Fautua Faipule pulega a le ASTCA ina ia galulue fa’atasi

O ni isi o fautuaga sa tuuina atu e ni isi o afioga i faipule i le Ta’ita’ifono o le Komiti Fa’afoe a le Ofisa o Feso’otaiga a Amerika Samoa (ASTCA) susuga Roy J.D. Hall Jr, ma le Pulesili o o lea ofisa ia Moefa’auo Bill Emmsley i se iloiloga sa faia i le vaiaso nei, e tatau ona galulue fa’atasi le Komiti Fa’afoe ma le Pulesili.

 

Saunoa le afioga i le ali’i faipule mai Manu’a #1 ia Fetu Fetui Jr, e le o se tulaga lelei le fa’afofoga ma vaavaai atu le atunuu o lo o feeseesea’i le Komiti Fa’afoe ma le Pulesili o le ASTCA i le fa’atinoina o a latou tiute ma fa’aiuga fai.

 

“Na tofia outou e tautua i le atunuu ma le malo, ae le o se tulaga lelei le vaavaai atu o le atunuu ma faalogologo atu le Fono Faitulafono, o feeseesea’i mai outou i le fa’atinoina o a outou tiute, afai e mana’omia se auala e fa’aleleia atili ai le auaunaga a le ASTCA mo le atunuu, e mana’omia le galulue soosoo tauau o le Komiti Fa’afoe ma le Pulesili o le ASTCA,” o le fautuaga lea a Fetui sa ave ia Hall ma Moefa’auo.

 

Ae na fautua le afioga i le ali’i faipule ia Atualevao Gafatasi Afalava ia Hall e fa’apea, “tuu se avanoa i le ‘CEO’ na te faia ai fa’aiuga e tusa ai o lana galuega ma le malosi ua tuuina atu ia te ia na te pulea ai le Ofisa, e mana’omia fo’i ona fa’aleleia le lua va i tulaga o galuega fa’atino, atoa ai ma le mana’omia lea o le lua galulue fa’atasi.”

 

O Moefa’auo ma Hall na molimau i luma o le Komiti o le Fa’agaioiga o le malo a le maota o sui, mo le vaega lua o le iloiloga sa amata mai i le lua vaiaso talu ai, e fa’atatau i le tosoina mai o le uaea o feso’otaiga, lea ua fa’amoemoe e tatau ona mae’a i le faaiuga o le tausaga nei.

 

E anoanoa’i mataupu na fesiligia e afioga i faipule i le taimi o le iloiloga, e le gata o mataupu e fa’atatau i galuega e maua mai i le tosoina o laina e pei ona galulue ai le konekarate mai Amerika, le Michels Communications, ae o mataupu fo’i e fa’atatau i tagata faigaluega ua a’afia a latou galuega ona o fa’aiuga fai a ta’ita’i o le Ofisa.

 

Mo se fa’ata’ita’iga e pei ona saunoa le afioga i le ali’i faipule ia Fatulegae’e Palepoi Mauga, o se tina ua ova i le 20 tausaga o galue i le ASTCA, ae ua aveese mai le tulaga sa galue ai, ae sui atu i ai se isi tagata faigaluega.

 

Saunoa atili Fatulegae’e e fa’apea, e tusa ai ma le fa’asea a lea tina ia te ia, sa ia talosaga ia Moefa’auo mo se avanoa la te nonofo ai i lalo ma soalaupule le tulaga o lana galuega ae sa musu le Pulesili e ofo i ai lea avanoa.

 

“E le sa’o lea tulaga o le alu atu o se pule fou i totonu o se Ofisa a le malo, ona ia faia lea o ni suiga fa’afuase’i e a’afia ai le lumana’i o tagata faigaluega ua tele tausaga o galulue mo le manuia o lea Ofisa,” o le isi lea saunoaga a Fagulegae’e ia Moefa’auo.

 

Ae i le mataupu e fa’atatau i le tama’ita’i sa pulea le vaega o Fefa’atauaiga a le Ofisa lea ua fa’amalolo, na taua e Va’amua Henry Sesepasara e fa’apea, o le isi mafuaaga na ala ai ona fa’amavae lea tama’ita’i mai lana galuega, e le i tuuina atu e le Pulega se avanoa ia te ia na te fa’amalamalamaina ai lana ripoti i se fonotaga a le Komiti Fa’afoe sa faia.

 

Na saunoa Hall e fa’apea, na te le i iloaina sa mana’o le tama’ita’i lea i sona avanoa e fa’amalamalama ai lana ripoti i luma o le fono a le Komiti sa faia, ui o lea, sa ia viia galuega lelei sa faia e lea tama’ita’i a’o galue ai i le Ofisa, e pei o lona tu’u fa’atasia o le fa’aaliga mo le ‘Laughing Samoans’.

 

Na fa’ai’u le saunoaga a Va’amua i lona fa’ailoa ia Hall ma Moefa’auo, e le gata ai i le tulaga lea le mataupu e fa’atatau i le tama’ita’i lea, ae o le a i ai le isi la’asaga e sosoo ai, e ui na te le i fa’ailoaina po o le a lea la’asaga.

 

Na fesili Taotasi Archie Soliai i molimau pe toe fia ni nonogatupe o lo o tau totogi e le ASTCA i le taimi nei, ae pe fia fo’i se tupe o le poloketi mo le tosoina o le uaea (fiber optic) fa’aaoga talu ona amata lea galuega, ae na tali Hall, o le nonogatupe e $10 miliona sa fai mo le falema’i o le LBJ, toe $7 miliona ma ona tupu o lo o totoe, ae mo le poloketi  o le fiber optic, ua tusa ma le $30 miliona le tupe ua fa’aaoga talu ona amata mai le galuega i le masina o Fepuari.

 

Na fa’afetaia e le ali’i faipule ia Vailoata Amituana’i le avanoa ua mafai ai ona galulue faatasi le konekarate a le Michel ma tagata faigaluega a le ASTCA, ua mafai ai ona maua e tagata faigaluega a le ASTCA le avanoa latou te aoaoina ai le tomai mai tagata faigaluega nei mai fafo, i auala e fa’atino ai ituaiga galuega faapenei.

Comment Here