Fautua e Saleapaga le tapunia tautua a le ‘Primary Care Clinic’

Ua fautuaina e le Foma’i Sili o le Falema’i a le LBJ ia Dr. Iotamo Saleapaga le Pulega o le Falema’i ma le Komiti Fa’afoe, le tatau lea ona tapuni le tautua a le Primary Care Clinic a le falema’i, ona ua tau leai ni tagata o le atunuu e mana’omia lea auaunaga.

 

I se tusi a Saleapaga sa tuuina atu i le Taitaifono o le Komiti Faafoe ia Mase Akapo i le aso 5 Tesema 2013, e le gata o lo o ia faamanino ai nisi o mafuaaga ua ala ai ona a’e se manatu e taofia loa lea auaunaga, ae sa tuuina atu ai fo’i ma lana fautuaga i le fesuia’iina o tagata faigaluega o lo o galulue i le Primary Care Clinic, ina ia tofia e galulue i isi lala o le falema’i mo le faaauauina ai o le latou tautua.

 

Na taua e Saleapaga e faapea, o le mafuaaga e tasi na ala ai ona faavae le tautua a le Primary Care Clinic i totonu o le falema’i i tausaga ua mavae, o le fesoasoani lea i le togafitiina o gasegase e togafitia i le potu mo gasegase tigaina, peitai i le taimi nei, ua na o gasegase e faatulaga aso e o atu ai e vaai le foma’i o lo o mafai ona vaai ai.

 

I ni faamaumauga na tuuina atu e Saleapaga ia Mase, o lo o taua ai e faapea, i le tausaga e 2012, e 116,450 le aofa’i o gasegase sa mafai ona vaaia i lala uma lava o le falema’i, ae i le tausaga lenei, e na o le 95,000 le aofa’i o gasegase sa mafai ona vaaia ma togafitia i le falema’i, ma tula’i mai ai le aofaiga e 20,000 ua faaitiitia ai le aofa’i o gasegase sa vaaia i le tausaga lenei nai lo le tausaga ua mavae.

 

O le 2011 e 118,954 gasegase na vaaia ma togafitia i le falema’i, o le 2010 e 106,940, ma le 2009 e 116,142.

 

I le itu tau tupe e pei ona taua e Saleapaga, e foliga mai e tele se vaega tupe e le o mafai ona maua e le falema’i, ona ua faaitiitia le aofa’i o gasegase e manaomia lana tautau.

 

“E tusa ai o faamaumauga ua ou tuuina atu, ou te talitonu ai, o foma’i o lo o galulue i le falema’i i le taimi nei o lo o lava ma totoe, sei vagana ai le toe fetuuna’i o tagata faigaluega ina ia toatele atu e galulue i vaega o lo o tele ai galuega ma tautua e moomia,” o se vaega lea o le saunoaga a Dr. Saleapaga.

 

Ae mo le Primary Care Clinic lava ia e pei ona saunoa le alii foma’i, pe a ma le 4946 le aofa’i o gasegase e mafai ona vaaia i le tausaga e tasi mo le lima tausaga ua tuana’i atu.

 

I le tausaga lenei 2013, e toatolu foma’i o lo o galulue i le Primary Care Clinic atoa ai ma le tagata faigaluega e toatasi, ae toa 4,780 gasegase sa mafai ona vaaia i le tausaga lenei, ma e foliga mai e 435 le aofai o gasegase sa vaaia ma togafitia i le masina e tasi, tusa lea o le 109 gasegase e vaai e le foma’i e tasi i le masina, tusa lea o le toa 5 gasegase e vaaia i le aso.

 

Na taua e le alii foma’i e faapea, o faamaumauga e pei ona taua, e matua maualalo lava pe a faatusatusa i fuainumera o lo o maua mai i isi lala o le falema’i.

 

“I le tuuina atu ai o faamaumauga e pei ona taua, ua ou fautuaina malosi ai le tatau lea ona tapunia loa le auaunaga a le Primary Care Clinic,” o le saunoaga lea a le alii foma’i.

 

O nisi o mafuaga o le tapunia o le Primary Care Clinic e aofia ai le toa laiti o gasegase o lo o mafai ona vaaia e lea vaega i le aso; toatele tagata faigaluega i totonu o le vaega lea; ua latou toe faaauauina le tautua o lo o faia e isi vaega o le falema’i; toe alu ai ma tupe a le falema’i.

 

Ua fautuaina fo’i e le alii foma’i le fesuia’i o tagata faigaluega e toalua mai le vaega lea, ae tuu atu e galulue i le vaega a le Internal Medicine.

 

Na taua e Saleapaga e faapea, o lana fautuaga ua tuuina atu ua faia mo le manuia o le falema’i ma lana auaunaga i le atunuu.

Comment Here