Ua fesiligia e le afioga i le ali’i senatoa ia Galea’i M. Tu’ufuli le saogalemu o tupe a le malo lea ua fa’amoemoe e fa’atupe ai le Faletupe fou lea ua fuafua le malo e fa’atulai i se taimi o le tausaga nei.

“E sili ai le ave o le $10 miliona lea ua fuafua le malo e fa’atupe ai le faletupe fou lenei (Charter Bank) e inivesi i le faletupe lea o lo o galulue i ai ni isi o le aufaipisinisi i le atunu’u e fa’atula’i, le Community Bank of Amerika Samoa, atonu e aoga ma malupuipuia ai tupe a le malo nai lo le ave e fa’atupe ai le faletupe fou lea ae le o mautinoa pe malupuipuia”, o le saunoaga lea a Galea’i i le taimi o folafolaga a le maota maualuga ananafi, ina ua tula’i le afioga a Laolagi Fonoti Savali Vaeao ma folafola le iloiloga a le Komiti o le Paketi a le maota, e talanoaina ai le pili e fa’atula’i ai le Faletupe fou i le aso Lulu o le vaiaso nei.

O le iloiloga a Laolagi o le a molimau ai le Loia Sili, Teutupe, faapea ai ma le loia fautua a le kovana ia Steve Watson.

Saunoa Laolagi e fa’apea, o molimau e to’atolu ia ua manatu le komiti e valaau mo le iloiloga, o i latou tonu ia o le a maua mai ai e le komiti tali o fesili e fa’atatau i le faletupe lea ua finagalo le malo e fa’atula’i i se taimi o le tausaga nei, peita’i na talosaga le peresetene o le senate ia Gaoteote Palaie Tofau ia Laolagi, e tatau fo’i ona aami ma le Komiti Fa’afoe o le Tamaoaiga o le malo o lo o gafa ma le sailia o pone (ASEDA), o i latou tonu ia e tatau ona malamalama i le tupe o le pone lea o lo o fuafua le malo e fa’atupe ai le faletupe fou lea.

O le afioga i le ali’i senatoa ia Galea’i, o le isi lea totino o le Komiti Fa’afoe o le Tamaoaiga, ae sa ia fa’ailoa i luma o le maota ananafi e fa’apea, e o o lava foi ia te ia o le sui o le komiti o le tamaoaiga, e le o malamalama tele fo’i o ia i le malupuipuia o le fuafuaga a le malo e fa’atula’i le faletupe lenei.

Na fa’amalamalama atili e Galea’i e fa’apea, e tusa ai o fa’amatalaga ua ia suesue i ai i le mataupu lenei, o le puipuia i lalo tulafono a le vaega o Faalapotopotoga o Inisiua a le Feterale mo teugatupe teu i faletupe eseese (FDIC).

“O le faletupe fou lea ua manatu le malo e fa’atula’i, e le gata e le puipuia i lalo o tulafono a le FDIC, ae fa’atapula’a fo’i ana tautua mo le atunu’u, e le tutusa ma le auaunaga a ituaiga faletupe lea e i ai le faletupe a Hawaii, faapea ai ma le Community Bank, lea sa amata tau fuafua mai i le tausaga na te’a nei”, o le saunoaga lea a Galea’i.

O popolega ia Galea’i, afai e le puipuia le faletupe fou a le malo e fa’atula’i i tulafono a le FDIC, e ono fesiligia foi la le malu puipuia o meatotino a le malo o le a tu’uina atu i ai.

Sa ia faailoa i le maota e fa’apea, e taua le fuafuaga a le kovana ma le malo ina ia faatula’i se faletupe e fesoasoani ai i le atunu’u, peita’i i lona taofi, e le tatau ona avea le manaoga ua tula’i mai ma itu e ese ai le silasila a le malo ma le atunuu i tulaga o le malu puipuia o ana meatotino.

Na lagolagoina e le afioga a Gaoteote le finagalo o Galea’i e uiga i le mataupu lenei, i le tatau lea ona silasila toto’a le fono i auala e puipuia ai tupe a le malo.

Saunoa Gaoteote e fa’apea, e le fesiligia le manaoga tele o lo o tula’i mai i le atunuu i le taimi nei, o le manaomia lea o se faletupe na te tautuaina le atunu’u, toe suli tulaga i le faletupe a Hawaii lea ua sauni e tula’i ese, peita’i o le fesili o lo o tulai mai, pe fa’amata o le mea sa’o lea e tatau mo Amerika Samoa.

“Aua le avea lo tatou manana’o i se faletupe ma itu tatou te ioe ai i se mea tatou te le o malamalama lelei i ai, o le fautuaga mo le maota, e tatau ona lava se taimi tatou te sailiili ma talatalanoa ai i le mataupu lenei, ina ia tatou malamalama atoatoa i ai a’o le i faia sa tatou fa’aiuga”, o le fautuaga lea a Gaoteote.

Sa ia fautuaina fo’i le komiti ina ia maua fo’i se avanoa e fesiligia ai i latou sa taumafai e fa’atula’i le Community Bank, po o fea o taoto i ai a latou fuafuaga ma talosaga sa tu’uina atu i le feterale.

O le agaga o le alii kovana e pei ona ia faaalia i le pili tau faaofi lea ua taoto i luma o le fono e faatula’i ai se faletupe fou mo le atunuu, ina ia fesoasoani ai i le manaoga lea ua tula’i mai i le atunuu mo se isi faletupe fou, e sui tulaga i le lala o le faletupe a Hawaii lea ua sauni e tula’i ese ma Amerika Samoa.

O le masina o Iuni 2015 lea ua manatu le malo e tatau ona amata aloaia ai le tautua a le faletupe fou, lea ua fuafua le malo latou te pulea ma faatautaia.

O le aso Tofi o le vaiaso nei lea ua faatulaga e fesiligia ai e le komiti o le paketi a le senate i latou sa taumafai e fa’atula’i le Community Bank.