Ads by Google Ads by Google

FASI LE FAFINE AI U VALEA TUPE O LE LAFOGA

Na faatoa manino le mata o le vai i le mafuaaga na fasi ai e se alii lona to’alua i le vaiaso na te’a nei, o lona ai u valea lea ina ua leai se tupe o le lafoga a lona to’alua na ave ma lona tina, ae na faaaoga e le fafine le isi vaega o lana lafoga e fai ai faatau mo le aiga, o lavalava a le la fanau ma le tupe sa lafo i ona matua i Savai’i.

Na ona manino lava i le faalogo a le ula lea ua lafo e le fafine le tupe i lona tina ae leai se tupe mo ia, alu loa ua ‘ona mai i le leva o le po, ma alu atu ai i le fale ua faamisamisa ma i’u ai lava i le fasi ai ma si fafine fai mai ua leai se meaai e tuu atu ma ia, ae emo ane le ata o le ai u valea i tupe o le lafoga.

O le iuga la o le tagata ai u valea o le moe lea i luga o le sima i le falepuipui mo po e lua, e faatali ai le taimi e tulai ai i luma o le faamasinoga faaitumalo.

Na teena e le alii ua molia tuuaiga o le faatupu vevesi i totonu o lona aiga e pei ona tuuaia ai o ia e le malo, ma ua toe faatulaga le isi ana iloiloga i le vaiaso nei ma le faamoemoe, o le a faila ai e le malo moliaga faaopoopo faasaga ia te ia.

Ua toe toe tatala i tua le ula lea mai le falepuipui peitai ua faasa e le faamasinoga ona toe alu i le fale o loo nonofo ai lona toalua ma le la fanau, ae ua faatonu e alu e nofo i se isi noifoaga, ma aua nei ona toe taumafai e faafesootai le fafine i soo se auala.

Na faailoa e molimau i leoleo, na latou tete’i i le leva o le po ae ee mai le fafine i le fiaola, ma latou taufetuli atu, o loo siou le ‘ona i le ta tu’iina lea o foliga o si ona to’alua a’o matamata i ai si ana fanau e to’alua.

Ua faailoa e le fafine i lana loia, o ia ua le toe manao e nonofo ma lona toalua, e le o se taimi muamua lea ua ia fasia ai o ia a’o matamata si ana fanau.