Fautua Tuaolo ia Lolo ina ia silasila toto’a tau soifuaga

Na faaaoga e le tofa Tuaolo M. Fruean lona avanoa na maua i le toe fonotaga a le Kapeneta i le aso Gafua 30 Tesema 2013, e tuu atu ai sana fautuaga i le afioga i le alii kovana ia Lolo Moliga, ina ia silasila toto’a i le tulaga ua i ai le tau o le soifuaga i totonu o le atunuu i le taimi nei, ona ua fai lava si taugata ma ua le gafatia fo’i e nisi o le atunuu.

 

“O le fuatuaga mulimuli mo lenei tausaga i lau afioga i le alii kovana Lolo, se’i e silasila toto’a ane lava i le tulaga ua i ai le tau o le soifuaga i le atunuu ua fai lava si taugata,” o le saunoaga lea a Tuaolo.

 

“Afai fo’i o lo o i ai ni nai tupe o lo o totoe ai, toe silasila mo ni nai siitaga i totogi o nai tagata faigaluega, ona e le gata ua taugata le tau o le soifuaga, ae ua maualuluga fo’i le totogi o pili o lo o feagai ma le atunuu i le taimi nei, o le fautuaga lea ma le agaga maualualo,” o le saunoaga lea a Tuaolo.

 

O le tofa Tuaolo na tofia e fai ma sui o le kapeneta, e tali fuaitau atu i le saunoaga a le afioga i le Aloalii ia Afoa Leulumoega Suesue Lutu i le taimi na aloaia ai le lana faamavaega mai le tofi Loia Siil i le aso Gafua na te’a nei.

 

Na muamua faafetaia e Tuaolo le tautua a le alii kovana ia Lolo, faapea ai le lagolago a le afioga i le lutena kovana ia Lemanu Peleti Mauga, ona o le tulaga ua i ai nisi o suiga i totonu o le faigamalo ma le atunuu.

 

“O le mea lea ua matou iloaina Lolo ma Lemanu, e mata’utia suiga ua matou vaaia i totonu o le atunuu i le taimi nei, a’o lea faatoa tasi le tausaga talu ona tula’i mai le lua nofoaiga,” o le isi lea saunoaga a Tuaolo e aunoa ma lona faailoaina po o a suiga mata’utia sa ia taua.

 

Ae i le talitonuga a Tuaolo, o suiga tetele ua faia e Lolo ma le faigamalo, o suiga faatoa mafai ona tutupu i le tuana’i ai o le 4 tausaga o se nofoaiga, pe ana faapea o se isi faigamalo lea o lo o tula’i mai.

 

Fai mai Tuaolo, e tele se taimi sa ia tau mafaufau ai po o fea na aumai ai e le alii kovana le metotia lea ua ia faaaogaina e faagaioi ai lana faigamalo, e le gata i le manaia ae o le tulaga manuia fo’i e pei ona i ai.

 

“O lea la ua ou maua le tali o la’u fesili, ma ou faatusaina ai lau faigamalo i le taimi o le foafoaga a le Alii i Etena, fai mai e ono aso e galue ai ao le aso fitu e malolo ai, ae o lau faigamalo Lolo ma lau kapeneta, e ono aso e galulue ai, a o le aso fitu e o ai lau kapeneta e faamama toto,” o le saunoaga lea a Tuaolo ma tali e ai sui o le kapeneta.

 

Saunoa le afioga i le alii Faatonusili o le Ofisa o Tagata Matutua ia Ale Tifimalae e faapea, o le mataupu i le tau o le soifuaga atoa ai ma totogi amata o tagata, o ni isi ia o mataupu ua toatele tagata o lo o tuu fesili ai, ae talosia e mafai e le malo ona vave faia se auala e foia ai le faafitauli i le taugata o le tau o oloa.

 

Comment Here