Ads by Google Ads by Google

Fausia Maota mo Fitafita Tuai i Tafuna

E le o toe umi se taimi ae maea le galuega mo le fausiaina lea o le maota o fitafita tuai i Amerika Samoa, lea e aofia ai ma le fausiaina o le maa faamanatu mo fitafita tuai.

Ina ua fesiligia le fa’auluuluga o le aufaigaluega, i se taimi e ao ina mae’a ai lea galuega tele, ae sa ia fa’ailoa mai, “Ua fa’atulaga le galuega lenei ina ia tatala i le Masina Fou, o Novema lea!”

O se tala mai a le ali’i ta’ita’i sifi Kamuta, Kamilo Sio, o se tama matua fo’i i le galuega, sa ia fa’ailoa ai, “E matou te le tu’ua i lalo le fanoga o le afioga le Kovana Sili Togiola Tulafono, aua o le toe galuega lenei e ao ina tatalaina aloaia e ia, ona malolo mai ai lea i le tofiga a le Malo.”

E ui la ina ua va’aia e le’i atoina le fale, ae o totonu i ona potu ma le fola ua mae’a fa’asima leleia uma, ae tatalia ai le taualuga atoa.

“O lo’o tatalia le to’ai taunu’u mai o ituaiga apa anagata fo’i ia, lea e fa’apea e ato ai le fale lea, sa oka sa’o lava i fafo e le matou fa’atonu, Punaofo Tilei. Ua fa’ailoa mai e tauau e to’ai taunu’u mai i le vaiaso a sau, ona mae’a loa lea o le fale latou, ae sauni ai mo anofale!”

Sa ia fa’ailoa fo’i e tusa o le ma’a fa’amanatu, “O le ma’a fo’i e le toe atoa se 4 vaiaso o le galuega o totoe mo le ma’a, e toe lua fogafale e atoa i ai le 7 o fogafale o le Ma’a, ona atoa lea, ae na’o le palu lava o le sima latou ma utu atu, ona fa’ama’a fo’i lea o fafo, i mea lava ua mae’a fa’atulaga mo le mananuina o le ma’a e le vasega o lo’o faia le ata o lea galuega taua.”

Ona ua toe pau lea o le galuega, ma le fale o le Ofisa o le DHSS i Utulei lea e fa’atino e le latou vaega o tagata faigaluega i le Maintenance & Operations a le Public Works a le Malo, o lea ua matua mautu le fa’amoemoe o Kamilo Sio, se tama ta’ita’i Kamuta ua matua, ae o lona loto ua i le galuega ia mae’a, “E le to’ilalo le vaega lenei i le fanoga ua lafo mai, e ui fo’i i le vevela o le La ma le timuga, ae le fo’i le matagaluega galulue mo le fa’aleleia o meatotino a le Malo. E sili lava i o matou mafaufau i aso uma e galulue ai, O le toe galuega lenei mo Kovana Togiola e na te tatalaina, ona se’e atu ai lea e malolo, ae suia mai fo’i se nofoa’iga fou!”

O le tala lea, ua iloga, a fa’apea ua loto, e leai se mea e le mafai ona fa’atino i lona taimi, ma ua agava’a ai le malo e ausia ana matatia fa’ata’oto i so’o se mea. Ua manatu fo’i le Kovana ia i’u lana lea galuega mo Fitafita Tuai uma a Amerika Samoa sa gapatia i le auaunaga i vaega eseese o le Defense a le Malo tele.

O le sao lea o le Malo mo le VA ina ua toina lenei eleele mo le fa’amoemoe e fa’atula’ia ai ma le latou Ma’a Fa’amanatu ae tu’ua le fale tuai o lo’o soso’o ma le OMV mo nisi fuafuaga a le Malo. O lea faiga fou, sa o’o lava i le fa’amasinoga ona finauga, peita’i, o lo’o malolo le vaega ale VA, ma ua tatau ai ona mautu le pine fa’amau a le Kovana i lana toe galuega mo Fitafita Taui.

O le manulauti o lea galuega, “E tomuli lava galuega i le  mea sili.”