Ads by Google Ads by Google

Felanulanua’i polokalame mo le vaiaso o le Mosooi

O polokalame ua fa’ataoto mo le vaiaso o le Mosooi i le vaiaso fou, ua atagia mai ai le tele o tapenapenaga mo le atunuu aemaise ai tagata tafafao o lo o autova’a mai i totonu o le teritori i aso fai pea.

O le masina lenei o Oketopa i tausaga uma e faamanatuina ai le Vaiaso o le Mosooi i le teritori, ma faatinoina ai nisi o tapenaga e pei o faafiafiaga, kukaina o taumafa Samoa, tauvaga tausala aemaise ai o polokalame eseese o lo o fuafua mo le faalauiloaina atili o tu ma agaifanua a Samoa.

O nisi la o polokalame tetele ua toatele le atunuu ua tulimata’i i ai i le vaiaso lenei faapea ai le vaiaso fou, o le Tauvaga Tausala lea o le a faataunuuina i le po o le aso Faraile o le vaiaso nei, faapea ai le Taamilosaga o Lakapi Ta’ito’a 7 ma le Tauvaga Ta Tatau o lo o lagolagoina e le Tisa’s Tattoo Fest ua faamoemoe mo le faaiuga o le vaiaso fou.

TAUVAGA TAUSALA

E to’alima tamaitai lalelei ua maea ona lautogia e auai i le tauvaga lea o le a faia i le Fale Laumei i Utulei i le po o ananei, e saili ai se tasi e avea ma Lalelei o Amerika Samoa mo le tausaga 2012=2013.

O le tauvaga o lenei tausaga e le gata o le a faamuta ai le tauaveina e le Lalelei o Amerika Samoa o lo o i ai o le pale, Miss Skyline Nua, ae o le a faamanatuina ai foi le atoaga o le 20 tausaga talu ona faavae lenei tauvaga i le atunuu.

O tamaitai lalelei ua lautogia mo le tauvaga e aofia ai Gassuallen Iulieta Fale; Josephine Mativa; Vaiolematalematu Maddy Unutoa; Charity Porotesano ma Arrielle La’asaga Tuilefano Maloata.

TISA’S TATTOO FEST

O le Aso Faraile, 26 o Oketopa e oo atu i le Aso Sa, 28 Oketopa o le a faataunuuina ai le tauvaga ta tatau a le Tisa’s Tattoo Fest i lona nofoaga autu i Alega.

E tele faafiafiaga eseese o le a mafai ona molimauina e le atunuu mo lea faamoemoe, ma ua valaauina ai soo se tasi ina ia avatu lou aiga e molimau i nei faafiafiaga matagofie.

O le tauvaga o le tausaga nei o le a faamanatuina ai le 8 tausaga talu ona faavaeina lenei faamoemoe, ma ua sauni foi le faletua o Tisa e faatino vaega uma o faafiafiaga ina ia faamalieina ai le maimoa a le atunuu.

O tufaga ta tatau mai Samoa ma Amerika Samoa nei o le a autu i ai lenei tauvaga, ma ua faamoemoe le faletua ia Tisa e faailoa i le mamalu o le atunuu o le a autova’a atu e maimoa auala eseese o lo o faataua ai mamanu a Samoa i le taina o ana tatau, e le gata o soga’imiti, o malu ae faapea foi pe’a o lo o ta i tino o lo o faailoa atu ai isi mamanu taua a Samoa.

TAAMILOSAGA LAKAPI TA’ITO’A 7

O le aso Faraile ma le aso Toona’i o le vaiaso fou, 26-27 o Oketopa o le a faataunuuina ai le taamilosaga taito’a 7 a le Iuni Lakapi a Amerika Samoa (ASRU), ma taualuga ai loa le Vaiaso o le Mosooi o lenei tausaga.

I se faatalatalanoaga ma le Failautusi a le ASRU i luga o le telefoni ananafi, na faamaonia mai ai e le afioga Falefata Moli Lemana taimi ma aso o lea faamoemoe.

E 11 au mai totonu lava o le atunuu ua faamautu le auai i le taamilosaga, ae o lo o faatali pea mo au mai Samoa sa tuuina atu i ai le valaaulia.

Saunoa Falefata, e lua au a alii ma le au e tasi a tama’ita’i ua maea ona tuuina atu i ai valaaulia mai le Iuni Lakapi a Apia i Samoa, e malaga mai e auai i lenei faamoemoe.

Afai ae talia e le Iuni a Apia le valaaulia ma faamaonia ana au e tolu ua tuu atu i ai valaaulia, lona uiga o le a tuu faatasia loa foi se au a tamaitai a Amerika Samoa, e taaalo ma le au a tamaitai mai Apia.

Ua vaaia i malae taaalo eseese i le atunuu le taufai koleni o au mai kalapu taitasi mo le taamilosaga i le vaiaso fou, lea o le a sauni atu ai le au malosi a Fagatogo e puipui lana Ipu o le siamupini mai le tausaga na te’a nei.

E le o se taimi muamua lenei ua malaga mai ai au mai Samoa e tausinio i le taamilosaga o le Mosooi. I tausaga ua mavae a’o lua Iuni Lakapi, sa masani ai ona malaga mai ai mai Samoa ma toe fo’i ma faailoga tupe ma Ipu o manumalo.

O le maea ai o le taamilosaga taitoa 7 lenei a le ASRU, ona sauni ai loa lea o le au filifilia taitoa 7 i lalo o le 19 tausaga le matutua, e tuuvaa atu mo Samoa i le masina fou, e auai i le taamilosaga a le Pasefika lea o le a talimalo ai Samoa.