Fesiligia nisi atunu’u fautuaga Dr. Saleapaga

Ua i ai nisi o le atunuu aemaise lava i tagata gasegase o lo o autova’a atu e fa’aaoga le tautua a le falema’i o le LBJ i Faga’alu, ua latou fesiligia le fautuaga ua tuuina atu e le ali’i foma’i sili ia Dr. Iotamo Saleapaga i le Komiti Faafoe o le Falema’i, ina ia tapunia le tautua a le Primary Care Clinic, e mafua mai lea i le tau leai o ni tagata gasegase e autova’a atu i lea auaunaga.

 

Na taua e le tina matua ia Valasi Onofia o Tafuna, e leai se mea o le a tapunia ai fua lea auaunaga taua mo le atunuu, aua o le tiute lea o le falema’i o le ofoina atu o le tautua e puipuia ai le soifua maloloina o tagata.

 

“O a’u e masani ona alu i le Primary Care Clinic pe a fia vaai le foma’i, ae afai o le a tapunia lea auaunaga, o fea la le vaega a le falema’i e tatau ona ou alu i ai e vaai le foma’i,” o le saunoaga lea a Valasi.

 

O le finagalo foi lea o le susuga a Lafitaga Ponifasio ina ua fesiligia e le Samoa News i le taeao ananafi e faatatau i lenei mataupu.

 

Na taua e Ponifasio e faapea, “o le tiute o le falema’i o le ofoina atu lea o le tautua mo le soifua maloloina o le atunuu, o le tiute o le atunuu, e totogi tupe e tusa ai o le tautua  a le falema’i, atoa ai ma le fesoasoani a le malo i le itu tau tupe e faaleleia atili ai le auaunaga a le falema’i,” o le saunoaga lea a Ponifasio.

 

Saunoa fo’i Ponifasio e faapea, e le o aso uma e mama’i ai tagata, e le o tagata uma fo’i e gafatia le tau o pili e vaai ai le foma’i, ma, atonu o isi ia mafuaaga ua ala ai ona faaitiitia le aofa’i o tagata gasegase e aga’i atu i le tautua a le Primary Care Clinic.

 

Ae pei ona taua e Dr. Saleapaga i lana tusi i le taitai fono o le Komiti Faafoe o le falema’i ia Mase Akapo, o le faaitiitia o le aofa’i o gasegase o lo o manaomia le tautua a le Primary Care Clinic, o se tasi lea o mafuaaga ua ia fautuaina ai le tatau lea ona tapunia o lea tautua, ina ia mafai ai ona faasao tupe a le falema’i, ae faaleleia atili ai lana tautua mo le atunuu i isi vaega o lo o moomia.

 

E le’i nofo lelei i le finagalo o le Pule Sili o le falema’i ia Joseph Davis Fleming le fautuaga a Saleapaga e uiga i lenei mataupu, ina ua tuu atu sa’o lana fautuaga i le Komiti Faafoe e aunoa ma le fesiligia o sona finagalo, ae o ia o le Pule Sili o le falema’i.

 

I se vaega o le tusi a Fleming sa tuuina atu i le Komiti Faafoe a le falema’i, e le gata o lo o ia fesiligia ai lona tiute faa Pule Sili e faia ai faaiuga, ae sa taua ai fo’i ma le ono mafai lea ona faamavae mai lona tulaga faa ta’ita’i o le falema’i, ina ua laa loa le alii foma’i e fai lana faaiuga, e aunoa ma le fesiligia o lona malosi faa ta’ita’i i mataupu faapenei.

 

Na taua e Fleming i lana tusi e faapea, sa i ai lona manatu e talanoaina e le Komiti Faafoe i lana fonotaga i le aso Faraile na te’a nei, le mataupu e faatatau i le fautuaga e tapunia le auaunaga a le Primary Care Clinic, ae o lea ua logoina o ia e se sui o le komiti faafoe, e le’i talanoaina lena mataupu i le taimi o le fonotaga.

 

Fai mai Fleming, e le gata o le mataupu lenei e le o sa’o le auala na uia e le alii foma’i ma lana fautuaga, ae le’i logoina fo’i o ia e uiga i lenei mataupu, ae sa tatau i le alii foma’i ona fesoota’i muamua atu ia te ia, ina ia tusa ai ma aiaiga o lana konekarate.

 

Na taua fo’i e Fleming le tele o tala salatua ua ia maua e faatatau i nisi o tagata faigaluega o lo o faasea i lenei mataupu, ina ua faia le faaiuga e aunoa ma le faatalatalanoaina muamua o le mataupu, aemaise lava i vaega ma lala o le falema’i o lo o aafia.

 

“E le o se auala sa’o lea e faafoe ai le falema’i, ma ou te le nofonofo fo’i ma matamata a’o faia gaioiga e le tusa ai ma le auaunaga a le falema’i mo le atunuu,” o se vaega lea o le tusi a Fleming.

 

Na faai’u le tusi a Fleming i lona fautuaina o le komiti faafoe ina ia vave faia se faaiuga e foia ai lenei mataupu, aua afai e le vave faia i ai se faaiuga, na pau le isi laasaga o le a ia faia o lona faamavae lea mai lona tofiga o lo o i ai.

Comment Here