E i ai nisi sa fa’asea e aofia ai ma le Matagaluega o Fefa’ataua’iga, ona o le fa’atau o meleni a se tasi mai Tonga i autafa o le alatele i Nuuuli. O lea fa’asea sa fa’atutu i le Fa’atonu o Fa’ato’aga, Lealao Melila Purcell, lea sa ia tu’uina le fa’atagaga i lea fo’i fa’atauga.

O le fa’asea mai le Matagaluega o Fefa’ataua’iga, o lo’o fesiligia ai pe i ai se pemita pe totogia se laisene mo fefa’ataua’iga o nei fua o fa’aeleeleaga mai Tonga e fa’atau ai i autafa o le alatele.”

O le isi vala o lea lava gaoioiga mai le Matagaluega o Fefa’ataua’iga, sa fa’ailo atu ai i le sui o faia nei fa’atauga, “E le o fa’atagaina ni fua o fa’aeleeleaga mai nisi malo e fa’atauina i autafa o alatele, na’o le fa’atagaga o i ai, e mo faifa’ato’aga o toto a latou fa’ato’aga i Amerika Samoa nei.”

Ina ua fesiligia le Fa’atonu o Fa’ato’aga i lea mataupu, ae fa’ailoa mai e ia, “O lo’o ia fa’atagaina le meleni mai Tonga e fa’atau i maketi i autafa ane o le alatele i Nuuuli, ona o lona naunauta’i ia aoga nei fua o fa’ato’aga, ma o mea ‘ai e paleni ai le soifua maloloina o tagata lautele. E leai nisi fua o fa’aeleeleaga o fa’atagaina e pei o talo ma ufi. Na’o Meleni lava”

Pe a tu’u i nisi fa’asea lea e fa’apea ai o le vala o le tulafono ua solituina i lea fa’ataga, ae fa’ailoa mai e le Fa’atonu o Fa’ato’aga, “o lo’o fa’atagaina lea tulaga e faia mo sina taimi pu’upu’u lava, se’i toe fa’aa’e mai le Maketi a Tonga i le latou eleele mai Amerika Samoa i Tafuna, ona taofia fo’i lea o lea fa’atagaga.”

O le vala o le tulafono lea e talanoa aga’i i ai le fa’atonu o fa’ato’aga, o le vaega lea e fa’apea ai, “E na’o faifa’ato’aga Amerika Samoa e mafai ona fa’ataua a latou fua o fa’ato’aga i autafa o le alatele e aunoa ma se laisene pisinisi.”

Ina ua fesiligia, pe ua tapunia le maketi a Tonga, ae fa’ailoa mai, “O tausaga ta’itasi e toe tauofo ai tagata ma kamupani i le Malo Tonga mo se tasi e fa’atautaia pisinisi ma fefa’ataua’iga i totonu o le eleele i Amerika Samoa nei, o lea la e le’i mae’a fa’ailo mai le i’uga tamau o lea fo’i sailiga, a maua, ona fa’alauiloa fo’i lea mo isi uma vaega o tautua sa masani ona o’o atu ai nisi i le latou eleele mo fefa’ataua’iga i Tafuna.”

Ina ia le manumanu nei mea’ai aoga mai le maumau, ua i ai le fa’atagaga a le Fa’atonu o Fa’ato’aga e fa’atau mai ai i lea maketi i autafa o le alatele i Nuuuli.