Ads by Google Ads by Google

Fesiligia pe tusa ma tulafono paketi a le ASPA

O le te’ena ai e kovana Togiola Tulafono o le pili na pasia e le Fono e fa’asoasoa atu ai le $60.37 miliona mo le Paketi a le Fa’alapotopotoga o le Suavai ma le Eletise (ASPA), ua fesiligia ai e nisi o le fono le paketi lea ua fa’atautaia ai galuega a le ASPA i le taimi nei, pe o talafeagai ma ala o le tulafono.

I le tau’a’aoina ai e ta’ita’i o le fono o se tusi mai le alii kovana e te’ena ai le pili mo le paketi a le ASPA, na faia ai loa le fa’ai’uga a le Senate, ina ia toe fa’aulu le latou pili lea e pasia, ina ia te’ena ai le  malosiaga o le kovana na te te’ena ai le pili sa pasia e le Fono.

O le komiti o le Paketi lea o lo o taitaifono ai le afioga i le alii Senatoa ia Lemanu Peleti Mauga, sa tu’uina atu i ai lenei pili taufa’aofi, ma o le taeao ananafi na faitau fa’alua ai ma le fa’amoemoe, o le taeao nei e faitau tolu ai.

Sa fautuaina e le afioga i le alii peresetene o le Senate ia Gaoteote Palaie Tofau le afioga Lemanu ina ia silasila totoa i le tulafono ma vave fai i ai se faaiuga a le maota, ona o se tulafono e taua tele, aemaise lava o lea ua toe faaulu ina ia faaleaoga ai e le fono le malosi o le kovana na te teena ai se pili e pasia atu e le Fono.

Saunoa le afioga i le alii faipule ia Taotasi Archie Soliai i le taeao ananafi, afai o lea ua teena e le kovana le pili na pasia e le fono e faasoasoa atu ai le paketi a le ASPA mo le isi 6 masina, e fesiligia la e lona sui faipule le paketi lea ua faagaioi ai galuega a le ASPA, pe o tusa ai ma ala o le tulafono.

Sa ia fesiligia foi se isi gaioiga a le Fono e faia ina ia foia ai le faafitauli lea o loo tulai mai i le paketi a le ASPA.

Na taua e Togiola i lana tusi i taitai o le fono e faapea, o lo latou pasia ai o le pili e faasoasoa ai le paketi a le ASPA mo le isi 6 masina, ua feteenai ai ma le tulafono lea e tuu atu ai le malosi i le Komiti Faafoe latou te pasia ai le paketi mo le ASPA lava latou ia, aemaise ai foi o le tulaga i le mauaina lea e le ASPA o tupe mai fafo e fesoasoani ai i ana  galuega faatino mo le atunuu.

O se tasi o lenei o mataupu o loo faaauau pea ona tulai mai ai se feteenaiga i le va o le Fono ma le pulega a le ASPA, poo ai o loo umia le malosi e pasia ai le paketi a le ASPA.

Fai mai le fono o latou o loo i ai le malosiaga e pasia ai le paketi a le ASPA, peitai o loo finau mai foi le komiti faafoe a le ASPA, o latou o loo i ai le malosi e pasia ai le paketi mo galuega faatino a le ASPA.

E tusa ai ma ala o le Faavae o loo taua ai e faapea, afai e teena e le kovana se pili na pasia atu e le Fono, ia le silia ma le 14 talu mai le aso na teena ai e le kovana le pili, e tatau ona faia ai se faaiuga a le fono, ma ia lagolagoina e le 2/3 o sui o maota taitasi lenei tulafono.

Afai loa ae toe pasia e le Fono le pili sa teena e le kovana, ona toe tuuina atu loa lea i le ofisa o le kovana mo le sainiaina, ae afai e tuanai aso e 15 e le’i sainia lava e le kovana lea pili, ona ia tuuina atu loa lea i le Failautusi o le Initeria faatasi ai ma ni ana fautuaga e uiga i le pili.

Afai e talia e le Failautusi o le Initeria le pili lea i totonu o le 90 aso, ona avea ai loa lea o le pili tau faaofi ma tulafono, ae afai na te le tuuina mai ai se faaiuga o lona uiga o le a le avea ma tulafono lea pili.