FAUMUINA: Ua oi le atunuu i le tele o suiga a le malo

O le tele o suiga eseese ua faia e le malo e pei ona taua e le afioga i le alii Senatoa ia Faumuina Tagisiaali’i, ua mafua ai le tele o le oi o tagata, ina ua le ta’ita’i e le faigamalo le atunuu e tusa ai ma latou folafolasaga faia, ae ua ese le mau suiga ua latou faia, lea e pei ona taua e le alii senatoa i le taimi o folafolaga a le maota maualuga i le aso Lua na te’a nei.

 

E ui e le i taua e le alii senatoa ituaiga suiga o lo o faatatau i ai lana saunoaga, ae sa ia taua faalaua’itele e faapea, afai ua folafola e le malo lo latou taumafai e tautua le atunuu ina ia manuia, e le tatau la ona latou faia ni mau suiga e pologa ai tagata.

 

Mai le tele o suiga eseese ua faia e le malo mo le manuia o le atunuu, o se tasi o suiga fou na faalauiloa e le Faatonusili o Aoga o lo o fuafua le Matagaluega o Aoga e faia, o le tasi lea o le sauniga e tuu faatasi uma ai faauuga a vasega faauu a le malo mo lenei tausaga mo Tutuila.

 

O lea fuafuaga faataoto e pei ona saunoa le faatonusili o aoga, Vaitinasa Dr. Salu Hunkin-Finau, e le gata o le a faasaoina ai le taimi ae o se avanoa fo’i lea i le atunuu atoa e o atu faatasi ai i le lagolagoina o le aso faapitoa mo fanau aoga i le atunuu.

 

Ae na taua e le faufautua faapitoa a le kovana ia Iulogologo Joseph Pereira e faapea, e le i faia se faaiuga a le alii kovana pe na te taliaina le fuafuaga faataoto.

 

Ina ua faatoa tula’i mai Vaitinasa i le tofi faatonusili i le tausaga na te’a nei, sa ia faia ai fo’i se isi suiga fou i auala e faatino ai faauuga a fanau aoga, ma o se suiga e le i nofo lelei i finagalo o le to’atele o matua, ae sa matua lagolagoina e le Asosi a Matua ma Faiaoga (PTA) a aoga maualuluga i le atunuu.

 

O le suiga tele sa faia i le tausaga na te’a nei, o le faaitiitia lea o taimi o faauuga a aoga i le na o le 90 minute, e ala i le na o le faalauiloa o i latou ua faauluulu i ai vasega fa’auu, e aunoa ma le toe faia o ni lauga a i latou nei e pei ona masani ai i le tele o tausaga.

 

O faafitauli na tutupu mai i le auala lea i tausaga ua mavae, o ni isi o taimi e sili atu ai i le to’atasi fanau aoga e faauluulu i ai vasega faauu.

 

Na taua e Vaitinasa e faapea, o le suiga fou sa faia i le tausaga na tea nei, sa matagofie ma lelei ona o le lagolago malosi atu a puleaoga ma faiaoga, faapea ai matua ma tamaiti aoga.

 

Ae mo suiga fou e pei ona faataoto mai e le ofisa o aoga, na saunoa ai Vaitinasa e faapea, sa la fetufaa’i ma le alii kovana e faatatau i lea tulaga, ina ia faataunuu le faauuga a le aoga maualuga i Manu’a i le aso 9 Iuni, ae tuu faatasi ai faauuga mo aoga maualuluga uma i Tutuila nei i se sauniga e tasi, lea ua fuafua e faia i le aso 11 Iuni i le malae taaalo i Tafuna.

Comment Here