Ads by Google Ads by Google

Fefa’ataua’iga - Iunaite Setete o Amerika & Fiti

O le ali’i palemia o Fiti Voreqe Bainimarama ua ia fa’ailoa mai e tusa ma le 15,000 o tagata faigaluega o le a le toe i ai ni galuega, pe afai o le a ave’esea e Amerika le aiaiga e le totogia ai ni Tiute mo Oloa a Fiti sa fefa’ataua’i ai ma Amerika i a latou oloa gaosi fa’atau atu i lea maketi tele.

Ua fa’aalia e le Palemia Bainimarama, “O le a matua afaina lava le matou malo i lenei tulaga, aua ua fa’aalia mai, o Fiti, ua ave’esea nei e Amerika lo latou igoa i lalo o le lisi o Malo e aofia i le aiaiga “Generalized System of Preferences.” O nei malo e lisia i lea lisi, e mafai ona fa’aulufale mai a latou oloa i totonu o le Malo o le Iunaite Setete o Amerika e aunoa ma se totogi o ni tiute e pei ona masani ai.

Ua ia fa’ailoa mai, “O le Malo o Fiti o se malo e ola fa’alagolagoa’i tagata uma i o latou aiga, pe afai o le a lusi atu lea aofaiga o galuega e le to’atele lea o tagatanu’u o Fiti, e tusa ma le 75,000 o tagata o le a le mafai ona toe tausia lelei o latou aiga, ma o se lu’iga sili ona fita o le a o’o i ai lo matou malo ma ona tagata nu’u.”

Peita’i, o se tala mai le Fiji Trades Union Congress, Felix Anthony, le latou failautusi, ua ia fa’aalia ai, “Ua foliga mai o le a tu’ua’ia vale fua lea tulaga i le aiaiga a Amerika e le toe fa’aulua ni oloa fa’atau atu mai Fiti e le toe i ai se tiute, ua i ai aiaiga o galuega o lo’o tausi fa’apepe ele Iuni a tagata faigaluega e mafai ona finaua’i ai le mau mo tagata faigaluega, e le tatau ona gae’e fua le mamalu o tagata faigaluega i lea ituaiga o fa’aupuga.”

Peita’i, ua fa’aalia e Bainimarama, “O le 15,000 lea o tagata o le a afaina a latou galuega ua ia fa’aalia, o le aofai lea o tagata faigaluega i kamupani e 9 lea ua matauina e latou te fa’atau atu oloa i Amerika, o se maketi sili ona tele lana fesoasoani i olaga o nei tagata faigaluega ma latou aiga, ae maise le Malo i le aotelega o le tamaoaiga.”

Ua mae’a malaga atu se aumalaga o loia ma tagata o le Matagaluega o Oloa ma Fefa’ataua’iga a le Malo Fiti mo Uosigitone DC ina ia toe feutaga’i lava lea aiaiga taua tele o tulafono tauoloa fa’atau atu e leai se tiute, lea sa aofia ai le malo o Fiti i le lisi o malo e mafai ona faia i ai lea tulaga e Amerika.

Ua aofia i lea mau e malaga atu ma sui fa’apitoa nei o Fiti, le tulaga o aiaiga tau galuega mo tagata o lo’o galulue punoua’i ai i Kamupani nei e 9 o lo’o fefa’ataua’i ma Amerika, ma e i ai aiaiga o latou Iuni e ono a’afia ai le tulaga o le motusia fa’afuase’ia fa’apea o latou avanoa faigaluega.

O le aia sili lea ona maualuga a le Malo, o le taumafai lea ina ia sefe ma saogalemu lelei olaga faigaluega o ona tagata, ma e finaua fo’i lea tulaga pe afai o le a motusia fa’apea lea so’otaga vavalelei tau fefa’ataua’iga ma le Iunaite Setete o Amerika. Ua fa’ailoa fo’i e le palemia, o se isi lea vaega o le latou fuafuaga fa’ataoto mo le faigamalo fa’atemokalasi lea e aga’i atu Fiti ina ia palotaina, ia utagia atili ai ma tulafono tau fefa’ataua’iga & avanoa faigaluega fa’avaomalo e 34, lea e aofia ma agava’a ai Fiti.

O lo ua mae’a iloiloina toto’a fo’i e le latou Employment Relations Advisory Board fa’atasi ai ma sui o le malo, Iuni a tagata faigaluega ma Iuni a Kamupani mo Fefa’ataua’iga. O se mea lelei tele ua latou faia i le taimi nei e tapena ai mo lea mataupu ua fa’ao’o atu i Uosigitone DC.

Ua fa’ailoa mai, ua toe o se ana ona mafai lea ona fa’amalosia le tulaga o le totogi maulalo e ao ina faigaluega ai tagata uma i so’o se matata i lea malo, pe afai ae mae’a fono ma fa’atulaga totogi e lea lava Komisi faufautua ua fono nei.

saunia e Leua Aiono Frost