Ads by Google Ads by Google

Fesiligia e le Fa’amasinoga auala saili ai Leoleo fualaau fa’asaina


[ata: SN]
ausage@samoanews.com

O le teena ai e le Fa’amasinoga Fa’aitumalo o le mataupu na tu’uaia ai se ali’i talavou, i lona umia lea o vaega o le pauta fa’asaina o le aisa, ua atagia mai ai le fesiligia e le Fa’amasinoga o le auala o lo o fa’atautaia ai e Leoleo la latou galuega, mo le sailia lea o vaega o fualaau fa’asaina i totonu o le atunu’u.

 

E ui o lo o tu’uaia e le malo i le latou tagi fa’asaga ia Methodist Kuka Mika, le maua i ai e Leoleo o vaega o le pauta fa’asaina o le aisa, peita’i i le silasila a le Fa’amasinoga e pei ona taua e le afioga i le ali’i Fa’amasino ia Fiti Sunia i lana fa’aiuga, o le auala na fa’atino ai e Leoleo la latou sailiga, ua atagia manino mai ai le soli ai o aia tatau o Mika o lo o sipela mai e le Fa’avae a Amerika Samoa.

 

Ona o lea tulaga, na faia ai loa e Sunia le fa’aiuga ina ia teena le tagi faasaga ia Mika i le vaiaso nei, i le mae’a ai lea ona fa’afofoga o le Fa’amasinoga i le molimau tauto mai le ali’i Leoleo sa autu i ai le su’esu’eina o le mataupu a Mika, susuga Lt. Tolia Solaita Jr, o ia lea o le Sui Ta’ita’i o le Vaega Faapitoa a Leoleo o lo o sailiga Fualaau Fa’asaina (Vice & Narcotics Unit).

 

Na tu’uaia e le malo ia Mika i le moliaga mamafa o lona umia fa’asolitulafono lea o vaega o le pauta fa’asaina, le ituaiga o le aisa. O lea solitulafono, e mafai ona fa’asala ai se tasi i le toese mo le umi e le silia i le 5 tausaga, poo le fa’asala i le salatupe e le silia i le $5,000, poo fa’asalaga uma fo’i ia e lua.

 

I le ulua’i iloiloga o le mataupu a Mika sa faia i le vaiaso nei, na iloilo ai e le Fa’amasinoga mau a le malo, pe lava ma totoe e lagolagoina ai tu’uaiga fa’asaga ia Mika.

 

Na taua e le ali’i Leoleo ia Lt. Solaita Jr e fa’apea, i le po o le aso 12 Setema na te’a nei, na taofia ai e Vaega Faapitoa a Leoleo se ta’avale i luma o le malae taalo i Tafuna (Veterans Stadium), ina ua molimauina le leotele o le leo o le mafa.

 

I totonu o le ta’avale, sa i ai le ali’i ave ta’avale, fa’apea ai ma Mika o lo o nofo i le nofoa o le pasese. E 3 ta’avale Leoleo, o Leoleo e to’a 6 ma le ta’ifau mai le vaega a le K-9 na aofia uma i le taimi na taofia ai le ta’avale sa malaga atu ai Mika ma le ave ta’avale.

 

I le taimi na taofi ai e Leoleo le ta’avale, na aga’i atu ai le Ta’ita’i o le Vaega Faapitoa a Leoleo, susuga Captain Lima Togia ma talanoa i le ave ta’avale, ae o Lt. Solaita Jr na talanoa ma Mika i le itu o le pasese.

 

Na taua e Lt. Solaita Jr i lana molimau e faapea, a o la talanoa ma Mika, o le taimi lea na alu atu ai le ta’ifau faapitoa a Leoleo ma sogi sogi fa’ata’amilo i le tino o le ta’avale. E le i umi ona ta’amilo le ta’ifau ae vaaia loa lona fa’ailoa atu o se fa’ailoilo e ta’u atu ai i Leoleo, o lo o i ai fualaau fa’asaina i totonu o le ta’avale. O le taimi lava fo’i lea na fa’atonuina ai loa ia Mika ma le ave ta’avale e o i fafo o le ta’avale ae se’i fa’aauau le sailiina o totonu o le ta’avale.

 

E le i maua e Leoleo ni fualaau fa’asaina i totonu o le ta’avale. Ae ina ua sailia le tino o Mika, sa maua ai se paipa e ula ai le aisa, fa’atasi ai ma se pepa iila o lo o i ai vaega o le pauta pa’epa’e sa i totonu o le taga o lona ofuvae sa fai. Na faia se suega i le pauta pa’epa’e ma fa’amaonia ai, o vaega ia o le pauta fa’asaina o le aisa.

 

Ina ua fesiligia e Leoleo poo ai e ana fualaau fa’asaina, na ta’utino Mika, o meatotino uma a ia sa maua i le taga o lona ofuvae.

 

Na finau le loia a le malo ia Christy Dunn e fa’apea, na malie atoatoa Mika e su’e e Leoleo lona tino. Ina ua maua fualaau fa’asaina ia te ia, sa ia ta’utino i Leoleo o ana meatotino ia. I lona talitonuga, sa tusa ma le tulafono le auala na taofia ai e Leoleo le ta’avale na malaga ai Mika, lea na mafua ai ona maua e Leoleo fualaau fa’asaina ia te ia.

 

Ae na finau le loia a Mika ia Ryan Nelson e fa’apea, o le gaioiga sa faia e Leoleo, na matua atagia mai ai le a’afia o aia tatau o Mika i lalo o le Faavae. E talitonu Nelson, e leai se Leoleo e agava’a i le iloiloina o le ituaiga leotele e tatau ona leotele ai le mafa o le ta’avale. Na fa’ai’u lana folasaga i lona talosagaina lea o le fa’amasinoga ina ia fa’aleaoga le tagi fa’aaga ia Mika, lea fo’i na talia e le Fa’amasinoga.

 

Saunoa Sunia e fa’apea, o le gaioiga a Leoleo sa faia, i le o atu uma lea o Leoleo e to’a 6, o ta’avale Leoleo e 3 atoa ai ma le ta’ifau i le taimi na taofi ai le ta’avale na malaga ai Mika, o le ata vaaia lea o le latou fuafuaga e taofi le ta’avale ae saili pe maua i ai ni fualaau fa’asaina.