Fautuaina e Senatoa Pulega LBJ tatala pea Primary Care Clinic

I le faaiuga o le iloiloga i le va o le Komiti o le Soifua Maloloina a le Senate, ma sui o le Pulega o le Falema’i o le LBJ i Fagaalu i le taeao ananafi, ua fautuaina ai e afioga i Senatoa le tatau lea ona faaauau pea le tautua a le Primary Care Clinic, ina ia mafai ai ona foia le fa’afitauli o lo o tula’i mai i le le lava lea o foma’i e tautuaina le atunuu i le tele o aso.

 

“O le fautuaga mo le pulega a le falema’i, tatala pea le tautua a le Primary Care mo le atunuu, ona e taua tele le tautua lea mo le toatele o le atunuu,” o le fautuaga lea a le afioga i le alii Senatoa ia Laolagi Fonoti Savali Vaeao sa tuuina atu i sui o le pulega a le falema’i, ina ua mae’a ona fa’amalamalama e le Ta’ita’ifono o le Komiti Faafoe a le falema’i, e le i faia sa latou faaiuga pe tapuni le Primary Care pe leai.

 

O le afioga i le alii Senatoa ia Faumuina Tagisiaali’i na ulua’i fesiligia le mataupu i le Primary Care Clinic, pe aisea ua manatu ai le pulega a le falema’i e tapuni ae le tatala pea mo le atunuu.

 

Na faamanino e Mase Akapo e faapea, e le i faia se faaiuga maumaututu a le Komiti Faafoe faasaga i le fautuaga a le alii foma’i ia Dr. Iotamo Saleapaga, e faatatau i le tapunia o lea auaunaga taua, ona o lo o faaauau pea sailiiliga a le Komiti Faafoe.

 

O ni isi o mafuaaga na taua e Mase ua mafua ai le fautuaga e tapunia lea tautua i totonu o le LBJ, e le o lava ma’i e vaai e foma’i i le aso e tasi, pe a faatusatusa i le na o le to’a 5 i le to’a 6 ae tele le tupe o lo o alu e totogi ai foma’i ma faatupe ai le auaunaga a lea vaega o le falema’i.

 

Na fesili Faumuina ia Mase pe moni ripoti e le o lava foma’i i le LBJ, na tali Mase ‘ioe’.

 

“Aisea la ua manatu ai e tapuni le auaunaga lea a’o lea e le o lava foma’i, e tatau ona tatala pea le tautua lea mo le atunuu ina ia mafai ai ona o atu tagata e vaai le foma’i, ona o le tele o taimi e tumu ai le potu mo gasegae tau savali, ma e o o atu i le ta’i 4 i le 5 itula o nonofo tagata e faatali se foma’i,” o le fesili lea a Faumuina na lagolago e le afioga i le alii Senatoa ia Faletagoa’i Tuiolemotu.

 

Na taua e Faletagoa’i i le taimi o le iloiloga se tasi o po na malaga atu ai i le falema’i, ma ia vaaia ai le to’atele o le atunuu o lo o faatalitali mo le taimi e vaai ai le foma’i, ae ina ua fa’afuase’i ona taunuu atu le ta’avale a le EMS ma se gasegase tigaina, sa aga’i atu ai loa le foma’i e to’atasi na tiute mo le togafitiina o le gasegase tigaina lea, ae faaletonu uma ai le toatele o le atunuu ua leai se foma’i e vaaia i latou.

 

Ae ina ua ia fesiligia se tamaitai faigaluega pe aisea ua to’atasi ai le foma’i e tiute i le sifi lea o le po, ae tali le tamaitai faigaluega a le falema’i, ua pau lava o le faatulagaina o sifi a le falema’i.

 

Saunoa Faletagoa’i e faapea, e tatau ona faatulaga lelei taimi e galulue ai foma’i mo sifi ta’itasi, ina ia mautinoa e ta’ito’alua foma’i e galulue i le sifi o le po ina ia mafai ona tali i manaoga o le atunuu.

 

Saunoa Dr. Saleapaga e faapea, o le to’atele o tagata o lo o maliliu i le falema’i, o tagata e vaai ma togafiti i le vaega o le ER, ona toe ave lea i le fale, ma e mafua mai e le o lava foma’i e galulue i le vaega lea, ae o lo o taumafai pea le pulega a le falema’i e foia lea faafitauli e ala i le faa faigaluega o ni isi foma’i fou, ina ia foia ai le faafitauli o le to’atasi o le foma’i e galue i le vaega o le ER i le sifi o le po.

 

Saunoa Laolagi e faapea, ina ua ia fesiligia se foma’i e galue i le Primary Care pe moni e le o lava gasegase o lo o latou vaaia i le aso e tasi, na tali le foma’i e le sa’o lea ripoti, o lo o pisi a latou galuega i aso ta’itasi i le vaaia o gasegase ua uma ona faatulaga taimi e oo atu ai e vaai le foma’i.

 

I fautuaga sa tuuina atu i sui o le pulega a le falema’i e pei ona saunoa le alii Senatoa ia Soliai Tuipine Fuimaono e faapea, e le tatau ona faavae faaiuga a le falema’i i luga o ni feeseeseaiga faaletagata, ae tatau ona latou faia faaiuga mo le manuia o le atunuu.

Comment Here