Mo le aoina o le otaota, sa fesiligia ai le ASPA pe aisea o le a toe fa’aopoopo ai fo’i le isi si’itaga i le lapisi e aoina mai kamupani, ae o le taimi nei, o lo’o maualuga pea le totogi o lea auaunaga.

 O se tasi o le au faipisinisi sa ia fesiligia lea tulaga, ma sa ia fa’ailoa fo’i, “O le tau o la’u auaunaga e le’i si’itia lava mo le 10 ai lenei o tausaga, talu ai le manatu i le lima vaivai o aiga o le atunu’u, peita’i, afai e si’itia le pili lea a le ASPA, o le a taumafai fo’i la lo’u sui e si’itia le tau o la’u ia auaunaga.”

O le fesili e tusa ai o le suavai taumafa ma le tele o vaila’au ua tu’uina i ai, ma ua le gafatia ai ona toe inumia e le mamalu o le atunu’u e alaala i le afio’aga o Aua. Ua le mautinoa pe o le tele o le suasami po’o vaila’au ua afua ai lea tulaga, ae o le a toe si’itia fo’i lea auaunaga.

O le tali a le ASPA, ua tele le pasene o le suasami i le punavai i Aua lea e ta’i mai ai paipa a le ASPA mo le afio’aga lea, ma o le mafuaga lea o le toe taumafaiga ia fa’aleleia atili le suavai taumafa i nei afio’aga e fa’aaogaina lea punavai mo le latou sapalai o le suavai mama.

O fesili sa fa’atutu e fa’atatau i le totogi fa’ae’e o le a tu’uina atu i aiga o le a fa’apipi’ia latou panele e fa’aaoga ai le La mo le latou sapalai o le eletise. E le’i i ai se fa’atulagaga a le ASPA peita’i, ua fa’ailoa mai o le a fa’atagaina e le ASPA le 30 kilouati o le eletise mai le la mo aiga ta’itasi, ae a sili atu e ao ina fa’aaoga, e fa’auia uma lea mo laina a le ASPA e fesoasoani i le fa’ateleina o le eletise e fa’aaoga mo le lautele.

Ina ua fesiligia fo’i, pe mafai ona fa’atau motu e le aiga le mita e aunoa ma se toe aia i ai a le ASPA, ae sa fa’ailoa mai e le mafai.

Na taua’aoina foi e le ASPA vaega o le tulafono ua mae’a tamau ai, e mafai e le ASPA ona si’itia le totogi o latou pili eletise, suavai taumafa, suavai lafoa’i ma le aoina o le otaota i so’o se vaitaimi lava ua alagatatau ai ona faia e i latou lea tulaga ia mautinoa ai le lelei a’ia’i o le auaunaga ma ia le motusia ona ua le lava le totogi e fa’atautaia ai.