E toatolu ni tagata faipisinisi mai Samoa na malaga mai i le Lady Naomi i le vaiaso nei, ua latou fesiligia le mataupu e faatatau i le pemita e 14 aso, po o afea e amata faamamalu ai le faiga fou lea na malilie i ai taitai o malo e lua, e le toe talosagaina e tagata mai Samoa lea pemita pe a fia ulufale mai i le teritori.

E ui e leai se tasi o i latou na manatu e faalauiloa o latou suafa, ona o manumanuga i le ono avea ma auala e faa faigata ai ona talia ni a latou talosaga mo ni isi pemita i le lumana’i, peitai sa latou faailoa i le Samoa News i le vaiaso nei e faapea, ua tatau ona amata faamamalu e Amerika Samoa lea tulaga ina ia fesoasoani ai ia i latou o lo o malaga mai i vaiaso taitasi mo mataupu tau pisinisi.

“Sa faapea lava a’u e oo mai i le taimi nei ua le toe tau faia ni talosaga mo le pemita 14 aso, ae ua ou te’i ina ua ou maua le tala i Apia ananafi, (aso Lua na te’a nei), o lo o fai pea talosaga mo le peita,” o le saunoaga lea a le isi o le toatolu.

Sa ta’ua e lea sui, o vaiaso uma lava, e malaga mai mo le aumaia o ana oloa e faatau i Amerika Samoa nei, faatasi ai ma lana faatau mo oloa e ave i lana pisinisi i Apia.

Sa ia taua e faapea, o le fa ai lenei o tausaga o ia faia lenei pisinisi, o le mafuaaga foi lea ua ia lagolagoina ai le faaiuga e faaagafua talosaga mo le pemita 14 aso, ona ua mamafa tele foi lea avega mo ia.

“Talu lava ona maea le fonotaga a le Palemia ma le Kovana, o lea lava ou te talosaga mo so’u pemita 14 aso, faapea a’u e oo mai i le taimi nei ua le toe faia ni talosaga ae ua faaaoga le faaiuga na malilie i ai malo e lua,” o le tala ata lea a le isi tina faipisinisi mai Apia.

O le faaagafuaina o talosaga mo le pemita 14 aso, o se tasi lea o mataupu na faaiugafonoina i le fonotaga a taitai o Samoa e lua, lea na usuia i le amataga o le masina nei, i le maota o Tauese P.F Sunia i Utulei.

O le faaiuga sa faia e le kovana sili ia Togiola Tulafono, ma le palemia o Samoa ia Tuilaepa Lupesoliai Sailele Malielegaoi, e le toe tau talosaga mai tagata Samoa i le pemita 14 aso, ae o le a malaga mai lava iinei, ona faatoa tuuina atu lea i ai o le pemita i le taimi lava e taunuu mai ai i le malae vaalele poo le uafu foi.

E le’i maua se avanoa e fesiligia ai le afioga i le Loia Sili ia Fepulea’i A. Ripley mo le tau faapupulaina o lenei mataupu, peitai na taua e se sui o le Ofisa e le faatagaina ona talanoa i tusitala i mataupu faapenei, ua i ai le faamoemoe o le faaiuga o le tausaga lenei o le a amata faamamalu ai loa lea tulaga.

Fai mai le molimau, e tatau ona mautu muamua masini komipiuta e faaaoga e le Ofisa o Femalagaaiga, ina ia faa faigofie ai ona faia ana faamaumauga mo le tuuina atu o pemita nei i tagata faipisinisi o le a talosaga mai.