Ads by Google Ads by Google

FASI TELENOA SI FAFINE I LUMA O LONA ‘AUNTY’

O le ula lea na ia fasi faa telenoa lona toalua (tulou) i luma o le ‘aunty’ o si fafine, ua molia nei e le malo i le moliaga mamafa o le faaoolima i le tulaga lua, ma ua taofia nei i le falepuipui sei vagana ua totogi le $10,000 ona faatoa mafai lea ona tatala i tua.

Ua silia ma le lua tausaga talu ona tulai mai lenei faalavelave, peitai o le vaiaso nei lea faatoa faila ai e le malo moliaga faasaga i le alii o lo o molia.

E le o mafai ona faalauiloa le igoa o le ula lea ona o puipuiga lava i le ono mafai ona iloa atu ai ma lona toalua o lo o aafia i lenei mataupu.

O le vevesi na mafua mai ina ua fo’i mai le fafine mai lana tafaoga i le po o le aso Toonai, 15 Me, 2010, o se pati sa maua ai sona valaaulia, ae tei ina ua oo mai i le fale ae amata loa ona faaisaisa atu lona toalua ma i’u ai lava i le fasi o ia.

Na amata le vevesi i se taugaupu a le ulugalii, ma faaiu ai loa i le tuliga na oo i tai i le sami, ma toe foi mai ai i totonu o le fale, ma faaaoga ai loa e le ula lea le uaea o le ili e alu i le eletise e fasi ai lona toalua.

O le tino, lima ma vae o le fafine na leaga uma i le uaea e pei ona taua i faamaumauga a le faamasinoga, ina ua faaoga e le ua molia e sasa ai lona toalua.

Na ona maua lava e le fafine o le avanoa  e sola ese ai, oso loa i le faamalama o le la fale ma lona toalua ma agi loa agai i le fale o lona ‘aunty.’

Ae na faailoa e le ‘aunty’ i leoleo e faapea, i le taeao o le aso na sosoo ai, na te’i ai a’o moe ina ua ia faalogoina si ona niece o lo o tauvalaau atu i lona igoa e fia maua se fesoasoani.

Na tu i luga le ‘aunty’ ma sau i fafo o lona fale, ma ia vaaia ai si ona niece o lo o taatia telenoa i luga o le mutia ae o lo o fasi e le ua molia, o lea na ia valaau atu ai loa i le tamaloa e soia ua lava, ae o le taimi foi lea sa ia faalogoina ai si ona niece o valaau atu ia te ia, “Aunty (ta’u e le fafine le igoa o lona ‘aunty’) ta fia ola.

Na alu atu le ‘aunty’ ma toso ese le ua molia ma taitai i le isi itu, ma maua ai loa le avanoa o le na aafia e tulai ai i luga, ma ia faamatala i lona ‘aunty’ e faapea, o le po atoa lava lea na tulai mai ai le faalavelave, sa fasi ai o ia e le ua molia.

Ina ua fesiligia e leoleo le ua molia e uiga i lenei faalavelave, sa ia tautino ai e faapea, e sa’o sa ia fasia lona toalua, ae le’i mana’o o ia e fai sana faamatalaga tusitusia.