Pago Pago - AMERIKA SAMOA

I se pepa o fa’amatalaga mai le Ofisa o le Kovana Sili i le vaiaso ua te’a sa fa’ailoa ai e faapea na feiloa’i le Peresetene ma le Pule Sili o Starkist ia Chae-Ung Um, ma lana vaega ma le afioga i le kovana ia Lemanu P.S. Muaga, ma nisi o sui sinia o le Ofisa o le Kovana i le potu fono a le Kovana i le taeao o le Aso Lua, Aperila 5, 2023. 

O le feiloaiga na taulai i le fausia o se faiga faapaaga faifaipea ma le Malo o Amerika Samoa e faailoa ai fofo e fesoasoani ai i le manuia o le StarKist Samoa. Na fa’ailoa e le Pule Sili o Chae-Ung Um e fa’apea, o le asiasi mai i Amerika Samoa e taua tele i lana matafaioi fou ma o le va’aia lelei o le aga’i i luma e fesoasoani ia te ia e saili ai ni auala e fo’ia ai lu’itau o lo’o fa’aauauina ma fou mo le kamupani. Ma na tapunia e le StarKist Samoa galuega mo le lua vaiaso ina ia mafai ai ona toe faaleleia nisi o galuega i le StarKist Samoa. 

Na faaalia e le Pule Sili ia Chae-Ung Um atugaluga e uiga i le National Marine Sanctuary i tafatafa o Atumotu Mamao o le Pasefika (PRIA) ua amataina e Peresitene o Amerika ia Joe Biden. O le fa’alauteleina tele o lea ogasami e puipuia o le a afaina ai le tamaoaiga o Amerika Samoa, aemaise lava le StarKist Samoa, ae o le a manuia ai va’a fagota a Saina. 

Na fa’asoa e Kovana Lemanu i le Ofisa Sili o Pulega ma lana vaega se tusi na tu’uina atu ia Peresitene Biden e talanoaina ai le tulaga o le malo o Amerika Samoa ma lona silafia i aafiaga o suiga o le tau. Na taua e le afioga i le Kovana ia Lemanu i lea tusi lona popolega, ina ne’i o’o atu le fa’atonuga a le malo i le fa’aletonu o pisinisi tuna i Amerika Samoa ma afaina ai le tusa ma le 5,000 o galuega. Na laga e le tamaitai faipule o Amata ia lava popolega i le pulega a Peresitene Biden i se tusi na tusia ia Mati 27, 2023.

Na fa’aopoopo e le Pule Sili Chae-Ung Um, ua si’itia le tau o le tuna. Ua siisii foi le tau o le malosi ma o se luitau le faamalieina o manaoga o tagata faatau mo tau maualalo. Na tofia kovana ia Lemanu le Ta’ita’i o le aufaigaluega ia Loa Tauapai Laupola, ina ia galulue fa’atasi ma se vaega i le sailia o ni auala e mafai ai ona fa’aitiitia le si’itia o tau. 

I le faaiuga o le fonotaga, na tauaao atu ai e le Pule Sili o Chae-Ung Um se siaki e $10,000 ma pusa e 300 o Wahoo ia Kovana Lemanu e fai ma foa’i a le StarKist Samoa mo le faamanatuina o le Fu’a a Amerika Samoa i lenei tausaga. Na tauaao e Kovana Lemanu ni taga meaalofa mo le pulesili a le StarKist ma lana au taupulega.