O le sailia o ni auala e foia ai le fa’afitauli ua tele tausaga o pagatia ai ni isi o le itumalo o Tualauta i lologa pe a tetele tafega, ua talosagaina ai e le afioga i le tamaitai faipule ia Vui Florence Vaili Saulo le kovana sili, ina ia faatula’i se Komisi Faapitoa latou te iloiloina auala ma metotia e foia ai lenei faafitauli.

Na taua e Vui i lana tusi i le tofa Lolo Matalasi Moliga i le vaiaso nei e faapea, e i ai lona talitonuga o lona tiute faaauau lea e tatau ona faia pea i ituaiga mataupu faapenei, e ui o ni mataupu ua tele taimi o faafofoga i ai le kovana ma le malo.

O se tasi o feiloaiga a Vui ma Lolo i ni nai masina e lei mamao atu e faatatau i tulaga faaletonu o lo o i ai auala i totonu o le itumalo, na faailoa ai e le alii kovana sona finagalo ia Vui e faapea, o se tulaga lelei pe afai e mafai e ni isi o le itumalo ona fesoasoani i le matagaluega o galuega a le malo i le fausiaina lea o auala, e pei foi ona faia e ni isi o afioaga i le atunuu i le itu i Sasa’e.

I le isi ana tusi ia Lolo i le vaiaso na tea nei, na faamaonia ai loa e Vui le ofoina atu e ni isi o le itumalo o le avanoa e fesoasoani ai i le malo mo le fausia ma le faaleleia o ni isi o auala i totonu o le itumalo

O le auaunaga na taua e Vui o le a maua mai i le itumalo o le faatinoina lea e i latou o le galuega ae sapalai mai e le malo vaega uma e faatino ai le galuega i Faleniu ma Kokoland.

Ae i lana tusi i le vaiaso nei i le alii kovana na taua ai e Vui e faapea, o le itu taua i le filifilia o se Komisi latou te iloilo ma vaavaai i auala e foia ai le faafitauli i lologa, o le a mafai ai ona latou tuu faatasia ni auala mautu e le toe mafai ai ona toe aafia lea vaega o le itumalo i lologa, ma o ni isi e talafeagai ona i ai i totonu o le Komiti o faauluuluga ia o ni isi o matagaluega a le malo e pei o le EPA, Ofisa o Galuega Lautele, Soifua Maloloina, ASPA, Ofisa o Fefaatauaiga ma Alamanuia, Samoan Affairs ma le Ofisa o Tupe a le malo.

*I le maea ai ona faaalu o ni isi o a’u mea totino e fesoasoani ai i aiga na aafia i lologa ua mavae atu, faapea ai ma le asia o nofoaga o lo o nonofo ma aumau ai i latou nei, na ou manatu ai loa, e manaomia lava se auala tumau e foia ai lenei faafitauli nai lo le taumafai o le tagata e toatasi e tauave lenei galuega tele,* o se vaega lea o le tusi a Vui i le alii kovana.

Sa ia taua foi i le alii kovana e faapea, o le fausia o auala e foia ai le faafitauli i Tualauta, e moomia ai e galulue faatasi o le malo ma taitai faaleaganuu o le atunuu.

*O le galuega lenei e tatau ona galulue uma ai lava tagata uma, e amata mai lava i taitai o le malo, faasolo mai ai i faauluuluga o ofisa ma matagaluega a le malo, sosoo ai ma faipule atoa ai ma tagatanuu uma o le atunuu,* o le saunoaga lea a Vui.

Ae i le vaavaai i ai o le tamaitai faipule i le faafitauli o lologa o lo o aafia ai le itumalo, sa ia taua i lana tusi ia Lolo e faapea, o le faafitauli e le na o le lologa o lo o aafia ai, ae o lo o aafia ai foi ma le faatamala o i latou na muamua atu i le faatinoina o a latou tiute tauave.

Na taua e Vui e faapea, o le faaletonu i le taitaiga aemaise ai o le le lava o alagatupe e faatupe ai galuega nei, o le isi lea auala ua mafua ai ona tulai lenei faaletonu, ma o se tulaga e faamomoi loto ma faanoanoa ai pe a vaavaai atu i lenei tausaga i le toatele o aiga o lona itumalo o lo o i ai pea i lenei tulaga faaletonu, ae o le itu e leaga ai, o le tele o nei aiga ua fia tausaga o nonofo ai lava i lenei faaletonu, ina ua latou iloa e leai lava se tasi e mafai ona faia se auala e folia ai lenei faafitauli.

E le gata la i aiga o lo o aafia i lenei faafitauli, ae o o lava foi i pisinisi ua pagatia ai i latou i le itu tau tupe, ina ua tele se vaega o a latou pisinisi ua faaleaga talu ai o lologa ma tafega i le tele o tausaga, ma ua avea ai ma itu ua tapunia ai ni isi o pisinisi, ma maua ai le avanoa i fanau e savavali ai i le palapala ma alavai i le mamao e faatau.

I le tele ai o tausaga o pagatia pea le itumalo, na taua ai e Vui ia Lolo e faapea, ua o o i le taimi ua tatau ai ona fai se gaioiga e foia ai lenei faafitauli.

E manatu le tamaitai faipule, o se isi lologa lata mai o le a toe pagatia ai foi le itumalo i le tetele o tafega, ae o le itu pito sili ona taua, e leai lava se soifua o ma’imau ai, peitai e le tatau ona faatali se’i tula’i mai se faalavelave matuia faapea, ae ua o o i le taimi ua tatau ai ona fai se auala e foia ai lenei faafitauli.