FALETAGOA’I: Mana’omia le lagolago mo le Talavalu

O le fa’agae’etia tele o le loto o le afioga i le ali’i Senatoa mai le Itumalo o le Alataua, i le tulaga sa i ai le taumafaiga a le au ta’ito’a 7 a le atunu’u, le Talavalu, i le ta’amilosaga ta’ito’a 7 a le IRB o lo o fa’agasolo i Hong Kong i le fa’aiuga o le vaiaso nei, na mafua ai loa ona ia talosagaina afioga i Senatoa ina ia ave la latou sapasapaia i le au a le atunu’u, lea ua fai ma ave fu’a i le lalolagi i le taimi nei.

 

O le po o le aso Tofi na te’a nei na fa’asalalau tu’usa’o mai ai i le malae o le Hong Kong stadium i Hong Kong ulua’i ta’aloga e lua a le Talavalu, lea ta’aalo ai ma Italia ma Hong Kong, ma le ta’aloga fa’ai’u i le aoauli ananafi ma Tunusia.

 

E ui na faiaina le Talavalu i ana ta’aloga uma ia e tolu, i ‘ai e 31-12 ma Italia, 38-7 ma Hong Kong, ma le 14-5 ma Tunisia, peita’i na saunoa Faletagoa’i, o le ofi atu o Amerika Samoa i taaloga faavaomalo a le lalolagi i le lakapi ona o taumafaiga a le Talavalu, o se tulaga lea e ao ona mitamita i ai le atunuu atoa.

 

“O se ulua’i taimi lenei ua agiagia ai le fu’a a Amerika Samoa i lea vaega o le lalolagi, ona o ta’aloga fa’avaomalo i tulaga tau lakapi, ma ua fa’amauina taumafaiga a le pulega ma le ‘au atoa i tala faasolopito o le atunuu i tulaga tau ta’aloga,” o le saunoaga lea a Faletagoa’i.

 

E leai se isi auala na autu i ai le saunoaga a le ali’i senatoa, se’i vagana ai lona talosagaina o afioga i senatoa, ina ia fa’ailoa la latou lagolago i le Talavalu e ala i le fesoasoani i auala e atina’e ai le ta’aloga lakapi i le atunu’u.

 

“Ou te talosaga atu i a outou afioga, e le gata e tatau ona ave la tatou lagolago malosi i le au a le Talavalu, ae talosaga atu fo’i ina ia fa’amatu’u mai a outou eleele ma fanua e fausia ai ni malae ta’alo, mo le atina’eina o le ta’aloga lakapi i totonu o itumalo ma afioaga i le atunu’u,” o le talosaga lea a Faletagoa’i.

 

Na taua e le Ta’ita’ifono o le Iuni Lakapi a Amerika Samoa ia Togiola T. A Tulafono, a’o fa’agasolo mai taumafaiga mo le atina’eina o le lakapi i le atunuu i ni nai tausaga e le i mamao atu, o le taua o le ta’aloga lenei o le lakapi, e mafai ona maua ai galuega a tama fanau a le atunuu e ta’aalo ai i au lakapi a isi atunuu o le lalolagi, e pei ona i ai isi alo mai Samoa ua ta’aalo kalapu i atunuu e pei o Niu Sila, Ausetalia, Europa faapea ai Asia.

Comment Here