Falepuipui tagata faigaluega to’alua a le malo

O tama’ita’i faigaluega e to’alua a le malo lea sa galulue i le Matagaluega o le Soifua Maloloina, lea na ta’usala i le mataupu lea na la teu faamalosia ai se siaki a le malo i totonu o le teugatupe a se tasi o i laua, ua fa’afalepuipui e le fa’amasinoga maualuga mo le ta’i 3 masina, o se tasi lea o tuutuuga o le la nofovaavaaia e 5 tausaga.

 

O Taufau Maxine Sagale ma Sieni Paopao Ioapo na ulua’i tuuaia e le malo i moliaga mamafa o le gaoi faapea ai ma le faia o tusitusiga tau faasese, ai i lalo o ni maliliega sa latou sainia ma le malo ma talia e le fa’amasinoga, na tali ioe ai Sagale i le moliaga o le faia o tusitusiga tau faasese, ae o Ioapo na tali ioe i le moliaga o le taumafai lea e gaoi.

 

A’o le i tuuina atu le faasalaga a le faamasinoga faasaga ia i laua nei i le aso Lua na te’a nei, na maua le avanoa e faatoese ai i laua i luma o le faamasinoga, mo se isi avanoa se’i toe faaleleia ai vaega ua faaletonu i a laua faaiuga.

 

Na tau le mafai ona fai se molimau a Sagale i lona tagi tele, a’o ia talosaga i le faamasinoga mo se avanoa mo ia, se’i faaauau ai pea lana tausiga i si ana tama e 2 tausaga le matua o lo o i le fale.

 

Na taua e Sagale e faapea, sa le tatau ona tula’i mai lenei solitulafono, ae ina ua tula’i mai, e le gata ua ia faaluma ai lona aiga ae ua faaleaga ai fo’i ma lona tulaga lelei i lana galuega sa i ai.

 

Sa ia tautino i le faamasinoga, o ia ua salamo, e le toe tupu fo’i le solitulafono e pei ona ta’usala ai o ia. Sa talosaga fo’i lona tama i le faamasinoga mo se avanoa sei faaauau ai pea le tausiga a Sagale i lana tama.

 

Ae na taua e Ioapo i lana faatoesega lona salamo e tusa ai o lana solitulafono sa fai, ma ua ia lagona fo’i sa le tatau lava ona tupu lea tulaga. Sa ia talosagaina le faamasinoga mo se avanoa e faaauau ai pea lana tausiga i lana tama e 6 tausaga faapea ai lona aiga.

 

Na taua e le loia a Ioapo o Richard Desaulles e faapea, o Sagale e to’atasi na amataina lenei mataupu, lea ua aafia atu ai fua ma Ioapo, ma e ui o le tupe sa teu i totonu o le teugatupe a Ioapo, e o o mai lava i le taimi nei o lo o i ai pea le tupe i totonu o le teugatupe, ma o lo o faatali le faletupe i le malo mo le toe aveeseina o le latou tupe.

 

Na taua e Desaulles e faapea, e leai ma se tupe na faaaoga e Ioapo mai le tupe sa aafia i lenei mataupu, ua maea fo’i ona faamavae le ua molia mai lana galuega ina ua faila e le malo lenei mataupu i luma o le fa’amasinoga.

 

I le olaga atoa o Ioapo e pei ona taua e lana loia, e le o se tagata na aafia muamua i ni solitulafono, ae o ia o se tina e galue malosi mo le tausiga o lana tama e 6 tausaga. Sa talosaga e le loia le faanofovaavaaia o Ioapo, a ia faatulaga ni polokalame e a’oa’o ai lona mafaufau ina ia aua ne’i toe tula’i mai lenei mataupu i le lumana’i.

 

E ta’i 5 tausaga na manatu le faamasinoga e faasala ai i laua uma ia e to’alua, peita’i o le a fa’amalumalu le faataunuuina o lea faasalaga faa falepuipui, ae o le a nofovaavaaia i laua mo le ta’i 5 tausaga i lalo o poloaiga a le faamasinoga.

 

O le poloaiga muamua, e ta’i 20 masina e taofia ai i laua i le toese i Tafuna, peita’i, ua manatu le faamasinoga ua lava na o le tolu masina la te tuliina, ae faamalumalu masina e 17 fuafua lava i lo la usitaia o isi poloaiga a le faamasinoga.

 

Ua poloaina i laua la te totogi le salatupe e ta’i $1,000 a le tagata, ma ia la totogiina ni isi tupe e poloaiina i laua e le malo la te toe totogi atu.

 

Ua faatonuina fo’i i laua la te faia ni galuega lelei mo tagata lautele mo le umi e 3 masina, i lalo o le ta’ita’iga a le Ofisa Nofovaavaaia, ma aua ne’i o la toe soliina se tulafono.

Comment Here