Felanulanua’i fa’afiafiaga fa’atulaga mo le vaiaso o le fu’a

E felanulanua’i fa’afiafiaga eseese ua fa’atulaga e le Ofisa o Fa’aaliga o Tu ma Aganuu, fa’atasi ai ma le lagolagosua a le Matagaluega o Tupulaga Talavou, Tina ma Tama’ita’i, o le a mafai ona molimauina e le atunu’u i le vaiaso o le sisiga fu’a, lea e amata mai i le aso Gafua e o o atu i le aso Lulu o le vaiaso fou, Aperila 14-16, 2014, i le malae o le Su’iga’ula a le Atuvasa i Utulei.

 

O au fa’afiafia ua lautogia mo lenei fa’amoemoe e aofia ai ausiva mai Autalavou; Fa’alapotopotoga fa’apea ai ma aoga.

 

E to’a 28 le aofa’i o au fa’afiafia ua lautogia e fa’afiafia i le Fa’afiafiaga lona 41 o le Fu’a i tausaga ta’itasi, lea sa masani ona fa’atautaia i le Malaeoletalu i Fagatogo, peita’i o le ulua’i tausaga lenei ua fa’ataunu’uina ai i le Malae o le Su’igaula i Utulei.

 

O polokalame o le fu’a ua fa’amoemoe e amata i le sauniga lotu e faia i le afiafi o le Aso Sa o lo o lumana’i nei, i le maota o le Lee Auditorium i Utulei, soso’o ai loa ma fa’afiafiaga i le aoauli o le aso Gafua.

 

E lua vaega o le a vaevaeina i ai fa’afiafiaga mo le fu’a i lenei tausaga, o fa’afiafiaga ia e amata atu i le itula e 1:00 e oo atu i le itula e 4:00 i le afiafi, o le a fa’atautaia a le Matagaluega o Tupulaga Talavou, Tina ma Tama’ita’i, ae o fa’afiafiaga e amata atu i le itula e 5:30 e oo atu i le 9:00 i le po, o le a i lalo o le vaavaaiga a le Ofisa o Fa’aaliga o Tu ma Aganu’u.

 

O le Fa’atonusili o le Matagaluega o Tupulaga Talavou Tina ma Tama’ita’i ia Jonathan Fanene o le a saunoa i se saunoaga fa’apitoa e tatala aloaia ai polokalame o le fu’a o lenei tausaga, i le sauniga e tatala ai fa’afiafiaga i le afiafi o le aso Gafua o le vaiaso fou, soso’o ai loa lea ma le saunoaga autu o le fa’amoemoe, lea o le a saunoa i ai le afioga i le Kovana le tumau ia Lemanu Peleti Mauga, ma fa’agasolo ai loa lea o le polokalame.

 

E ta’i tolu au siva o le a fa’afiafia i le polokalame o le aoauli mo aso e tolu, ona sosoo ai loa lea ma le fa’afiafiaga fa’apitoa e tasi e to va ai fa’afiafiaga o le aoauli ma le afiafi, fa’atoa amata aloaia ai loa lea o polokalame i afiafi taitasi.

 

O le a maua ai fo’i ma le avanoa o le atunu’u e molimauina ai taumafa eseese o le a mafai ona fa’atauina i fale’aiga ua lautogia mo lenei fa’amoemoe.

 

O le agaga o le komiti o le fu’a o lenei tausaga, ia maua e le atunuu atoa se sisiga fu’a fiafia ma le manuia, a’o sauni atu Amerika Samoa e fa’amanatu le 114 tausaga talu ona sisi le fu’a a Amerika i ona laufanua.

Comment Here