Ads by Google Ads by Google

FESILIGIA ATUNUU FAAMAONI O LE ASPA I ANA FOLAFOLAGA

O le mataupu lea na fesiligia ai e Senatoa Velega Savali Jr le Pulega a le Faalapotopotoga o le Eletise ma le Suavai, i lo latou le tausisia lea o a latou folafolaga sa faia, i le ono maua lea o se faamama avega mo le pili eletise a le atunuu, pe afai ae maea ona totogi le latou aitalafu e $2.8 miliona, ona lagalaga ai nisi o finagalo o le atunuu ma o latou fesiligia ai le faamaoni o le ASPA i ana folafolaga ua maea ona tuuina atu i le Fono.

Na taua e nisi o tagata totogi pili o le atunuu i le Samoa News, afai ua maea ona folafola e le ASPA i le Fono sa latou faaiuga i lo latou tuuina mai lea o se faamama avega i pili eletise, pe afai e maea ona toe totogiina tupe sa latou nono e faatau mai ai le suauu i le atunuu, o lona uiga e tatau lava ona latou savavali e tusa ai o ia folafolaga.

“E le tatau i le ASPA ona latou faia ni gaioiga e laa ese mai ai i folafolaga sa latou tuuina atu i le Fono e uiga i se fesoasoani e maua e le atunuu, pe afai e maea ona totogi le latou aitalafu e $2.8 miliona i le faletupe, aua o sui o le fono o i latou ia o loo fai ma leo o tagata o le atunuu i le Fono, afai la ua folafola e le ASPA i le fono lea tulaga, o le atunuu lava lea ua latou folafola i ai,” o le saunoaga le fiafia lea a le tama ia Tamafili Auseuga, o se tama e galue i se tasi o Ofisa o le malo.

O le finagalo fa’aalia foi lea a le afioga i le alii faipule ia Puletuimalo D. Koko,  atoa ai ma nisi o tamali’i e to’alua sa avea ma faipule o le Fono i ni nai tausaga e lei mamao atu.

Saunoa le alii faipule ia Puletuimalo, ua manaomia e le atunuu se faamama avega mai pili a le ASPA lea ua maitauina le siitia maualuga i le taimi nei.

Saunoa Senatoa Velega, i se tusi sa tu’uina atu e le ASPA i le Fono ia Setema 2009 na taua ai e fa’apea, afai e maea ona totogi le latou aitalafu e $2.8 miliona, lea sa fai e totogi ai le aumaia o le suau’u i le teritori, ona toe fa’asoa atu loa lea i le atunu’u o se vaega tupe latou te faasaoina mai ai i lea teugatupe.

O le masina o Setema 2011 na maea ai le totogia atu o lea nonogatupe, ma e oo mai lava i le taimi nei e pei ona saunoa Velega, e lei faataunuuina e le ASPA la latou folafolaga sa tuuina mai, ae o lea ua toe faia le isi a latou siitaga i pili o le uila ma le suavai.

Na faamanino e le pulega a le ASPA e faapea, e le na o le tasi le latou aitalafu o loo tau totogi i le taimi nei, ma ua i ai le fuafuaga sei vagana ua uma ona totogi aitalafu e tolu o loo i ai, ona faatoa mafai lea ona faasoa atu i le atunuu se vaega o le paleni e maua mai ai e fesoasoani ai i le pili o le uila.

Na molimau Susana Faiivae, o ia lea o lo o fa’auluulu i ai le vaega o tupe a le ASPA e faapea, ina ua maea ona totogi le aitalafu o loo fesiligia, ona alo atu loa lea o le ASPA e totogi le isi aitalafu e $1miliona, lea sa faaaoga e faatau mai ai nisi o mea faigaluega e faaaoga mo galuega a le ASPA e aofia ai taavale ma masini, ma o lea nonogatupe o loo faamoemoe e tatau ona maea lona totogiina i le masina lenei, ona totoe ai loa lea o le aitalafu e tasi e $7.2 miliona sa fai ia Ianuari 2009, lea ua toe $5.8 miliona o loo totoe.

Saunoa Velega, o le faafitauli lea ua tulai mai i le mataupu lenei, e foliga mai e eseese le auala o loo faauigaina ai e le ASPA lana tusi sa tuuina mai i le Fono, ese le auala lea o loo silafia e le fono.

Saunoa le alii faipule ia Simei Pulu, e tatau ona toe iloilo manino e le Fono le tulaga o le mataupu lenei, ina nei manatu mama i ai le pulega a le ASPA ae le iloa o loo pagatia ai le atunuu.