Ads by Google Ads by Google

Fesiligia Fono $2.4 miliona o lo o aitalafu ai le malo LBJ

Na tele fesili mai le Fono Faitulafono i le vaiaso ua te’a i le taimi o le iloiloga a Komiti o le Soifua Maloloina a maota e lua ma le pulega a le falema’i o le LBJ, pe aisea ua le totogiina atu ai e le malo le $2.4 miliona mai le lafoga o totogi e 2% ua uma ona faatulafonoina mo le falema’i.

 

Sa fesiligia e sui o komiti a le Fono sui o le pulega a le falema’i i le tupe o lo o maua mai i le lafoga 2%, po o mafai ona fesoasoani e faatino ai ni isi o auaunaga a le falema’i, e aofia ai ma le faatupeina o le polokalame lea e auina atu ai gasegase i fafo mo togafitiga.

 

Na taua e Mase Akapo le taitaifono o le Komiti Faafoe a le falema’i i luma o le komiti a le Senate e faapea, talu mai le 2012 na pasia ai le tulafono e oo mai i le masina o Setema 2013, e na o le $500,000 ua maea ona totogi atu e le malo i le falema’i, toe $2.4 miliona le tupe o lo o totoe.

 

Ae ina ua fesiligia e le komiti a le maota o sui le tofa Mase, sa ia taua ai e faapea, e $589,000 le tupe lea ua maea ona totogi atu.

 

Na taua e le afioga i le alii senatoa ia Magalei Logovi’i, lea fo’i sa avea muamua ma Teutupe a le malo i le nofoaiga a Togiola e faapea, e le tatua ona tupu se faaletonu faapea o le taofi e le malo o le tupe e maua mai i le 2% e le tuuina atu i le falema’i, aua o le tulafono ua uma ona pasia, e tatau fo’i i le malo ona aloaia le tulafono.

 

Saunoa Magalei e faapea, o le tulafono ua uma ona pasia, a uma ona totogi le aitalafu e $3 miliona sa tuuina atu i le LBJ mai le lafoga e 2%, o le tupe e totoe ai e tuuina atu uma e fesoasoani ai i le atina’eina o le falema’i, ma o lona vaevaeina, o le isi 50% e alu i le faatautaiga a le falema’i, ae o le isi 50% e alu i le polokalame o le ‘off-island referral’.

 

Na lagolagoina e le afioga i le alii Senatoa ia Laolagi Fonoti Savali Vaeao le finagalo o Magalei. Saunoa Laolagi e faapea, e taua tele i le Fono le auaunaga a le falema’i mo le atunuu, o le mafuaaga fo’i lea na pasia ai e le Fono le paketi atoa a le falema’i sa tuuina atu e aunoa ma le aveesea o se isi vaega, ona o le naunau o le Fono ia mafai e le falema’i ona toe faa faigaluega ni isi foma’i mai fafo e fesoasoani i le tausiaina o le soifua maloloina o tagata.

 

O le faamaoniga o lea saunoaga mai ia Laolagi, sa ia taua ai le $17 miliona lea ua maualuga ai le Paketi a le LBJ mo le tausaga tupe lenei 2014, nai lo le tausaga tupe e 2013. Saunoa fo’i Laolagi e faapea, i le tausaga tupe e 2013, e $21 miliona na pasia mo totogi o tagata faigaluega, ae o le tausaga tupe lenei 2014, ua sii i le $28 miliona.

 

“O le ata lena o le naunau o le Fono e faaleleia le tautua a le falema’i ma ia lava tupe e faatino ai lana auaunaga mo le atunuu,” o le saunoaga lea a Laolagi.

 

Saunoa Soliai Tuipine Fuimaono i sui o le falema’i e faapea, na mafua ona talia e le Fono le paketi atoa a le falema’i na tuuina atu, o le naunau ia toe faa faigaluega nisi foma’i e vaaia le soifua maloloina o le atunuu, ae le o le faa faigaluega ai o isi tagata faigaluega.

 

Na faamaonia e Mase i luma o le komiti a le Senate, talu mai le amataga o le tausaga tupe 2014, ua to’a 19 tagata faigaluega fou ua faa faigaluega e le falema’i, ma o i latou ia e aofia ai tagata e to’atolu ua faa faigaluega i le Vaega o Tagata Faigaluega (HR) a le falema’i.

 

Ae na faamanino e le Teutupe le tumau a le LBJ ia Emau Amosa Sr ina ua fesiligia e afioga i faipule e faapea, o le suiga lea ua faia e le Teutupe a le malo mo le $2.4 miliona o lo o totoe, ua totogi ta’i $63,000 atu e le teutupe i piriota totogi ta’itasi a le malo, ona o le manatu ia mafai ona fesoasoani lea vaega tupe i le auaunaga a le falema’i.