FALEPUIPUI MO LE TA’I 28 MASINA LE AU AMIO VALEA E TO’AFA

E ta’i 28 masina lea ua fa’asala ai e le Fa’amasinoga Maualuga ni ali’i se to’afa amio valea i le toese i Tafuna, ina ua ta’usala i latou i tu’uaiga o lo latou faia lea o uiga mataga i se teineititi e 14 tausaga le matua.

 

O le isi to’alua na fai’aiga ma le teineititi na a’afia a’o 13 ona tausaga, tusa lea o lo o i ai o ia i le Vasega 8, ae o le isi to’alua na la fai’aiga ma le teineititi ina ua atoa le 14 tausaga lona matua.

 

O i latou ua fa’afalepuipui e aofia ai Peniamina ‘Peni’ Levi: Tavita Mariota: Lewis Lokeni ma Anthony Sioka.

 

A’o le’i tuuina atu le faasalaga a le faamasinoga faasaga ia i latou nei i le taeao ananafi, na maua le avanoa e faatoese ai i latou e tusa ai o le solitulafono ua ta’usala ai i latou, atoa ai ma lo latou talosagaina o le fa’amasinoga mo se isi avanoa se’i toe fo’i atu ai i tua e tausi o latou matua ua matutua.

 

Ae na faamanatu e le faamasinoga i ali’i talavou nei e to’afa, o le solitulafono o le fai’aiga ma se teineititi e i lalo o le 16 tausaga le matua, fai mai le Tulafono na pasia e le Fono, o se solitulafono matuia lea.

 

“Na mafua ona puipuia e le Fono tama’ita’i e i lalo o le 16 tausaga le matutua mai le a’afia i faiga fa’afeusuaiga, ona e le’i lava le malosi o latou mafaufau e iloa ai a’afiaga o latou olaga pe a a’afia i latou i faiga fa’afeusuaiga,” o le saunoaga lea a le ali’i fa’amasino sili ia Michael Kruse.

 

Na toe faatepa e Kruse i latou nei e to’afa, i le mamafa o le faasalaga o le solitulafono na ulua’i molia ai i latou e le malo, lea e mafai ona faafalepuipui ai se tasi mo le umi e mafai ona oo atu i le 15 tausaga i le toese, peitai ua manatu le malo e solofua ese lea moliaga mamafa, ae molia i latou i le isi moliaga e feololo atu le mamafa o lona faasalaga, lea e na o le 7 tausaga le umi e mafai ona faasalaga ai se tasi o i latou i le toese.

 

Na talia e le faamasinoga le faafinauga a le ali’i loia fautua ia Michael White na tula’i mo i latou uma nei e to’afa, o nei ali’i o ni ali’i e talavou o latou olaga, ma e i ai se lumana’i lelei mo i latou pe afai e maua se isi avanoa e toe fo’i atu ai i o latou aiga.

 

Saunoa Kruse, e ui o lea ua finau i latou nei ina ia tuu atu se isi avanoa e toe fo’i atu ai i o latou aiga e tausi o latou matua, ae o lea o lo o manino i le ripoti a le Ofisa Nofovaavaaia, e leai ma se isi o i latou nei e faigaluega, pe sa naunau fo’i e saili se galuega e fesoasoani ai i le atina’e o le aiga atoa ai ma le tausiga o matua.

 

“Pau le mea lea ua matou vaai atu i ai, o le isi to’alua o i latou nei na molia muamua i luma o le Fa’amasinoga Faaitumalo i le solitulafono o le inupia ae le’i atoa le 21 tausaga, o le isi to’atasi na molia muamua i le tete’e atu i leoleo a’o taumafai e pu’e faapagota o ia, ma le isi to’atasi ua fa’atele ona molia i le solitulafono o le faatupu vevesi i nofoaga faitele,” o le saunoaga lea a Kruse.

 

Na faamanatu e le faamasinoga i ali’i talavou nei e to’afa e faapea, o se tasi o itu o lo o mamafa i le finagalo o le faamasinoga, o le teineititi na aafia e na o le 13 tausaga le matua i le taimi na tupu ai le faalavelave, ma o le tiute o le faamasinoga, o le puipui lea o tama’ita’i uma e ta’i 13 ma le ta’i 14 tausaga i totonu o le atunuu, ina ia aua ne’i aafia i latou i ituaiga amioga mataga nei, ae afai fo’i e a’afia i latou i ituaiga gaioiga mataga nei, e le manatu mama le faamasinoga i le faasalaina o i latou e faia nei ituaiga amioga i tama’ita’i nei.

 

E 7 tausaga na manatu le faamasinoga e faasala ai i latou uma nei i le toese i Tafuna, peitai o le a faamalumalu le tuliina o lea faasalaga, ae o le a nofovaavaaia i latou mo le ta’i 7 tausaga i lalo o poloaiga e ao ona latou usita’i i ai.

 

O ni isi o ia poloaiga e aofia ai le tuli o le ta’i 28 masina i le toese, faasa ona latou toe taumafai e faafesoota’i le teineititi na aafia, ma ia saili ni a latou galuega pe afai e magalo mai i tua mai le toese.

 

Ua poloaina fo’i i latou ina ia lesitala o latou igoa i le lisi o i latou ua ta’usala i le faia o uiga mataga i fanau teine laiti, ma ia faia ni suesuega i o latou tino po o latou tauaveina siama o le fa’ama’i o le HIV.

Comment Here