O se tasi o vaega sa mafuli i ai fesili a afioga i senatoa ma faipule ina ua latou fesiligia le Paketi a le Ofisa o Turisi, mo le tausaga tupe fou 2016, o le sao lea o le Ofisa o Turisi i le tamaoaiga o le malo i le itu tau tupe.

Na taua e sui o le Komiti Soofaatasi a le Fono e fa’apea, e tatau ona fa’amanino mai e le Ofisa o Turisi tupe o lo o maua mai i Va’a Meli o lo o aga’i mai i le atunu’u, atoa ai ma le aofa’i o turisi o lo o asia Amerika Samoa, ina ia malamalama ai le Fono i le fesoasoani a lea Ofisa i le atina’eina o le tamaoaiga o le malo.

E $751,500 le aofa’i o le paketi a le Ofisa o Turisi lea ua fa’atulaga mo le tausaga tupe fou 2016 mo tagata faigaluega e to’a 6, tusa lea ua fa’aitiitia mai le aofaiga e $835,000 o lo o i ai lana paketi mo le tausaga tupe 2015.

O le afioga i le ali’i faipule ia Larry Sanitoa na fesiligia se tupe o loo fesoasoani ai le Ofisa o Turisi i le atina’e o le malo, e ala i le aofa’i o va’a meli ma turisi o loo aga’i mai i le atunu’u, pe a fuafua atu i le latou anavatau o lo o tusia i totonu o le latou paketi, fai mai o le latou faanaunautaiga, o le fesoasoani lea i le fa’atuputeleina o le atina’e turisi i le teritori, ma fesoasoani i le atina’eina o pisinisi tua, toe maua ai fo’i ma galuega.

Na taua e le Pulesili o le Ofisa ia David Vaeafe e fa’apea, e faigata tele ona tupu le atina’e o turisi i Amerika Samoa, ona e le o lelei ni auala o femalagaaiga e pei o va’alele, ae afai fo’i e manatu Amerika Samoa na te fa’atautaia sana lava kamupani va’alele, o se tulaga e sili atu lea ona taugata ma faigata fo’i.

Saunoa atili Vaeafe e fa’apea, o se tasi o fa’afitauli o lo o fetaia’i ma Amerika Samoa, e le gata o lo o si’omia e ni isi o atunu’u o lo o tupu lauolaola ai le atina’e turisi, ae faigata fo’i ona latou talia ni fesoasoani tupe mai isi atunu’u e fesoasoani ai i le atina’e ma le fa’aleleia atili o le atina’e turisi i le atunu’u.

O tagata fagaluega e to’a 6 a le Ofisa o Turisi, o le to’afa o i latou o lo o i lalo o galuega fa’a konekarate, ae o le isi to’alua o tagata faigaluega tumau a le malo.

Na fesili le afioga i le ali’i senatoa ia Magalei Logovi’i, pe agava’a o ia ma isi tagata faigaluega e to’atolu o loo i lalo o konekarate i fa’amanuiaga o totogi tului mo le tausaga (increment), ae na tali le molimau, “ioe, o le isi lena vaega o a matou konekarate.”

Saunoa Magalei, i lalo o le tulafono, e na o tagata faigaluega lava a le malo e agava’a i “increment”, ae le a’afia ai fua tagata o loo fa’akonekarate.

E to’afa sui o le komiti soofaatasi sa latou taua le maoa’e o le totogi a Vaeafe, lea o lo o fa’atulaga mai i le $85,000 i le tausaga.

“E fai lava si maoa’e o lou totogi, ae a fuafua atu i galuega o lo o fa’atino e lou ofisa, ona tu’u fesili ai lava lea o le manatu, aua o le mea moni, o lo o ‘ai uma i totogi o tagata faigaluega tupe a le malo, ae leai ni tupe o fa’aalu e atina’e ai le itu tau turisi i le atunu’u, aemaise lava mo le motu i Manu’a,” o le saunoaga lea a Faletagoa’i I. Tuiolemotu.

Ae na saunoa Vaeafe e fa’apea, o lo o i ai pea lava le fa’anaunau e fia fa’aleleia le atina’e tau turisi i Manu’a, ae o le fa’afitauli o femalagaaiga, ae na saunoa le faipule mai Manu’a ia Vesi T. Fautanu e fa’apea, e le sa’o lea alofaga fa’apea o auala o femalagaaiga e mafua ai ona faigata le atina’eina o turisi i Manu’a.

Na fa’atepa e Vesi ia Vaeafe i le va’alele o le Polenisia lea ua lele i le vaiaso atoa i Manu’a, lona uiga la, e le tatau ona toe i ai se alofaga i le faaletonu o femalagaaiga i Manu’a, aua o lea lava o lo o lele le va’alele i aso uma.

O le $20,000 o lo o fa’aalu e totogi ai le fale o lo o fai ma ofisa o Turisi, atoa ai ma le $17,000 o lo o totogi ai le fale mo le Pulesili o le Ofisa, o ni isi ia o vaega tupe sa fesiligia e le komiti soofa’atasi.

Saunoa Puleleiite Tufele Li’amatua e fa’apea, e tatau lava ona saili se isi ofisa o le malo e fa’aaoga e le ofisa o turisi, ina ia fa’asao mai ai le $20,000 o loo totogi mo le rent e faatino ai ni isi atina’e, ae na saunoa Vaeafe, ua le o toe i ai se ofisa o le malo o avanoa i le taimi nei mo i latou, ua utiuti fo’i avanoa o fale a le malo.

Ae ina ua fesiligia e Tuaolo M. Fruean le mafua’aga ua totogi ai le $17,000 i le tausaga mo le fale o le ali’i pulesili, ae o lo o i ai isi fale taugofie ta’i $5,000 i le tausaga, na tali le susuga Vaeafe, o le fale lava na filifili e le Komiti Fa’afoe, o se vaega lea o lana konekarate.

O ni isi o vaega tupe sa fesiligia e le komiti soofaatasi, o tupe o lo o fa’aalu i le fa’alauiloaina ma le atina’eina o turisi i fafo, ao lea lava e le o i ai ni suiga ua vaaia i le atunu’u talu mai tausaga e tele o fa’atino nei fonotaga.

Ui i fa’asea ma fesili mai sui o le komiti, ae sa fa’afetaia e le komiti galuega lelei o lo o fa’atinoina e le Ofisa o Turisi, i le fa’aleleia o le atina’e tau turisi i le atunu’u.