Ads by Google Ads by Google

FAUTUAGA MO SE SOIFUAGA UMI

O auala e faaitiitia ai le tagofia e tagata o le ava malosi ma fualaau faasaina, o nisi ia o sini tetele o loo faatulai e le matagaluega a le DHSS ina ia mautinoa e manuia ai le atunuu.

O le aoga fo’i ua faia ai molimau va’aia! O ni mea sa e manatu mama lava i ai, e le o’o vave mai, peita’i ua ola ai nei ma le tiga ma ona faigata. E moni lava le Tusi Sa, e suamalie i le gutu ae o’ona lava i le manava lenei mea, ua va’aia fo’i e le faigofie ona tali atu i le fiafiaga sa faia, ae leai se tapasa.

E le gata i ni sui o lo’o tutula’i i tofiga maualuluga, ae o i latou ua i’u mai tautua i le militeri ma mea ua latou fa’ailoa mai sa ola mai ai, savavali ai, ma fa’ata’ita’i i ai, ae fa’afetai, “Ua vave ona o’o mai le tala’iga, ia tia’i ma ia inoino vave i ai!”

Ua moni lava le tala e fai i lenei mea o le tu’inanau i le fiafiaga o le olaga, e le umi e mou ‘ese lava e pei o le puao i luma o ou mata, ae taoto mai le tino ua augase i ma’i leaga! Fesili le Tusi Sa, “E a ua malo ou ivi, pe ua u’amea ou a’ano?” E te fia tau ai le taua o le tu’inanau e le mautu ae so’ona maumau ai lou ola?

Fa’ato’a ou fa’alogo fo’i lea i se itu fa’aletonu o le olaga fa’amiliteri latou. E so’ona inu lava pe a maua se taimi avanoa mo ni nai tafaoga! O se mea e le tau fesiligia, ua avea le faigaluega ma fa’aaoga ai au’upega malolosi, ua tau le fefefe ai fo’i i so’o se ituaiga fa’alavelave e o’o mai, ae maise ai lava taimi ua tagofia ai le ‘ava!

Manatua le amio a le talavou Samoa ma isi fo’i lava atunu’u, “E lelei lava si tama, ae paga lea, e tagofia loa le ‘ava, sui loa i le sifi o le lalolagi ona uiga!” O le tagi u’u lava lea a si Olomatua, le tina o si fafine mafatia i amioga a le tamaloa faiava!

Ua matele ina fa’apea aiga, o le masani lea o le olaga! Peita’i, ua le faia ai se galuega ina ia mafai ona maua e le sui se fautuaga aoga i si ona olaga faia’e fa’afaiava. Ia o le mea e matele ona maua ai, o le mumusu o le aiga o si teine e toe nonofo atu i le latou fo’i puiaiga. “E sili ai le fai i ai e o e su’e se mea e nonofo ai, ma fai ai a la’ua amioga ia!”

O se fautuaga lava, alofagia, faifai mai i lalo lau inupia, ae ia va’ai, o pelega fo’i a nai matua ma aiga lena e te lua nonofo, e leai lava se matua valea e fia va’ai atu ua sau si ana tama teine ma se afisi ma se fa’afafa, ae toe papatu mai ma mata! Sa’o ai loa si olomatua mativa o si o’u aiga, “E ia o ai lava lou pu’a’a na e sau ai ma au tupe fa’apea e fa’atau atu ai la’u tama, a leai se alofa, ia fa’auma pe a le sola!”

O motuga’afa lava na o le olaga aiai’ava! Ia aua le so’ona faia, aua o le oi o nai matua, e te va’ai atu lava ua le atoa le 40 tausaga, ae ua tau le mafai ona o’o i le faitoto’a!