O se tasi o mataupu na aofia i le iloiloga a le maota o sui ma le Matagaluega o Galuega Lautele a le malo i le vaiaso na te’a nei, o tulaga i tupe ma galuega o le galulolo o le 2009 o lo o totoe e le i mae’a, lea na fesili i ai le afioga i le ali’i faipule mai Aua ia Faimealelei Anthony Fu’e Allen.

E le gata sa fesiligia e Faimealelei le aofa’i o le tupe mo galuega o le galulolo na tu’uina atu i le Ofisa o Galuega Lautele a le malo, ae sa ia fesiligia fo’i le aofa’i o le tupe ua alu i galuega ua mae’a, ma le tupe o lo o totoe mo galuega e le i mae’a.

Saunoa le sui fa’atonusili o le Ofisa o Galuega Lautele ia Fa’alavai Taase e fa’apea, e ui e le o mautu mai le aofa’i o galuega o le galulolo o lo o totoe e le i mae’a, ona e le i mae’a ona fai tauofoga ma tusia ata o ni isi o galuega, peita’i e silia i le $10 miliona le tau atoa o galuega o lo o totoe.

E tele galuega na amata fuafua mai i le taimi na mae’a ai le galulolo e o o mai lava i le taimi nei e le i fa’atinoina, e pei ona fesiligia e faipule ina ua mae’a ona fa’amanino e le susuga a Taase.

O ni isi o nei galuega e aofia ai le fa’aleleia o auala, fausiaina o auvai ma taligalu, atoa ai ma le fa’aleleia o auala tua o lo o uia e nuu ma itumalo eseese.

Na fa’aleo e ni isi o faipule o latou finagalo fa’asea i le umi tele o fa’atali itumalo mo le fausiaina o galuega nei o le galulolo, a o lenei lava ua silia i le lima tausaga talu ona tuana’i le galulolo.

Saunoa le faipule fou mai le itumalo o Manu’a #1 ia Vesi Talalelei Tautanu e fa’apea, o le fa’afitauli numera tasi ua maitauina o lo o mafua ai ona telegese le fa’atinoina o galuega a le malo, e le gata e le o lava mea faigaluega e fa’atino ai galuega, ae tuai fo’i ona taunu’u mai mea e fa’atino ai galuega.

Ina ia mautinoa e saogalemu tagata o le atunu’u pe a toe tula’i mai se isi galulolo i le lumana’i, na talosagaina ai e Vesi le tatau lea ona fa’aleleia auala tua o lo o fa’aaoga e nu’u e ui ai i taimi e tutupu ai faalavelave fa’alenatura i le atunu’u.

“O inivesi lelei lea ma aoga mo le malo o Amerika Samoa, o le fausia lea ma fa’aleleia auala tua ina ia mautinoa e malu puipuia soifua o ona tagata, aemaise lava i nuu ma itumalo e tu matafaga”, o le saunoaga lea a Vesi i molimau.

Na fa’amanino e le susuga a Ta’ase i le maota o sui e fa’apea, o lo o silafia e le matagaluega tulaga fa’aletonu o lo o tula’i mai i auala ma manaoga eseese i totonu o le atunu’u, peita’i o le fa’afitauli numera tasi o lo o fetaia’i ma le malo, o le leai lea o se vaega tupe e fa’atino ai galuega o lo o talosaga mai ai nu’u ma itumalo taitasi.

Sa ia molimau e faapea e na o le ta’i $4 miliona tala o lo’o maua mai e le malo i le polokalama o auala a le fetarale i tausaga ta’itasi.

O isi galuega tetele mo auala, taligalu ma auvai o lo o taumafai le malo e fa’atino e pei ona saunoa Ta’ase, e aofia ai le alu atu i Lauli’i e o o i Fagaitua i le itu i Sasa’e, fa’apea ai Futiga e o o atu i Leone i le itu i Sisifo.

O le galuega i Failolo e o o atu i Afao lea e silia i le $1 miliona lona tau aofa’i, e le o toe mamao ae mae’a loa gaioiga o lo o fa’agasolo ae amata loa le galuega.

O le galuega o le auala i le falema’i i Fagaalu lea ua fa’amoemoe e soso’o, pe a mae’a le galuega o le auala i le malae va’alele.

I luma o le maota maualuga i le vaiaso na te’a nei, na tula’i ai le afioga i le ali’i senatoa ia Tuiasina S. Esera ma talosaga i le komiti o galuega a le senate, e silasila toto’a i le tulaga pagatia ua i ai auala i so o se vaega o le atunu’u.

Saunoa le ali’i senatoa e fa’apea, e le mafai e le malo ona fa’atupe vaega o ta’avale a tagata o le atunu’u o lo o leaga pea i le tele o aso, ona o tulaga fa’aletonu o auala, e le gata i le omoomo ma le lau leaga, ae a o o foi i le po e tau le iloa laina o lo o vaelua tutusa ai itu e lua o le auala.

O le aso Tofi o le vaiaso nei lea ua fa’atulaga e faia ai le iloiloga a le maota maualuga ma le pulega a le Ofisa o Galuega Lautele a le malo, ona o fa’asea ma faitioga e tusa ai o tulaga fa’aletonu o lo o i ai auala i le atunu’u.