Ads by Google Ads by Google

Felanulanua’i taumafa eseese na gaosi e le atunuu i le ulu

Na molimauina le felanulanua’i o kuka eseese sa gaosia e ni isi o le atunu’u mai i le ‘ulu, e pei ona va’aia i le fa’aaliga tele sa faia i le maketi i Fagatogo i le aso ananafi, ma tapunia aloaia ai le fonotaga i le va o Samoa e lua, mo le faatauaina o le laau o le ulu (Ulu Summit).

Faatasi ai ma taumafa masani a Samoa lea e fai i le ulu, e pei o le masi ulu ma le taufolo, o isi ituaiga kuka sa va’aia i le aso ananafi, na aofia ai se supo ulu, salaki ulu, panikeke e fai i le ulu, o keke na gaosi i le ulu, o ulu chips faapea ma ulu roll.

I se saunoaga puupuu a le kovana sili, le afioga Togiola Tulafono, i le taeao ananafi, na tomua i sana solo sa faatatau i le ulu na soisoi ai le mamalu o le aofia, “O le ulu e fai ona pulu, a e lamu i ai e pipii i ou nifo e le toe mamulu”.

Na faafetaia e Togiola Ofisa o Faatoaga a Samoa e lua, ona o le faamoemoe ua mafai ai ona tuu faatasia lenei fonotele, ma e i ai lona talitonuga tusa lava pe see ese le tofi kovana, o le a ia fautuaina le Ofisa o Faatoaga ina ia faaauau pea lenei fonotaga i tausaga taitasi.

Na saunoa Togiola, e i ai lona talitonuga o le laau o le ulu, o le laau lava lea a Samoa, ma afai e i ai ni ulu o lo o ola solo i atumotu o le Pasefika, afai ae su’e o latou toto e tupuga uma atu lava i Samoa, aemaise lava i le Ulu Maafala.

Na maofa alii ma tamaitai faamasino i le matagofie o le tofo o taumafa eseese sa kuka e le au kuka lautogia e faaaoga i ai le fua o le ulu.

Sa maua e le Samoa News e talatalanoa ai i ni isi o le mamalu o le atunu’u sa auai i lenei fa’aaliga matagofie, e pei o le tina ia Rosa Sooala mai i Laulii, ma lana kuka o le “breadfruit roll”.  Sa faamatala e lenei tina le ‘recipe’ o lenei kuka, e aofia ai le ulu, fuamoa, sua o le tipolo e palu faatasi, ona tipi lea i ai o le aniani e faamanogi ai, ma falai loa.

“O se tasi lenei o kuka e ese le tofo lelei, sa ou tago faafefiloi le aano o le ulu ma le fuamoa, ona palu faatasi lea ma le sosisi, tatau ai loa ma le sua o le tipolo, tuu ai loa ma le aniani e faamanogi ai ona maua ai loa lea o le breadfruit roll,” o le saunoaga lea a Rosa.

O le kuka a le tina o Talitiga Kuka sa ia saunia ai le ‘panikeke ulu’, lea e faafefiloi faatasi le ulu, fuamoa ma le laupele ona maua ai lea o lea kuka matagofie.

O le alii o Nafatali Timo sa ia saunia le kuka o le ‘supo ulu’, ina ua ia faapuna faatasi fualaau ‘aina e pei o le kapisi, karoti ona tipi lea i ai o le ulu, tuu loa i ai ma fagu faamanogi meaai ona maua ai lea o le tofi lelei.

“E le na o le tasi se ituaiga taumafa e mafai ona faaaoga i ai le ulu, e tele naua, e mafai ona fai ai le supo, salati, falai faapanikeke, po o le avea foi ma teuteu i luga o ipu taumafa pe afai ae tali ni malo,”o le talitonuga lea o Timo.

O isi kuka sa vaaia ai le faafefiloi o le ulu ma le wahoo ina ia maua ai le ‘ulu salad’, atoa ai ma le tuu faatasi o le ulu ma le pisupo ina ia maua ai le ‘ulu balls’.

Ae le tuua ai lava taumafai masani e pei o le Taufolo ma le Masi Ulu e pei ona toatele le atunuu sa lolofi atu mo le fia tofo i ia taumafa a le atunuu e seasea tofo i ai.

Na taua e se tasi o tamalii o le atunuu sa auai i le vaega e tofoina kuka eseese, o le polokalame lenei ua mafai ai ona molimauina e le atunuu le tele o ituaiga kuka e mafai ona faaaoga i ai le fua o le ulu.