a le medicaid, ma o le taimi nei, toe $1.7 miliona le aitalafu o loo totoe.

Na fesili Mauga poo fea o loo aumai ai e le falemai tupe e totogi ai le aitalafu, ae na tali Gerstenberger, o tupe o loo maua mai i pili, o le malo ma isi tupe fesoasoani mai le falemai.

“Leitioa a e mana’o e sii maualuga pili a le falemai ina ia maua ai se tupe e tau totogi ai mea nei,” o le saunoaga lea a Mauga ma lulu lona ao.

O se tasi o itu sa taumafai le SSIC e saili, pe aisea ua mafua ai ona feagai le falemai ma le faafitauli tau tupe i le taimi nei.

Na faamanino e Gerstenberger e faapea, o le mafuaaga autu ua ala ai ona feagai le falemai i Fagaalu ma le faalavelave tau tupe, e tele atu le tupe o loo faaalu e le falemai e togafiti ai le tagata ma’i e tasi nai lo le tupe o loo maua mai e faatino ai lea auaunaga.

Mo se faataitaiga sa ia taua ai e faapea, o le LBJ e na o le $30 miliona lana tupe faasoasoa i le tausaga, peitai o falema’i faapenei i totonu o Amerika, a maualalo le tupe faasoasoa e faatino ai ana galuega  i le tausaga e $200 miliona.

Na fesiligia e le komiti le alii pule pe sa taumafai e faafesootai le kovana ma le Fono mo se fesoasoani i le falemai, ae nat ali le molimau, “e faatele ona taumafai le falemai e saili se fesoasoani a le malo ma le fono.”

Na fesili Lualemana i tupe ia na taua na aafia ai tagata faigaluega a le falemai,  ina ua masalomia lo latou faaaogaina, ae na faamanino e Gerstenberger, o le mataupu lea ua maea ona o latou tuuina atu i le FBI mo suesuega, ona o nisi o a latou tupe o loo maua mai i le feterale.

Fai mai Gerstenberger, e toafa tagata faigaluega a le falemai na aafia i le mataupu lea, lea e tusa ma le $200,000 na tupe na afaina ai, ma ua maea ona foia le faafitauli lea e ala i ni suiga sa faia ina ia le toe mafai ai e tagata faigaluega ona toe fetagofi i tupe i soo se taimi, ma le tulai mai ai o faaosoosoga pe a vaai i mea tau tupe.

O loo faaauau pea suesuega a le SSIC i le vaiaso nei.