Fautua Senatoa i le Komesina fa’atatau i fa’aaupegaina o Leoleo

E ui sa fa’aalia e afioga i Senatoa lo latou lagolagoina o se fuafuaga a le alii Komesina o Leoleo, ina ia a’oa’oina leoleo i auala e fa’aaoga ai a’upega, peita’i sa latou fautuaina le susuga a William E. Haleck ina ia fa’ateletelegese i lana fa’aiuga mo le fa’aaupegaina o leoleo.

 

O se iloiloga sa faia i luma o le komiti o le Puipuiga o le Saogalemu Lautele a le maota maualuga, na fesiligia ai e afioga i ali’i senatoa le alii Komesina ma le pulega o le Ofisa o Leoleo, le mafuaaga ua ala ai ona a’e se manatu e fa’aaupega leoleo.

 

Na faamanino e Haleck e fa’apea, e le o leoleo uma e tofu ma le fana, ae ua na o se vaega o leoleo mai Ofisa ta’itasi o Leoleo i Leone, Tafuna, Fagatogo ma Fagaitua, lea ua manatu e tofu le Ofisa o Leoleo ma fana ta’i 5 e tu’uina atu i ai, ina ia mautinoa e fa’aaupegaina ai leoleo i soo se taimi o a latou sifi o lo o galulue ai.

 

O ni faamaumauga na mafai ona faailoa e le Ofisa o leoleo i luma o le komiti, sa faamaonia ai ni isi o mafuaaga ua manatu ai le Matagaluega ua alaga tatau ona fa’aaupegaina leoleo.

 

O ni isi o ia mafuaaga e aofia ai ni mataupu sa tutupu i tausaga ua mavae, ina ua aga’i atu leoleo e tali atu i ni vevesi sa tula’i mai i se Kamupani faatau taavale i Tafuna i le 2009, ina ua maua o lo o i ai ni ali’i talavou se to’alua o lo o taumafai e gaoi, ae ina ua taunuu atu leoleo, sa tafana mai e le isi ali’i o le to’alua lea.

 

O le isi mataupu na tulai mai i Leone i le 1997, ina ua agai atu leoleo i sue le fale o se aiga ae tafana mai ai e le alii na molia alii leoleo, ae le faagaloina ai le mataupu na tula’i mai i le 2010, lea na tagatavaleina ai le alii leoleo o Det. Lt. Lusila Brown, lea na fo’i na lavea ai le isi ali’i leoleo ina ua ati se pulu fana i lona lima, ae misi le pulu sa fana ai le isi leoleo ae lavea ai le ta’avale leoleo.

 

Na taua e le tofa a Tauese Vaa Sunia, o ia lea na faalauiloaina faamaumauga a le Ofisa o Leoleo i mataupu sa aafia ai aupega matautia, e le o i ai se manatu o le matagaluega e aapa le leoleo i lana fana i soo se taimi e tali atu ai i se faalavelave e tula’i mai i le atunuu, ae i ai auala e tatau ona aoaoina muamua i ai le leoleo e tali atu ai, fa’atoa oo ai lana faaiuga mulimuli i le fa’aaogaina o le ‘aupega malosi, fuafua lava i le tulaga o lo o i ai le siosiomaga o le fa’alavelave o lo o tula’i mai i le atunuu.

 

Na tutusa finagalo o ni isi o senatoa i le tatau lea ona aoaoina leoleo i auala e faaaoga ai aupega, ae le tatau ona vave faaaupegaina leoleo i le taimi nei.

 

Saunoa le afioga i le alii senatoa ia Galea’i M. Tuufuli e faapea, afai e i ai se manatu e faaaupega leoleo, e tatau ona amata atu i leoleo ua maua faailoga Satini ona fa’aaupegaina, ae le o leoleo uma, e tatau fo’i ona aoaoina muamua leoleo Satini i auala e taulimaina ai aupega.

 

“Ou te lagolagoina le faia o aoaoga mo leoleo ina ia malamalama i auala e faaaoga ai fana, ae ou te talitonu e le o le taimi lenei e tatau ai ona faaaupegaina leoleo,” o le saunoaga lea a Galea’i na lagolagoina e afioga i le alii senatoa ia Laolagi Fonoti Savali Vaeao; Magalei Logovi’i ma Nuanuaolefeagaiga S. Nua.

 

Saunoa Magalei e faapea, ana faapea e tula’i mai le fa’alavelave lea na tagatavaleina ai le alii leoleo o Lt. Brown ae ua fa’a aupegaina leoleo, fa’amata e to’afia ni tagata e maliliu i lea aso.

 

Na taua e Magalei se faalavelave na tutupu i Amerika i le vaiaso na te’a nei sa maimoa ai i le news, ina ua fana sese e se leoleo se toeaina i totonu o lana ta’avale, ina ua aapa le toeaina i lana tootoo ae manatu ai le leoleo ua aapa le toeaina i sana fana.

 

“O mataupu faapenei e tatau ona tatou faaeteete i ai aua e mafai fo’i ona tupu i lo tatou atunuu, aua afai ae tula’i mai se mataupu faapea, o le fesili e tula’i mai, o a ni manatu e oo i le fanau a le tagata lea ua fana sese e le leoleo,?” o le saunoaga lea a Magalei.

 

Saunoa Laolagi e faapea, e ui ua tele naua fana e le faatagaina ua maua i totonu o le atunuu, ae o le mea moni lava e le o lava faalavelave matuia ua tutupu e ono mafai ai ona lagolagoina se manatu, ua tatau ona fa’aaupegaina leoleo.

Comment Here