Ads by Google Ads by Google

Fesiligia le mafuaaga na tatala ai i tua ni alii pagota

Na fesiligia se finagalo o le afioga i le Komesina le Tumau o le Matagaluega o Leoleo i le taeao ananafi, ina ua fesiligia e le toatele o le atunu’u po o ai e mafai ona faatagaina ona tatala i tua se pagota o lo o tuli sona faasalaga faafalepuipui, ina ua molimauina e ni isi o le atunu’u se tasi o alii pagota na auai i le faaipoipoga a lona afafine sa faia i le Aso Toonai na te’a atu nei, faapea seisi alii pagota na auai i le faauuga a sona afafine na faia i le Aso Sa.

 

I se faamatalaga na maua e le Samoa News na taua ai e faapea, o le alii pagota o Akeki Manu na auai i le faaipoipoga a lona afafine i le Aso Toona’i ae o le alii pagota o Michael Agasiva na auai i le faauuga a lona afafine, lea na faauu mai i le Vasega 12 a le aoga maualuga a Iakina Adventist Academy, o ia fo’i lea na Valedictorian i le vasega faauu.

 

Na faamanino mai e le tofa Leseiau Laumoli e faapea, e mafai e le komesina ona tatala i tua se pagota e auai i ni sauniga faapitoa a o latou aiga, ae tatau fo’i ona i ai se leoleo e vaavaaia le pagota ua tatala.

 

“Soo se pagota lava e tatala i tua e auai i sauniga faapitoa a o latou aiga e pei o maliu, faaipoipoga ma faauuga, e tatau lava ona i ai se leoleo e vaavaaia o ia, o mataupu foi e faatatau i le tatalaina i tua o pagota e auai i sauniga faapitoa a o latou aiga, e mataupu e masani ona faia e le Ofisa o Leoleo,” o le saunoaga lea a Leseiau.

 

Ae peitai, i se faamatalaga a se tasi o tama matua na talatalanoa ma le Samoa News, sa loka sona atalii i le 2011 i moliaga o le faaoolima ma o le tausag foi lea na maliu ai le tina o le aiga, ma sa ia talosagaina ai le pule o le falepuipui mo se avanoa e mafai ai ona auai lona atalii i toe sauniga o lona tina, ae sa ia maua se tali e faapea, e le mafai e le pule o le falepuipui po o le Komesina ona tatalaina i tua se pagota, se’i vagana o se poloaiga e tuuina mai i le Faamasinoga.

 

E tusa ai o se ripoti na maua e le Samoa News, na teena e le pule o le falepuipui ia Lumana’i Maifea talosaga a alii pagota ina ia tatala i laua i tua e auai i sauniga faapitoa a o la aiga i le faaiuga o le vaiaso na te’a nei, peitai na talia e le komesina le tumau.

 

Ina ua fesiligia e le Samoa News ia Maifea i le aso ananafi pe faamaonia e to’alua pagota na tatala i tua e auai i sauniga faapitoa a o la aiga, na tali Maifea, “fesili ia Laumoli,” ae ina ua toe fesiligia pe moni sa ia teena talosaga a alii pagota ina ia tatala i laua i tua ae na talia e Leseiau, na toe tali Maifea, “e leai sa’u tali ae fesili sa’o pea ia Leseiau.”

 

Na faailoa mai e se tamaitai loia e galue i le Ofisa o le Loia Sili, i le Samoa News e faapea, e le tatau ona tatalaina i tua e le komesina se pagota o lo o tuli sona faasalaga, sei vagana ua tuuina mai se poloaiga a le faamasinoga.

 

O Agasiva ma Manu o lo o tuli a laua faasalaga faafalepuipu i le taimi nei ona o moliaga na ta’usala ai i laua e le faamasinoga i ni tausaga ua mavae.