Fautua Kovana i lana Kapeneta e faalauiloa a latou galuega

O le fonotaga mulimuli a le Kapeneta na faia i le vaiaso na te’a nei, i le maota o Tauese P.F Sunia i Utulei, sa fautuaina ai e le alii kovana ia Lolo Moliga faatonusili ma faauluuluga o matagaluega ma ofisa uma a le malo, ina ia amata tapena a latou ripoti mo le faalauiloaina o galuega ua mafai ona latou ausia i le tausaga galue lenei.

 

O le taua o ripoti e pei ona faamalosia e le alii kovana, o le a mafai ai ona silafia e le atunuu atoa tulaga o galuega ua ausia e matagaluega taitasi, i le taimi e saunoa ai i luma o le Fono Faitulafono, mo le tatalaina o le isi tauaofiaga i le masina fou.

 

“Afai e leai sau ripoti e tuuina mai, lona uiga e atagia mai ai e leai ma sau galuega sa faatinoina i le tausaga atoa,” o le saunoaga lea a Lolo ma ia talosagaina ai ripoti ina ia faaoo atu i lona ofisa i le aso Faraile na te’a nei.

 

Na taua e le alii kovana le tele o galuega fou ua mafai ona ausia e nisi o matagaluega a le malo, ma o galuega uma ia e tatau ona aofia i totonu o le ripoti.

 

FESOASOANI MO TAGATA FILIPAINA

 

O le piriota totogi faaiu a le malo mo lenei tausaga o le a faamaopoopo ai loa le fesoasoani tupe a le malo o lo o taumafai e tuu faatasia ai le fesoasoani mo tagatanuu o le malo o Filipaina, lea na aafia o latou aiga ma maliliu nisi, ona o le faalavelave faalenatura lea na aafia ai le atunuu i le masina na te’a nei.

 

O le masina na te’a nei na faatulaga e le alii kovana e tatau ona faamuta ai lenei foa’i, ae talu ai e lei maopoopo uma atu fesoasoani a isi ofisa a le malo, ua mafua ai loa ona toe tolopo lenei fuafuaga seia aulia le vaiaso mulimuli o le masina lenei o Tesema.

 

I le fonotaga a le kapeneta, na toe fautuaina ai e Lolo ana faatonusili ina ia faamaoni i le latou foa’i, ma ia fai le mea sili mo a latou matagaluega.

 

Ae na taua e se tasi o sui o le kapeneta e le’i finagalo e faailoa lona suafa e faapea, sa le tatau i le alii kovana ona faia lenei fuafuaga e aofia ai ma tagata faigaluega, aua e le o tagata faigaluega uma a le malo e fia foa’i i tulaga faapenei.

 

“Ana saunoa sa’o mai lava le kovana ia matou nei o sui o le kapeneta, e tofu matou ma le ta’i $100 e avatu mo le fesoasoani i Filipaina, o se tulaga talafeagai lea aua e pule le kovana i le kapeneta, ae o le taumafai e faamalosia tagata faigaluega e avatu tupe mo le fesoasoani, o isi tagata o lo o lafo ma le faamaoni ae o is tagata e pule lava latou pe lafo se .50sene pe leai fo’i se tupe e lafo,” o le saunoaga lea a molimau.

 

TALANOAGA MA LE SUI FALETUPE HAWAII

 

E tasi le mafuaaga na faailoa e le alii kovana i luma o le kapeneta, na mafua ai ona a’e se manatu latou te fetufaa’i ma le pulega o le faletupe o Hawaii i le setete o Hawaii i le vaiaso na te’a nei, o le manatu lea ia mautinoa o lo o faaauau pea le auaunaga a le faletupe mo le atunuu, ae aua ne’i motusia faafuase’i, ina nei motusia ai ma fesootaiga ma faletupe a le malo tele.

 

E ui ua maea ona faalauiloa e le alii kovana tulaga sa i ai a latou talanoaga ma taitai o le faletupe, ae i luma o le kapeneta, sa ia saunoa ai e faapea, o le tiute o le malo o le mautinoa lea o lo o maua e tagatanuu auaunaga ma tautua talafeagai mo i latou i aso fai soo.

 

Na faafetaia e nisi o le kapeneta le moe manatunatu o le alii kovana i tulaga lelei e manuia ai le tamaoaiga o le malo aemaise ai le manuia o tagatanuu.

 

TALIA NISI O FAATONU LE FINAGALO O LE ALII KOVANA

 

Na taua e isi sui o le kapeneta a le kovana i le Samoa News i le aso Faraile na te’a nei, lo la lagolagoina o le finagalo o le alii kovana sa faailoa i le fono a le kapeneta  i le tulaga sa’o e tatau ona valaau ai laua ma lona faletua i soo se mea fai a le malo, faapea fo’i le lutena kovana ma lona faletua.

 

E le’i finagalo sui ia e toalua o le kapeneta e faalauiloa o la suafa, ona o manumanuga i ono fesiligia ai le mafuaaga o la finagalo.

 

Ae na taua e le isi toatasi o i laua e faapea, e mafua ona faaaoga e isi sui o le kapeneta poo le malo upu faaviivii e faalagilagi ai taitai o le malo, e le gata e le malamalama ae o isi fo’i taimi ua tumu i le tau faasee.

 

E talitonu i laua, e talafeagai lava le faalagilagi o le taitoalua o le kovana ma le lutena kovana, o i laua o faletua, e faapena foi i le kovana ma le lutena kovana, o le afioga e tatau ona faalagilagi ai i laua e ui e manino i tulaga faaleaganuu, o Lolo o le tootoo.

 

Comment Here