Ads by Google Ads by Google

FASI FA’AMO’AMO’A E NI ALI'I SE 'AVE PASI

Na avea le le alu o le pasi a se ali'i 'ave pasi e 58 tausaga le matua i Aua ma itu na tula'i mai ai se fe'ese'eseaiga i le va o ia ma ni ali'i se to’alua, ma iu ai loa i le fasi fa'amo’amo’a e ali'i ia le 'ave pasi ma manu’a tigaina ai e pei ona ta'ua i fa'amaumauga a le fa'amasinoga.

Fai mai le ripoti a leoleo, na gau le nifo e tasi o le 'ave pasi fa'apea ai ma se ta’e i lona foliga, lea na mana’omia ai filo e 8 e tau su’i ai, ona o le osofa'iga sa faia e Leo Fa’afua ma Kaloloa Jr. Semaia fa'asaga ia te ia.

E tusa ai ma fa'amaumauga a le fa'amasinoga o lo o ta'ua ai e fa'apea, o Semaia ma Fa’afua sa i ai i le maketi i le taimi na tula'i mai ai lenei fa'alavelave i le aso Lulu na te’a nei, ina ua fesili Fa’afua i le 'ave pasi pe alu lana pasi i Aua, ae na tali le 'ave pasi, leai.

O le taimi lea na e pei ona taua i tu'uaiga a le malo fa'asaga ia Fa’afua, na palauvale ai loa le ua molia i le 'ave pasi,  peita'i sa fa'apea fo'i ona palauvale mai fo'i le 'ave pasi ia Fa’afua ma fa'aoso i le atoa lana pasi.

I le afiafi o le aso lava lea ao fa'atali pasi le to'alua lea, sa la va'aia ai le pasi a le ua a'afia ua toe aga'i mai, o lea na la fa'atu ai le pasi, ma aga'i atu ai loa Fa’afua i totonu o le pasi ma tu’i le 'ave pasi, ae o Semaia na ui ane i le itu o le fa'amalama ma taumafai e toso atu le 'ave pasi e pei ona tu'ua'ia ai o ia e le malo.

Ina ua mae'a gaoioiga ia a le 'au ali'i ia e to'alua e pei ona ta'ua i fa'amaumauga a le fa'amasinoga, na aga'i atu ai Semaia ma se ma'a ma togi ai le tioata o le pasi ma ta’e ai.

Na mafai ona sao 'ese mai le 'ave pasi mai gaoioiga a le 'au ula  ia ma fa'asasa’o atu ai loa i le ofisa o leoleo i Fagatogo ma faila ai lana tagi fa'asaga i le 'au ali'i ua molia nei.

Na te'ena e Semaia ma Faafua moliaga fa'asaga ia te i la'ua ina ua tutula'i i luma o le fa'amasinoga fa'aitumalo i le vaiaso nei, i lo la te'ena ai o tu'uaiga a le malo, ua fa'atulaga ai loa le isi a la'ua iloiloga i le vaiaso fou.

O lo o tu'ua'ia uma i la'ua nei i moliaga o le fa'atupu vevesi i nofoaga faitele ma le fa'ao'olima i le tulaga tolu, atoa ai ma le isi moliaga o le fa'aleaga meatotino fa'asaga ia Semaia.

Na fa'ailoa e le loia a le malo o lo o taulima lenei mata'upu, le ono mafai lea ona faila o ni isi moliaga fa'aopoopo fa'asaga i lenei mata'upu, pe afai e mae'a ona faitau ma au'ili'ili atili le ripoti a leoleo e uiga i le mea sa tupu.

Ua poloaina e le fa'amasinoga i la'ua ua molia ina ia aua nei o la toe taumafai e fa'afeso'ota'i le ali'i 'ave pasi i so o se 'auala, ao fa'agasolo ai le la mata'upu. Ua fa'asa fo'i ona la toe soliina se isi tulafono, a ia feso'ota'i vavalalata ma lo la loia i so o se taimi e vala'au ai le la mata'upu.