Fautuaina Faumuina se faiaoga THS e fa’amavae mai lana galuega

Ua fautuaina e le Ta’ita’ifono o le Komiti o Aoga a le Senate, le afioga i le ali’i Senatoa ia Faumuina Tagisiaali’i le faiaoga lea na ia tu’uina le ata video o le fusuaga a ni tama’ita’i aoga se to’alua mai le Aoga Maualuga a Tafuna i luga o le ‘facebook’ i le vaiaso nei, ina ia fa’amavae ma le galuega faa faiaoga.

 

“O ai lava le faiaoga sa ia faia lea galuega le alofa, o lona faalauiloa o fusuaga i le va o fanau aoga i luga o le ‘facebook’, ou te fautuaina oe ina ia e faamavae mai le galuega faa faiaoga, ona ua atagia mai i le gaioiga sa e faia ua le mafai ona e faatino ou tiute faa faiaoga e foia ai ni mataupu e tula’i mai i le va o tamaiti aoga,” o le saunoaga lea a Faumuina i se faatalatalanoaga ma le Samoa News i le aoauli ananafi i luga o le telefoni.

 

Na saunoa atili le alii senatoa e faapea, “so o se faafitauli e tula’i mai i totonu o aoga uma i le atunuu ma le lalolagi, o le faiaoga lava le tagata e tatau ona taumafai e saili se auala e foia ai le faafitauli, ae le o lona tamafai e faasalalau ma le atili ai ona lapo’a le fa’afitauli.”

 

O le mataupu lenei na tula’i mai i le aso Lua o le vaiaso nei, ina ua tuu e se faiaoga le ata video o se fusuaga i le va o ni tamaitai aoga se to’alua na tula’i mai i le taimi ‘ai, ma avea ma itu na tele i ai faasea ma faitioaga a tagata iinei ma fafo e faatatau i lenei ata video.

 

I totonu o le ata video o lo o vaaia ai ni tamaitai aoga se toalua o lo o fufusu, ae o lo o matamata i ai le toatele o isi tamaiti aoga, e aunoa ma se tasi na vaaia o taumafai e taofi le fusuaga, sei vagana ai le faalogoina o latou leo o valaau atu i tama’ita’i na fufusu e toe amata le fusuaga.

 

Na taua e le pule aoga a Tafuna ia Beauty Tuiasosopo i le Samoa News e faapea, na mae’a lava i le aso lea na tula’i mai ai le vevesi ona foia le faafitauli, sa valaau fo’i i matua o tamaitai na fufusu e o atu i le ofisa.

 

Ae mo le alii faiaoga sa tuuina le ata i luga o le ‘facebook’, na taua e Tuiasosopo e faapea, o le a faia i ai se faaiuga e tusa ai o le mataupu sa tula’i mai.

 

I le silia ai ma le 12 tausaga o avea le afioga Faumuina ma ta’ita’ifono o le Komiti Faafoe o le aoga a le South Pacific Academy i Tafuna, sa ia taua ai e faapea, soo se taimi lava e tula’i mai ai se faafitauli i totonu o le aoga, po o le va fo’i o tamaiti aoga, e le gata e muamua lava ona ia taumafai e saili se fofo mo le taimi lea, ae na te valaau fo’i se fono faatopetope a matua ma faiaoga (PTA), e talanoaina ai se fofo o le mataupu.

 

“O faiaoga, o matua na o tamaiti i totonu o le faleaoga, e tatau ona ‘ava ma usita’i fanau aoga i faiaoga, o latou matai faalea’oa’oga i latou, e tatau foi i faiaoga ona alolofa ma faapelepele i fanau aoga, ae le o le faia i ai o nei ituaiga amioga faapenei,” o le saunoaga lea a le alii senatoa.

 

Na faaigoa e Faumuina le gaioiga sa faia e le faiaoga i lona tuu lea o le ata video i luga o  le ‘facebook’, o se auala ua ia faatuputeleina ai le vevesi i le va o aiga ma matua o tama’ita’i na fufusu, ma e ono avea nei tulaga ma itu e ono tutupu mai ai nisi faafitauli e sili atu ona matuia, e le fia faalogo atu i ai matua ma faiaoga.

 

O ananafi na faia ai se fonotaga a le Faatonusili o Aoga ma nisi o sui o lana matagaluega, atoa ai ma sui o le Fono e aofia ai senatoa ma faipule, mo le talanoaina o le mataupu e faatatau i le ripoti a le Komiti sa fuafuaina le Fonotaga a Aoga sa faia i le masina o Oketopa na te’a nei.

 

Na taua e Faumuina, lea fo’i sa auai i le fonotaga lea, e le’i talanoaina ai le mataupu e faatatau i le fusuaga a tama’ita’i aoga, ae o le a ia fesiligia lea mataupu i le isi a latou fonotaga o lo o fuafua mo le vaiaso fou.

Comment Here