Ads by Google Ads by Google

Fasi e se alii lana uo teine ae fesoasoani i ai lona tina

O se ali’i e 20 tausaga le matua, lea ua tuuaia i le fasiga o lana uo teine, i le faaiuga o le vaiaso na te’a nei, ae fesoasoani atu i ai ma lona tina, ua poloaina e le faamasinoga i laua ina ia aua nei o la toe taumafai e faafesootai le tamaitai o lo o aafia i lenei mataupu, ma ia o la tausi le filemu i taimi uma.

O le taeao ananafi na tutulai ai i luma o le Faamasinoga Faaitumalo le alii o Mathew Pese ma lona tina o Miriama Pese, ma o la teena moliaga o le faaoolima i le tulaga tolu ma le faatupu vevesi i nofoaga faitele, ua tuuaia ai i laua e le malo.

O lenei mataupu na tofu atu i le Ofisa o Leoleo i le aoauli o le Aso Toona’i na te’a nei, Novema 24, 2012.

O le vevesi na tulai mai ina ua foi mai Mathew, o lana uo teine, o Britta Ioane,ma le la tama e tasi le tausaga le matua sa matamata i taaloga soka i Pago Pago, ma le faamoemoe o le a latou o i le latou fale, peitai na faatu e Mathew le pasi i Matuu ma le faaupuga, e fia alu e asi si ona tina ae sa fai atu i ai lana uo teine o ia ua fia alu i le fale, ma avea ai ma itu na ita ai Mathew ma ia po ai foliga o Britta, e pei ona taua i faamaumauga a le faamasinoga.

O le ita o Britta ia Mathew na ia palauvale ai, ma tago ai i le vili lona tama ma faamatala i ai le mea ua tupu, ae na se’i e Mathew le telefoni ma fai lana folafolaga tau faamata’u i le tama o Britta, ae na tali le tamaitai, o le a ia faia foi le mea lava lea e tasi i lona tina.

Na toe fai atu Mathew, “a sau loa lo’u tina ona lua fufusu loa lea, afai ae fasioti e lo’u tina oe, ou te faataavale oe i lalo o le aega lea,” na maea le tala lea a Mathew ona ia toe poina lea o foliga o Britta, e pei ona taua i faamaumauga a le faamasinoga, ae sa taumafai foi le tamaitai e tali atu i gaioiga a le ua molia o lo o faia ia te ia.

O le taimi lea na taunuu ai loa le tina o Mathew ma ia palauvale ia Britta, faatasi ai ma lona fesoasoani i lana tama i le fasiga o lana uo teine.

Ina ua tau maua sina to’a o le vevesi, na folafola e Britta o le a faila lana tagi faasaga ia i laua, peitai sa palauvale i ai ia Miriama, ma fai atu i ai poo a ana tagi, ona ia toe fasi foi lea ia te ia, mulimuli ane maua le avanoa o le tamaitai na aafia e sola ese ai ma ia faafesootai ai loa le ofisa o leoleo.

Fai mai faamaumauga a le faamasinoga, o le taimi atoa lava lea na vevesi ai le to’atolu lea, ae o lo o iai ma le tama a Mathew ma Britta, e tasi le tausaga.

Na taunuu leoleo i Matuu ma latou agai faatasi atu loa ma Britta e faasino le fale o Mathew ma lona tina o Miriama.

Fai mai faamaumauga a le faamasinoga, ina ua faailoa e leoleo ia Mathew ma lona tina le mafuaaga o le latou oo atu, sa toe palauvale foi Miriama ia Britta ma fai i ai ni folafolaga mamafa ia te ia, peitai sa fautuaina o ia e leoleo ina ia faafilemu le mataupu.

I totonu o le potu faamasino ina ua valaau le mataupu a Mathew ma lona tina o Miriama, sa fesili le alii faamasino ia Britta pe manao e fai se poloaiga a le faamasinoga e faasa ai ona toe taumafai e faafesootai o ia, sa tali le tamaitai “ioe”, peitai sa vaaia i le taimi lea le ataata o Mathew ma faasaga mai i le nofoa o lo o nofo atu ai Britta.

O le aso 13 o Tesema lea ua faamoemoe e toe tulai ai Mathew ma lona tina i luma o le faamasinoga, peitai ua poloaina i laua ina ia tausi le filemu ma aua nei toe tulai mai se isi vevesi i le lumanai.