Ads by Google Ads by Google

Falepuipui Vagana mo le 40 masina ona o mariuana

E 40 masina lea ua poloaina e le fa’amasinoga maualuga le susuga a Fatu Vagana e taofia ai o ia i le toese i Tafuna, ina ua fa’amaonia e le fa’amasinoga le moliaga o lona umia fa’asolitulafono o fualaau fa’asaina ma le fa’amoemoe e tulei ma fa’atau atu i isi tagata.

 

Saunoa le alii faamasino sili ia Michael Kruse a’o lumana’i le fofogaina o le fa’asalaga a Vagana, e 470 sikaleti mariuana sa maua e leoleo i totonu o le afifi lea na umia e Vagana, o le afifi na sau ma le Seila o le Lady Naomi, le susuga ia Liki Kerisimasi, lea fo’i ua tuli lana fa’asalaga fa’a falepuipui e 12 masina i le toese ona o le mataupu lava lenei.

 

Na faamatala e Kruse le gaioiga sa faia e Vagana ma Kerisimasi i le aso na maua ai laua e leoleo i le masina o Novema 2013, o se gaioiga faasolitulafono ua fa’alavelaveina ai tiute fa’atino a Ofisa o le malo e pei o le Ofisa o Tiute ma le Vaega o Femalagaaiga, o lo o galulue i le faamalosia o tulafono tau i le puipuiga o le teritori, ina ua la galulue faatasi mo le aumaia faanana o fualaau faasaina i le teritori.

 

Na taua e Kruse e faapea, e tusa ai o faamaumauga ua maua e le faamasinoga, o le gaioiga faasolitulafono o lo o faia ina ia alofia ai gaioiga a le Ofisa o Tiute ma le Femalagaaiga, o le faaaoga o Seila o le va’a e aumai faanana ni taga meamata ae nana mai ai i totonu fualaau faasaina, ma le faamoemoe e tuu i le tagata o lo o fa’atali atu i Amerika Samoa nei.

 

O le mea la sa tupu, ana le mae’a lava ona kilia e le Ofisa o Tiute ma le Vaega o Femalagaaiga le va’a ma ua fo’i tagata faigaluega i le Ofisa, e le manu a’e i luga le taga talo na sau ma Kerisimasi mai Samoa, o lo o aumai faanana ai le afifi mariuana, ma e foliga mai e le o se taimi muamua lea ua a’afia ai i laua i le gaioiga lenei, a’o lea fa’atoa maua e leoleo.

 

Ina ua taofia e leoleo le ta’avale a Vagana e pei ona taua e le faamasinoga, sa maua i ai i totonu ni afifi mariuana na sau ma Kerisimasi, ma o totonu o ia afifi sa maua i ai sikaleti mariuana e 470 ua uma ona taai.

 

Na faatoese Vagana i le faamasinoga e tusa ai o lana solitulafono sa faia, ma ia talosagaina ai se isi avanoa mo ia se’i fo’i atu ai i lona aiga e tausi lona to’alua ma si ana fanau.

 

Na taua e Vagana e faapea, o le toese, e le o se nofoaga lelei lea mo se tasi e tausi sona aiga aemaise o lana fanau, ae o le umi lea na taofia ai o ia i le toese, ua ia aoaoina ai se lesona aoga mo ia i le lumana’i.

 

Sa ia fa’atoese fo’i i le aiga o lona toalua i Aoloau ona o le ta’uvalea o le igoa o le aiga i lana solitulafono sa fai.

 

Ae na saunoa Kruse e faapea, e ui e taua tele i le faamasinoga le talosaga a Vagana mo se avanoa se’i toe fo’i atu ai e tausi lana fanau, peitai e tatau fo’i i le fa’amasinoga ona silasila toto’a i fanau a le atunuu na semanu e a’afia o latou olaga talavou i sikaleti mariuana e 470 lea na maua i le ali’i ua molia nei.

 

E 10 tausaga i le toese ma le salatupe e $5,000 na manatu le faamasinoga e faasala ai le ua molia, peitai o le a faamalumalu lona tuliina o le faasalaga faafalepuipui, ae o le a nofovaavaaia ai o ia mo lea umi i lalo o poloaiga e ao ona ia usita’i i ai.

 

O ni isi o ia poloaiga e aofia ai lona totogiina o le salatupe e $5,000, tuli masina e 40 i le toese, ma ia faia ni suega i lona tino ao i ai i totonu o le toese ina ia faamaonia ai na te le o toe tagofia fualaau faasaina.