E 8 tausaga lea ua fa’asala ai e le fa’amasinoga maualuga le alii o Lafaele Tauiliili i le taeao ananafi, ina ua ta’usala o ia i moliaga e aofia ai le fa’ao’olima, ma le fa’aaoga fa’asolitulafono o se fana e le i lesitalaina.

Saunoa le afioga i le faamasino sili ia Michael Kruse i le taimi na ia fofogaina ai le fa’asalaga a Tauiliili e fa’apea, e ui i le taua o molimau mai sui o le aiga o le alii ua molia e aofia ai ma le afioga i le alii faipule ia Timusa Tini Lam Yuen, lea sa latou talosagaina ai se fa’asalaga mama mo le ua molia, peita’i e manatu le fa’amasinoga, sa i ai fo’i isi avanoa na tuuina atu muamua e le fa’amasinoga mo le ua molia, ae foliga mai e leai ma se lesona taua na ia maua mai ai.

Na faatoese Tauiliili i le faamasinoga e tusa ai o lana solitulafono sa fai, ma ia talosagaina ai se isi avanoa mo ia. Sa ia faatoese foi i aiga na a’afia i lana gaioiga sa faia, ina ia faamagalo o ia, sa ia taua fo’i e fa’apea, o le gaioiga sa ia faia, e lei i ai se manatu e fa’amanu’a ai se tagata.

Na taua i le molimau a le afioga a Timusa ma le aunty a le ua molia ni isi o itu lelei mo Tauiliili, e pei o lona lagolago lea i mea fai a le nuu ma le itumalo, atoa ai ma lona aiga.

Na finau le loia a le malo ia Tiffany Oldfield ina ia fa’asala Tauiliili i le fa’asalaga pito maualuga, ona o le matuia o le solitulafono sa ia faia.

Na fa’ailoa fo’i Oldfield i le fa’amasinoga faamaumauga mai le faamasinoga faaitumalo, e faatatau i isi solitulafono na ta’usala ai le ua molia i tausaga ua mavae, lea fo’i sa maua ai le avanoa e fa’anofova’ava’aia ai o ia i le tele o taimi.

Saunoa Kruse e fa’apea, o se tasi o itu e le o nofo lelei i le manatu o le fa’amasinoga, o le alii lenei, so o se taimi lava e ‘ona ai pe ita fo’i i se tagata, e tapa lava i lana fana ona alu lea ma fa’apapa.

Na toe fa’atepa e Kruse itu e lua i le fa’alavelave na mafua ai ona ta’usala le ua molia ma ia taua ai e fa’apea, i le aso 26 Tesema 2013, na umia ai e Tauiliili se fana ua uma ona utu i ai pulu, ona alu lea i lana ta’avale ma aga’i atu i se nofoaga sa nofonofo ai se tamaititi e laititi i lalo o le tulafono ma ana uo.

Ina ua taunuu Tauiliili i le nofoaga lea, sa ia valaau i le tamaititi laititi lea pe fia ulavale, ona ia faapa lea o lana fana i luga o le ea, ma avea ai ma itu na fefefe ai le tamaititi ma ana uo ma sosola ese ai loa, ae na toe tago atu Tauiliili ua ta’i lana fana i le itu o lo o tamo’e i ai le tamaititi ma toe fa’apa.

Ina ua loka o ia e leoleo, sa ia laulauvavale i leoleo ma pisapisao solo i totonu o le Ofisa o Leoleo i Leone, ma ia tauai solo nofoa ma leaga ai nofoa e tolu, sa ia sasaeina fo’i le screen wire o le potu fono a leoleo.

Ae ina ua taumafai le alii Kapeteni o Cpt. Togia e fa’afilemu o ia, sa oso atu le ua molia ua fa’afetoai lona ulu ma le ulu o le alii kapeteni ma niniva ai le ulu o le alii kapeteni.

O le tausaga e 1982 na molia ai o ia i le moliaga o le talepe fale i le tulaga lua; o le 1992 na toe molia ai o ia i se faamasingoa i Amerika; o le 2000 na molia ai foi o ia i le faalavelave lea na ia faapa ai se fana ao faia se siva i totonu o le aoga maualuga i Leone; ma le 2006 lea foi na ta’usala ai o ia i le moliaga o le fa’atupu vevesi i nofoaga faitele.

O le moliaga o le faaoolima i le tulaga lua, e 5 tausaga e loka ai Tauiliili i le falepuipui, o isi moliaga mama e tolu e aofia ai le faaoolima i le tulaga tolu, faaleaga meatotino atoa ai ma le faaaoga o se fana e le i lesitalaina, e ta’i tausaga e tuli i le toese, ma o ia fa’asalaga uma e tuli eseese. Ua poloaina fo’i o ia na te totogi le salatupe e $1,000.