LOLO: E le manuia le malo pe afai e faaauau pea faiga faasolitulafono

E leai se isi auala e manuia ai le atina’eina o le malo i soo se gaioiga o lo o faia i le taimi nei, se’i vagana ua mulimuli tagata faigaluega uma o le malo i le tulafono ma ta’itala, ma taofia faiga faasolitulafono o lo o maitauina pea i ni isi o vaega o le malo, e pei ona saunoa le afioga i le ali’i kovana ia Lolo Matalasi Moliga i ana faatonusili i le vaiaso na te’a nei.

O ni isi o vaega faa solitulafono na taua e Lolo e aofia ai le faa faigaluega muamua o tagata i le malo ae faatoa faatumu mulimuli pepa talosaga i le Matagaluega o Tagata Faigaluega a le malo (DHR): malaga muamua i fafo ae tuu atu mulimuli le talosaga mo se tupe e totogi ai avanoa malaga i kamupani fai pepa malaga: faapea ai ma le ova o le faaaoga i tupe e le’i paketi i totonu o le paketi faaletausaga a le Ofisa.

O gaioiga e pei ona taua e le alii kovana, sa ia ta’ua o ni “gaioiga faasolitulafono sa faaauau mai i le tele o tausaga ua mavae, ae ua oo i le taimi ua tatau ai ona taofia.”

O le faiga na taua e Lolo o lo o ia maitauina i ni isi o vaega o le malo i le taimi nei, i le faaaoga muamua lea o se tautua a se kamupani tua e pei o le kamupani fai pepa malaga ae talosaga mulimuli atu i le malo mo le totogiina o le tupe, o se faiga ua matua manino ai le soli o le tulafono.

“O mea ia o lo o tatou faia o le totogi mulimuli o tupe ae ua maea ona faaaoga le tautua, e solitulafono, e le tatau foi ona toe tula’i mai, afai tatou te manatu e lelei le malo ma ia solosolo lelei lona atina’eina, tatou galulue e taofi faiga faasolitulafono nei, ae afai e te le manatu e fai sou sao i le taofia o faiga faasolitulafono nei, lona uiga e te le alofa i le malo,” o le saunoaga tuu sao lea a le alii kovana i faatonusili.

Na oo foi i avanoa faigaluega mo soo se tasi e fia galue i le malo, ua fautuaina e le kovana sili faatonu ina ia faatumu muamua pepa e manaomia i le Matagaluega o Tagata Faigaluega a le malo, ona faatoa aumai lea o le tagata e faa faigaluega.

E tatau foi ona mautinoa o lo o avanoa se vaega tupe i totonu o le paketi e totogi ai lea tagata, ae le o le faafaigaluega lava e aunoa ma le mautinoa o se tupe e totogi ai.

Ina ia faamalosia tulaga e pei ona fautuaina e le alii kovana, ua ia fautuaina ai le Teutupe a le malo ina ia silasila totoa i vaega uma e pei ona ia taua i lana fautuaga, ina ia mautinoa o lo o uia auala uma e tusa ai ma le tulafono mo soo se galuega e faia faia i le malo.

Mo se faataitaiga e pei ona saunoa Lolo, o ni isi o matagaluega e tiga lava ona vaai ua ova le faaaoga o tupe mai le paketi ae faaaoga lava, o ni isi foi o taimi ua le fesiligia le Ofisa o le Paketi po o le Teutupe mo se fautuaga, ae ua faataunuu lava gaioiga i auala tuai sa masani mai ai i tausaga ua mavae.

O se tasi o faafitauli na taua e Lolo o lo o maitauina i le taimi nei, o le tele lea o galuega o lo o fia faia mo le faaleleia o le atinae o le malo, ae o lo o faaletonu tulaga i tupe maua ona e le o lelei ona faatonutonu ma faamalosia tulafono mo le aoina mai o tupe i totonu.

Ona o lea tulaga, na taua ai e Lolo e faapea, e na o le toalua lava tagata e faia faaiuga i le tulaga o le paketi a le malo, na o laua ma le Faatonusil o le Ofisa o le Paketi, ae o le tagata e toatasi e mafai ona ia suia se faaiuga ua faia, e na o ia, ae o le isi faafitauli lea ua maitauina, e foliga mai o tagata uma lava i totonu o ofisa ma matagaluega a le malo ua latou faamalosi ona fai faaiuga ma sui faaiuga ua maea ona faia e aunoa ma le fesiligia o se fautuaga.

O le tutupu so o mai ai o faaletonu tau tupe i le malo, nat aua ai e le alii kovana e faapea, o le isi lea mafuaaga e ala ai ona umi tulaga faaletonu i tupe feterale o lo o tuuina mai mo Amerika Samoa, ona e tofu lava le tagata ma lana faaiuga e faia i ai.

Ina ia foia ia faafitauli, ua ia tofia ai le susuga ia Jerome Ierome o lo o faauluulu i ai le Ofisa e vaavaaia tupe feterale a le malo, o ia lea o le a taitaifono o le Komiti Faapitoa e iloiloina auala e aveese ai tulaga faaletonu i tupe mai fafo (High Risk Task Force), ina ia mafai ona fesoasoani le susuga Jerome i le faaleleia o ni isi o vaega o lo o tulai mai ai nai faaletonu laiti ma toe faafoi ai tulaga o tupe mai fafo i se tulaga lelei.

Na taua e le teutupe a le malo ia Falemao ‘Phil’ Mao i le Samoa News i le vaiaso na te’a nei e faapea, ua latou galulue soosoo tauau ma le Matagaluega o le Paketi ma Tagata Faigaluega a le malo, i le tau tuu faatasia lea o se ta’iala fou e mulimulita’i i ai tagata faigaluega uma a le malo ma Ofisa, ina ia faa faigofie ai ona foia ni isi o faafitauli o lo o finagalo le kovana e taofi.

O ni isi o ia ta’iala e pei ona saunoa le teutupe, o le tatau lea ona tuu muamua atu le talosaga mo se avanoa faigaluega e faia faatumu, ona siaki lea po o i ai se tupe e totogi ai le tagata faatoa tuu atu ai pepa mo le faatumuina, e faapena foi i ni isi e malaga i fafo mo ni fonotaga, e le tatau ona malaga sei vagana ua faamaonia atu e le teutupe.